←  Psalms (40/150)  →

---

1.

LALPA chu ka nghak fan fan a,Ka rawl hrein a hung ngha a;

2.

A mi kei suok, khur thim a'nthok,Ka'n tangna chirdum a'nthok chun;Lungpui chungah a mi'n ngirtir,Sirsan nghet tak a mi siempek.

3.

Ka bauah hla thar a sie a,Ei Pathien inpakna hla chu.Mi tam takin chu chu hmuin,Tiin LALPA chu ring an tih.

4.

Mi chapohai tieng ngha lo a,Pathien lemhai khom hnawl hmang a,LALPA ringtu chu a hamtha.

5.

LALPA Pathien, kan ta dingin,Thil mak tam tak i thaw hlak a; Kan ta dinga i remruothai,Tu khomin puong seng naw ni hai;Tiemin hril suok ding ni inla,Puong seng ngaina hrim a um nawh.

6.

Inthawina le thil inhlanhai,I thil dit tak a ni naw a;Suol thawinaa ran inhlan khom, I thil phut tak a ni bok nawh.I thu ka hriet theina dingin,Ka na i mi hongpek lem si.

7.

Chuongchun, "Ngai ta, tu hin ka hung,Dan bua chun i zirtirna,Ka ta dingin a'n ziek si a,b

8.

Aw ka Pathien, nangma ditzawngThaw hi ka va chak ngei de aw!I danhai chu ka lungrilahA cham zing hlak" ti'n ka hril a.

9.

I sansuokna thu lawmum chu,Pungkhawm ropui lai ka puong a;Ka bau ka'n chip nawzie thu khom,LALPA nang ngei hretu i nih.

10.

Ka ip ngai nawh, i felna thu,I ringumzie thu puong darin,I sandamna thu ka hril hlak.I hmangaina chuoi ngai lo le,I ringumna dul ngai lo chu,Pungkhawmhai lai ka ip ngai nawh.

11.

Keima lakah i zangaina,Inro naw rawh, aw ka LALPA;I hmangaina le ringumnan,Kumkhuoin mi huol him zing rawh.

12.

Tiem seng lo buoinan an mi'n huol,Ka bawsietna'n a mi chim a,Khuo khom ka hmu thei ta si nawh;Ka sam zai nekin a tam lem,Ka lung a va hang dong ngei aw!

13.

Aw LALPA, lunginsiettakin,Hung vat la, mi hung san suok rawh.

14.

Ka hringna la tumtuhai chu,Muolphoin chi-ai hai sien la,Ka sietna ding phiertuhai chu,Hmaimawkin tlan se raw hai se.

15.

"Chei leh, Chei leh!" tia khek a,Mi'n riem khumtuhai po po chu,Inzakin kun tlok tlok raw se.

16.

Nangma zongtu taphothai chu,Nangmaah chun hlimin lawm sien;I sandamna dittu poin,"LALPA chu a va ropui ngei!"Tiin lawm hla rem rop raw se.

17.

Kei pasie le riengvai tak hi,LALPAN a mi ngaituo hlak si;Mi thangpuitu le sansuoktu,Aw ka Pathien, muongchang lul naw.

---

←  Psalms (40/150)  →