←  Psalms (37/150)  →
1. Thil suol thawtuhai leiin,I lung sukhnur ngai naw la,Thil dik lo thawtuhai khom,Inhnarin thik bok naw rawh.
2. Hlo angin vuoi vak an ta,Hna hring ang rem vak an tih.
3. LALPA ringa thaw thain,Hi rama hin khawsa la,A muong himna chu tlan rawh.
4. LALPA-ah hlimin lawm la,I dusam peng a ti che.
5. I um dan ding lampui chu, LALPA-a chun innghat la,Ama chu ring nghet tlat la,Hieng hin thawpek a ti che:
6. I felzie zing ni angin,Hung invar suoktir a ta,I ngirhmun indikzie khom,Sun chang angin var a tih.
7. LALPA hmaah to zingin,Ama chu nghak fan fan rawh.Mi suol an hlawtling lei dam,An suol phier an hlen lei dam,I lung sukna der naw rawh.
8. Lungsenna hi bansan la, Lungturuk insuo sim rawh;Insuklunghnur nuom naw rawh,Suol tieng chauh mi a thuoi hlak.
9. Mi suol sat thlak ning an ta,LALPA beiseituhai chun,Ram hi la rochung an tih.
10. Sawt naw te chauh hnunga chun,Mi suolhai bohmang an ta,Anni chu zong zong la khom,Hmu zo tawl ta naw ti nih.
11. Zainemhan ram hluong an ta,Muong takin khawsang an tih.
12. Mi suolhan mi fel an phier,Ha an rawt khum suot suot hlak;
13. LALPAN mi suol a nuizat,An tawp a hnai ti a hriet.
14. Pasiehai sietna ding le,Mi ngilhai sukhlumna di'n,Mi suolha'n kawlhnam phawiin,An thalpui an kuoi kur hlak.
15. Sienkhom an kawlhnam ngei chun,Anni lung dawt tlang a ta,An thalhai tliek vong a tih.
16. Mi suol hausakna nekin,Mi fel thil nei tlawmte chu, A thain a hlu lem si.
17. Mi suol thilthawna kut chu,Suktliekin la um a ta,LALPAN mi fel a tungding.
18. Dem kai ngai lo mihai chu,LALPAN a hriet kim vong a,Rochan nei kumkhuong an tih.
19. Hun khirah muolpho naw nih,Tam kum khom an hnienghnar hlak.
20. Mi suol chu an bohmang a: Mit khap kar loa phul mawi,Meia a zam ral angin,LALPA hmelmahai khom chu, Mei khu ang an zam ral hlak.
21. Mi rilohan an puk a, An rul nawk ta ngai naw a,Mi felhan tiktlai takin,A thlawnin an pek lem hlak.
22. LALPAN mal a sawmhai chun,Ram hi hluo'n rochung an ta;Tongsie a'n phurhai ruok chu,Sat thlakin la um an tih.
23. LALPA ditzawng thawtu chu,A kalchawi a sukhrat hlak,
24. An sui chang khom tlu naw nih,LALPAN a chel nghet si a.
25. Naupang ka ni lai a'nthok,Ka tar kun hun chen khom hin,LALPAN mi fel a thlathlam,Ka la hmu hrim hrim naw a,An nauhai kutdaw lai khom,Ka la hmu hrim hrim bok nawh.
26. Thilpekah an tik a tlai, A thlawnin an inpuktir,An suon le parhai khomin,Malsawmna an dong pei hlak.
27. Suol banin thil tha thaw la,Ram hi hluo kumkhuong i tih.
28. LALPAN indikna a lawm,A ta dinga ringumhai,A maksan ngai hrim hrim nawh.Chatuonin hum tawl a ta,Mi rilo thlahai ruok chu,Sat thlakin um vong an tih.
29. Mi felhan ram hluong an ta,Chu chun cheng kumkhuong an tih.
30. Mi felin thuvar an hril,An bau suok thu a'n lai hlak.
31. Lungrilah Pathien danhai,Ieng lai khom an vong tlat a,An sir khom a'n phet ngai nawh.
32. Mi rilo chun that tumin,Mi fel a'n chan ruk hlak a;
33. Sienkhom, mi rilo kutah,LALPAN a maksan ngai nawh;Rorelnaah khom thiem naw,An inchangtir a phal nawh.
34. LALPA chu nghak zing hlak la,A lampui chu hraw hlak rawh.Chuongchun chawi sang a che a,Ram inrochungtir a che;Mi suolhai a sat thlak pha,Mit ngeiin la thlir i tih.
35. Mi suol tawrot ka hmu a,Tuolto thing ang a'n buk hlup.
36. Ka sir nawk, a um ta nawh,Ka zong vel, ka hmu ta nawh.
37. Dem kai lohai ngaituo la,Mi ngilhai nun bi chieng rawh;Inremna dittuhai chun,Suon le par an thla ngei hlak.
38. Bawsetuhai ram an ta,Suon tieng zik bul bok an tih.
39. Mi felhai sandamna chu,LALPA-a inthok a na,Ama chu harsat ni a, An belbul kul nghet a nih.
40. LALPA chun a thangpui a,Aman a san suok tawl a,Ama chu an bel leiin,Mi suol lakah a san him.
←  Psalms (37/150)  →