←  Psalms (109/150)  →
1. Ka'n pak rop hlak aw Pathien,Mi tosan zing lul naw rawh.
2. Mi rilo le hlem hmanghan,An mi hril siet luoi luoi a,Khelin an mi bei a nih.
3. Theidana thu'n an mi'n huol,A san boin an mi bei.
4. Hmangaiin ka tongtaipek,Annin an mi do let si.
5. Thatna, suolin an mi rul,Hmangaina, theidanain.
6. Anni chun hieng hin an tih:"A chungthu relpek dingin,Roreltu mi suol ruot la,Hektu a chang tieng ngir sien.
7. A chungthu an rel pha leh,Thiem naw inchangtir ngei sien,A tongtainahai ngei khom,Suola ngai ni vong raw se.
8. A nun suktawiin um sien,A hotu nina chan sien,
9. A nauhai fahra hai sien,A nuhmei hmeithai raw se.
10. A nauhai chu chavaiin,Kutdawin invak hai sien,An in se tawp a'nthok chun,Hnot suokin um raw hai se.
11. Bata inpuktirtu chun,A nei po lakpek sien la,A sin inrim rahai khom,Ram dang mihan chen raw se.
12. Tu khomin lainat naw sien,A thisan a nauhai chu,Lunginsiet naw raw hai se.
13. A thlahai mang vong hai sien,Thangthar la hung ding lai khom,An hming nuoi bo ni raw se.
14. "A pipu bawsietnahai,LALPAN inchik vong sien la,A nu suolnahai khom chu,Thai hmang ni ngai naw raw se.
15. An suolnahai po po chu,LALPAN inchik zing sien la,Hi hnuoia hin tu khom hriet,Hlaw lo di'n thai bo raw se.
16. Ngilneina chang a hriet nawh,Rethei, pasie, beidonghai,An thi chenin a hnot thlur.
17. Tong sie inphur a ching chu,Ama chungah tla raw se.Mi a ditsak ngai naw a,Ditsakna chang naw raw se.
18. Tong sie a silfen a na,Tui angin a chim vel a,Hriek angin a ru a fang.
19. A korfuol a'n zem angin,Ama chu zem khum sien la,Kawngchun angin khit raw se."
20. Mi hektuhai chu LALPAN,Chuong ang chun thungrul sien la,Mi hrilsetuhai chan khom,Chuong ang pei chun ni raw se.
21. Aw LALPA le ka Pathien,I hming leiin mi duot la,I hmangaina chuoi lo chun,Mi hung san suok ngei ngei rawh.
22. Retheiin ka tlasam a,Ka lungril sung a hliem a.
23. Zan tieng ni hlim ang ralin,Khau ang thin thlakin ka um.
24. Bu nghei leiin ka khuphai,An lo ongrop zo tah a,Cherin kan hriel neng el tah.
25. Mi nuizat bur ka ni a,Mi hmu photin lu an thin.
26. LALPA Pathien mi san rawh.I hmangaina chuoi lo chun,Nangin mi hung san suok rawh.
27. I thaw a ni ngeizie khom,Hung inhriettir rawh, LALPA.
28. Tongsie mi'n phur hai sien khom,Nangin mal mi sawm i tih.Mi dotuhai muolpho sien,I siehlaw hi hlim a tih.
29. Mi sukpawi tumtuhai chun,Inzakna puon sil an tih.
30. Ka bauin nasa takin,LALPA sukropui ka ta,Mipui lai inpak ka tih.
31. Aman mi pasie a tan,Thiem naw inchangtir tumtu,Lakah a mi san suok hlak.
←  Psalms (109/150)  →