←  Proverbs (8/31)  →
1. Varnan tlang a'n sam naw maw? Hrietna a khek suok naw maw?
2. Lam sir kho tlanga hai le Lam thuoma hai a ngir a,
3. Khawpui kotsuo bula hai,A lutna kotpuia hai chun,Inring takin a khek suok a:
4. "Aw nangni mihriemhai hi,Ka ko khek cheu a ni hi;In hriet dinga ka hril a nih.
5. Mi mawlhai, fimkhur inchuk unla,Mi invethaiin, hrietthiemna nei ro.
6. Ngai ro, thil tha hril ding cheu ka nei,Thu dik hril dingin bau ka phong.
7. Ka bauin thu dik a hril a,Ka hmurin ritlona a tirdak.
8. Ka bau suok thu a'n dik a,Thu kawi letling hrim a um nawh.
9. A hre thiemtu ta dingin,Thu indik a ni vong a,Hrietna neitu ta dingin,Soisel boa fie a nih.
10. Tangka nekin ka zirtirna thlang la,Rangkachak ditum tak nek khomin,Hrietna chu thlang lem hlak rawh.
11. Lunghlu nekin varna a hlu lem a,Duthusam ieng khomin a tluk nawh.
12. "Kei, varna hin rem ka hriet a,Hrietna le fimkhur thiemna ka kol.
13. LALPA ti dan chu suol theida a nih.Uongthuong, chapo, nun suol,Tong chaltlaihai ka theida vong.
14. Remruot le rorel ka thiem a,Hrietna le thilthawtheina ka nei.
15. Keima leiin lalhan ro an rel a,Roreltuhan dan indik an siem.
16. Keima leiin renghaiin ro an rel a,Hnuoia roreltu milun po po khomin.
17. Mi ngainatu chu ka ngaina a,Mi zongtu chun an mi hmu hlak.
18. Hausakna le inzaumna neitu ka na,Hlawtlingna le hmuingilna tlo chu;
19. Ka ra suok in dong ding chu,Rangkachak hlir nekin a tha lem a,Tangkaruo tha tak nekin a hlu lem.
20. Felna lampui chu ka hraw a,Rorelna indik lamtluong ngei chu.
21. Mi ngainatu chu hausaknan ka vur a,A robawm ka sung sip hnur hlak.
22. "LALPAN a mi siem hmasa tak a,A thilsiemhai hmaa siem ka nih.
23. Chatuona inthoka indin ka nih,Leilung insieng hmaa inthok ta khan.
24. Tuifinriet um hmain ka pieng a,Tui hnarhai an put hma daiin,
25. Tlanghai an ngir suok hma dai le,Muolhai indin an ni hma dai tah khan;
26. Leilung pieng hma, ramhai pieng hma,Pilvuthai pieng hma dai khan;
27. Van a rem khawm lai ka um ta a,Tui inthuk tak huoltu ramri dingaKawlkil a khangpek lai khom khan;
28. Van sangah sum a zar lai leLi mong thut a rem nghet lai khan;
29. A ruot chin bak chim lo ding a,Tuipui ramri ding a khangpek lai leHnuoi innghatna a siem lai khan.
30. Chuong lai chun themthiem angin,A bulah ka um zing hlak a,A bulah ka cheng hlak leiin,Ni tinin hlimin ka sip hlak;
31. A khawvel siem ka hlimpui a,Hringmihai hi a nih ka lawm.
32. "Ka nauhai, tuhin ka thu ngai ro,Ka thu zawmtu chu an hamtha.
33. Ka zirtirna hi ngaithla un la,Var pha unla, ngaitha naw ro.
34. Ka tuol kotah mi nghak zing a,Ka kotkhar bulah cheng zing a, Ka thu ngaithlatu chu an hamtha.
35. Mi hmutu chun hringna an nei a,LALPA ditsak an hlaw ngei bok.
36. Mi hmu theltuhai ruok chun,Anni le anni an insuksiet a na,Keima mi theidatu phot chun,Thina an ngaizawng a nih."
←  Proverbs (8/31)  →