Proverbs (7/31)  

1. Ka naupa, ka thuhai hi vong tlat la, Ka thupekhai hi khawl khawm rawh.
2. Ka thupekhai zawm la, hring i tih.I mit nauleng ang topin,Ka zirtirna hi hum tlat rawh.
3. I kutpara hai zem tlat la,I lungril phekah ziek rawh.
4. Varna chu, "Ka farnu i nih" ti la,Hrietthiemna chu laibungah nei rawh.
5. Uirenu lakah hum a ti che a,Lawithlemnu lakah veng a ti che.
6. Ka tukver zawngdaikal awngahTuol tieng saw ka hei thlir a,
7. Mi mawl ruol lai tlangval pakhat,Lungvar tlasam hi ka hmu a.
8. Chu nu chengna kotthler chu hrawin,A in tieng chu a pan a;
9. Unau hmel hai lai hi a na,Thimin a hung nang mek a.
10. Nawchizor thuoma inchei,Lungril vervek tak put mi,Nuhmeiin a'n tuokpui a.
11. Nu zakmaw huoisar a na,Inah a'n khum ngai naw a,
12. Kotthler le tuolzawla dam,Kil tinah mi a'n chan hlak.
13. Tlangval chu kuoin a fawp a,Hmai intimna hrim nei loin,Tlangnel takin a kuomah,
14. "Voisun inthawina ka'n hlan a,Ka thu tiem khom ka hlen tah.
15. Chuleiin, nang hmu dingin,Ka hung a, ka zong che a,Ka hmu ta che a ni hi!
16. Aigupta patzaia khawng,Khumpha mawi tak ka pha a,
17. Beraw, aloi, thingzungthak,Rimtuiin khum ka chul a;
18. Hung rawh, zing khaw var chenin,Hmangaina tuitling dawnin,Hmangaina nun chen ei tih.
19. Ka pasal inah a um naw a,Ram hla taka inzin a nih.
20. Tangka ip sip a chawi a,Thla lir hma chu hung naw nih" a ta.
21. A kam thlumin a lem hne a,A kam nalin a zawl thluk a.
22. Chuongchun a zui ta nghal a:That dinga bawngchal an kei angin,Sakhiin chang a sir chim a,
23. Thalin a lung a dawt tlang a,Vaten a thipui ding hre der loaChang a baw ang el hi a nih.
24. Tu hin ngai ro, ka nauhai,Ka thu suok hi bengkhon ro.
25. Nuhmei tieng chun ngha naw unla,A lampui tieng invak lut naw ro.
26. Mi tam tak a suksiet tah a,Sukhlum khom a hau ta hle.
27. A in chu Seol panna lam a na,Chu chun thina pindan a sun.

  Proverbs (7/31)