←  Proverbs (4/31)  →
1. Ka nauhai, in pa zirtirna hi ngaithla unla,Hre thiem dingin ngaiven tha ro.
2. Inchuktirna tha ka pek cheu hi,Ka zirtirna nghatsan naw ro.
3. Ka pa inah tlanglakte ka ni lai,Ka nu nau mal duot ka nih.
4. Hieng hin ka pa'n a mi zirtir a:"Lungrilin ka thuhai hi vong zing la,Ka thupekhai zawm la, hringpui i tih.
5. Varna nei la, hrietthiemna nei rawh;Ka thuhai hi theinghil naw la,Petsan ngai hrim hrim naw rawh.
6. Varna nghatsan ngai naw la,Humhim a ti che a;Ngaina rop hlak la,Veng zing a ti che.
7. Varna nei hi a poimaw tak a,Chuleiin, varna nei rawh;Thil dang ieng po nek khomin,Hrietthiemna lungvar chu thlang rawh.
8. Ngaihlu la, chawisang a ti che,Pom la, chawimawi a ti che.
9. Tonlairang intontir a ti che a,Lallukhum ropui inkhumtir a ti che.
10. Ka naupa, ka thu ngaithla la,Ka thu hril che hi pom tlat la,Chuongchun dam sawt phang i tih.
11. Varna lampui ka kawkhmu che a,Lam ngilah ka thuoi che hi.
12. I pheikhai sukzang a ta,Tlan rak la khom tlu naw ti nih.
13. Ka zirtirna hi chel tlat la,Inthlada ngai der naw rawh;Vong tlat rawh, i hringna a nih.
14. Mi rilohai lampui sir naw la,Mi suolhai lampui hraw naw rawh.
15. Pumpel la, hraw naw rawh,Nghatsan la, i lam hrawa chun fe rawh.
16. Suol thaw lo chun an in thei naw a,Mi an sukthluk hma khat chu,An imu hrim a suok thei nawh.
17. Ritlona hi an bu ring a na,Nunrawngna hi an uoiin a nih.
18. Mi felhai lampui ruok chu,Zing ni zung ang hi a na,A hung eng zuol deu deu a,Nisa a hung suok ang hi a nih.
19. Mi suolhai lampui ruok chu,Thim sa tak ang hi a na,An insuina khom an hriet nawh.
20. Ka naupa, ka hril hi ngaiven la,Ka thuhai hi ngaithla ngun rawh.
21. Hmu phak loah inthla naw la,I lungrilah vong tlat hlak rawh.
22. A hmutu ta di'n hringna a na,A taksa ta di'n hriselna a nih.
23. Thil dang po po nek khomin,I lungril veng fimkhur rawh,Hringna hnar a ni si a.
24. Tong chaltlai hmang ngai naw la,Thu porche hril bansan rawh.
25. Hma tieng tlun takin en la,I hma zawn bi ngar ngar rawh.
26. I lampui ding en ngun la,I kalchawi khom tluong a tih.
27. Voi tieng chang tieng pet naw la,Suol lakah i ke veng tha rawh.
←  Proverbs (4/31)  →