←  Psalms (18/150)  →
1. Aw LALPA, ka hmangai che,Nang chu ka hratna i nih.
2. LALPA chu ka suonglungpui,Ka kulpui, mi sanhimtu,Ka Pathien, ka lungpui bel,Ka phaw le ka kulpui nghet,Mi humtu ki hreuja nih;
3. Inpak tlak LALPA ka ko,Hmelma lakah a mi hum.
4. Thina hruiin a mi awk,Sietna tuiin a mi chim,
5. Seol hruolin a mi vet,Ka hmasuon chu thina chang.
6. Lungzingin, LALPA ka ko,Pathien thangpui ka ngen a,A tempul a'nthok a hriet,Ka rawl ri'n a na a tlung.
7. Hnuoi inhningin a'n thin a,Tlang thuthai chen a'n hning a,A lungsen chok lei a nih.
8. A hnarah meikhu a suok,A bauah kang hmang thei mei,Meichok a'n hlap suok puot puot.
9. Van kei kurin a hung tum,Sum dum chungah a ngir a.
10. Cherub chunga chun chuongin,Thli chu thla zara hmangin,Hrat takin a hung vuong a.
11. Tuomtuah thim a hmang a,Sum tui pai a'n zar khum a.
12. A hmaa var ropui chun,Sumhai chu a khaw tlang a,Riel le mei a sur chur chur.
13. LALPAN van riel a'n rumtir,Chunghnungtak rawl a thangkhawk.
14. Thalin hmelma a kap dar,Tek a'n tlaktir dum dum a,Hmelma an tlanse dur dur.
15. Aw LALPA, hnar hnit meua,I hang hrawk tawl takzet chun,Va tuonghai inlang rawtin,An hung kang zo ta vong a,Hnuoi thuthai khom a'n lang tah.
16. Chung a'nthok mi zuk banin,A kutin a mi chel a,Li a'nthok a mi lak suok;
17. Hmelma hrat le doral hrang, Ka cho ruol lo kut a'nthok,A mi san suok tah a nih.
18. Siet tuok lai mi bei sien khom,Mi santu LALPA a nih.
19. Hmun thawvengahk a mi'n nghat,Ka chungah a lawm leiin,A mi san suok tah a nih.
20. Ka'n dikna phuin lawmman,LALPAN a mi siempek a,Ka kut a fai ang phuin,Ama chun a mi rul hlak.
21. LALPA ditzawng ka vong a,Pathien invak hmangsanin,A kal zawng ka thaw ngai nawh.
22. Ka hmaah a dan ka sie,A thu ka bawsiet ngai nawh.
23. A hmaa dem kai lo di'n,Suol lakah ka'n thier fihlim.
24. Ka'n dikna ang phu peiin,A mit hmuah poi ieng khom,Ka tawk ve ngai naw leiin,LALPAN lawmman a mi pek.
25. Ringum lakah i ringum,Mi fel lakah i fel fai,
26. Thienghlim lakah i thienghlim,Mi kawi lakah i khir bok.
27. Inngaitlawmhai i san a,Meng sanghai i suktlawm hlak.
28. Aw LALPA, ka khawnvar hi,I mi sit chokpek hlak a;a Pathien chun ka'n thimna,A mi sukvarpek hlak si.
29. I thang chun ral ner ka ta,Ka Pathien zarin an kul,Lawn kaiin lapek ka tih.
30. Pathien lampui a tha kim,LALPA thutiem a'n khel nawh,A beltu di'n phaw a nih.
31. LALPA naw Pathien tu am,Ei Pathien naw tu hrim am,Lungpui bel tlak an um a?
32. Hratna thaa mi'n thuom a,Ka lampui suktluongtu chu,Pathien hi a ni si a.
33. Sazuk zaper anga hrat, Zaper tha hrat mi pein, Hmun sang lerah him takin,A mi'n tlattir hlak si a.
34. Ka kut ral do a'n thiemtir,Dar thalngul ka kuoi kur thei.
35. Sandamna phawl mi pein,I kut chang tieng mi chelin,I'n pha hnuoina lei chauin,Ropui ka hlaw pha hlak si.
36. Ka kal pen i suksei a,Ka sir a'n tleu bok si nawh.
37. Ka hmelmahai ka hnot khel,Ka'n ram hma chun ka kir nawh.
38. Ka vuok thluk tawl, an op song,Ka bulah an inthal phung.
39. Raldo hrat di'n i mi'n thuom,Ka ralhai ka ke bulah,I'n bokkhuptir tawl si a.
40. Ka ralhai i mi'n hnottir,Ka hmelmahai ka tukdol.
41. Santu koin an khek chul, Tu khom hlak an um si nawh;LALPA an ko, a don nawh.
42. Thli len dar pilvut angin,Anni chu ka rawt nawi a,Kotthlera chirhak angin,Ka peihawn tawl tah a nih.
43. Mihai lakah mi humin,Hnamhai luah i mi siem,Ka hriet ngai lo hnam chen khom,Ka khuo le tui an ni tah.
44. Ka thu hrea zawm nghalin,Bokkhupin ram dang mihai, Ka hmaah an hung kun a,
45. An lungril a zam vong a,Kul a'nthok inthin pumin,An hung suok tah tham tham a.
46. LALPA chu a hring zing ie!Ka Lungpui chu inpak ro!Ka Sandamtu Pathien chun,Chawimawina chu chang raw se.
47. Phuba lapektu Pathien,Ka hnuoia hnamhai sietu,
48. Hmelma laka mi humtu,Ka hmelmahai chunga chun,Nangman i mi hlangkai a,Mi nunrawnghai laka chunNangin i mi san suok tah.
49. Chuleiin, hnam tin lai hin,LALPA i hming chawimawiin,I'n pakna hla sak ka tih.
50. A lal chu hnena ropui,Ama chun a'n changtir a,A hmangaina chuoi lo chu,A hriek nal Davida leA suon le parhai chungah,Kumkhuo'n inlangtir a tih.
←  Psalms (18/150)  →