←  Psalms (30/150)  →

---

1.

Aw LALPA, chawimawi ka ti che,Thlan khur a'nthok mi san suokin,Hmelma diriem i mi phal nawh.

2.

Aw ka LALPA le ka Pathien,Mi thangpui di'n ka ko che a, Nangin i mi lo sukdam tah.

3.

Seol a'nthok mi la suokin,Khurpuia ka tlak phal loin,Aw LALPA, i mi san suok tah.

4.

LALPA hming thienghlim inpakin,A mi thienghlimhai, hla sak ro.

5.

A lungsenna a re vat a,A ditsaknan dam sung a dai.Zanah mitthli hul naw sienkhom,Zingkar hlimna a tlung nawk hlak.

6.

Ka hang hnienghnar ve chang hin chu,"Inhning ngai naw ning" ka ti hlak.

7.

LALPA, i lungsietna leiin,Tlang angin i mi suknghet a;Sienkhom i hmel i hang thup chun,Ka chi-ai nawk el hlak si a.

8.

LALPA, nang i nih ka ko che,I zangaina ka hnih, LALPA;

9.

Siet tuokin thlanah lo zal lang,I ta di'n hlawkna iem a um?Pilvutin inpak thei a che'm?I ringumzie puong thei a ti'm?

10.

LALPA, mi lo ngaithla hram la,Lungsietin mi san rawh, LALPA.

11.

Ka tap hi lam inchangtirin,Ka saiip sil mi hlippekin,Hlimnain mi'n thuom lem rawh.

12.

Chuongchun to zing loin lawm hla,Ka lungrilin rem tang a ta;Aw LALPA, ka Pathien i nih,Inpak kumkhuo tang ka ti che.

---

←  Psalms (30/150)  →