Psalms (34/150)  

1. LALPA chu inpak rop ka ta,Ka bauin ama inpakna,Ieng lai khomin sam zing a tih.
2. LALPA chu ka thla'n a suong a,Rimsihan hrein lawm raw se.
3. LALPA chu mi chawimawipuiin,A hming chu inpak tlang ei tiu.
4. LALPA ka zong, a mi lo don,Titna a'nthok a mi san suok.
5. Ama entuhai reng reng chu, An hmel a hung eng suok hlak a,Inzak hmel hrim an put ngai nawh.
6. Hi mi rimsi hin a ko a,LALPA chun a lo ngaithlak a,Buoina lakah a san suok tah.
7. Vantirkohan LALPA titu,An umngha a, an humhim hlak.
8. LALPA hang thatzie em em hi,Intemin hang hre ve hrim t'um;Ama beltu chu a hamtha.
9. Mi thienghlimhai, LALPA ti ro,Ama tituhai hrim hrim chun,Tlaksam ieng khom an nei ngai nawh.
10. Sakeibaknei vanglai khom hi,Fak ding tlasamin a chau thei;LALPA zongtu ruok chun thil tha,Ieng khom an tlasam ngai si nawh.
11. Ka nauhai, hungin ngaithla ro,LALPA ti dan hril ka ti cheu.
12. Tu khom mani nun thlakhla a,Ni tha hmua dam sawt nuom chun,
13. Suol lakah a lei veng tha sien,A hmurin khel hril naw raw se.
14. Suol nghatsanin thil tha thaw ro,Inremna zongin hnot pei ro.
15. LALPAN mi felhai a hmu zing, An ko pha a ngaithlak var hlak.
16. Thil suol thawtuhai laka chun, LALPA hmel a'n tur zing hlak a,Hnuoiah hriet zing ni naw ni hai.
17. Mi fel kona LALPAN a hriet,Buoina a'nthok a san suok hlak.
18. LALPAN lungdonghai a hnai a, Beidong letderhai a san hlak.
19. Mi fel chun buoina hau sienkhom,LALPAN a san suok pei hlak a.
20. A ru le changhai a veng a,Pakhat khom suktliek ni naw nih.
21. Mi suol chu suolin that a ta,Mi fel theidatu taphot chu, Thiem naw inchangtir ning an tih.
22. LALPAN a siehlawhai a'n tlan,Ama beltuhai tu khomin,Thiem naw chang ta ngai naw ni hai.

  Psalms (34/150)