←  Psalms (38/150)  →

---

1.

Aw LALPA, i lungsen pumin,Nangin mi zilhau ngai naw la,Lungpuom lai mi thunun naw rawh.

2.

I thal chun a mi sun tlang a,I kut ka chungah a tla hi.

3.

I lungsen leiin ka pum hin,Dam ni reng reng a hmu ta nawh;Ka suol leiin ka ru le chang,A sil na them thum vong a nih.

4.

Ka ritlonan ka lu a buk,Phur ruol loin a rik a nih.

5.

Ka thilthaw indik naw leiin,Tirdakum khopin ka panna,A mi huoisuolpek a ni hi.

6.

Na tuorin ka kun tlok tlok a,Sunnithlak beidongin ka'n rum.

7.

Ka kawng bawr a sa vut vut a,Ka taksa bung tinreng hai hi,A damna lai hrim a um nawh.

8.

Ka chau a, ka zoi letder a,Lungril sahalin ka'n rum ie.

9.

LALPA, ka lungkham i hriet vong,Ka beidong inthuok ri chenin.

10.

Ka lungphu a chawmchawrok a,Tha nei loin ka zoi der a,Ka mithai khom a'n thim zo tah.

11.

Ka pan leiin ruol le paiin,Hnai khom an mi hnai nuom ta nawh;Ka khuo le venghai chen khomin,Hla takah an min kiengsan tah.

12.

Ka hringna la tumtuhai chun,Ka awkna dingin chang an kam,Mi suknat tumtuhai khomin,Ka siet tuok ding thu ngot hrilin,Sunnithlakin an mi phier ruk.

13.

Kei hlak chu naset ang elin, Ieng khom ka hriet ve ngai naw a,ihriem tong thei lo ang elin,Ka bau ka phong ve ngai bok nawh.

14.

Mithi, ieng khom hre thei ta lo,Mi don dinga bau phong thei lo,Ang hlol el ka lo ni ta hih.

15.

Nang chauh i nih ka nghak, LALPA,Mi don ngei rawh, LALPA Pathien,

16.

Ka tluk leia hmelma diriem,Mi uongkhum ding phal lul naw rawh.

17.

Ka natnain a mi'n thla nawh,A tlu leng leng chauh ka ni hi.

18.

Ka bawsietnahai ka'n puong a,Ka suol leiin poi ka ti hle.

19.

San um loa mi theidatu,Ka ralhai hi an hrohrang hle;Indik loa mi dotuhai,A tam khom an lo tam kher el.

20.

Anni rawi hi annawm suola, Ka thil tha thawhai thungrultu;Thil tha ka bawzui pei leiin,An mi theida em em a nih.

21.

Aw LALPA, mi thlathlam naw la,Aw ka Pathien, mi'n hlat naw rawh.

22.

Aw ka LALPA le Sandamtu,Mi san dingin hung inhmaw rawh.

---

←  Psalms (38/150)  →