← Proverbs (29/31) → |
1. | Zil rop khoma ring la sukkhong tlattu chu,Sukdam ruol loa suktliekpek thut la ning a tih |
2. | Mi felin lalna an chang pha mipui an lawm a,Mi riloin ro an rel pha mipui an inrum. |
3. | Varna dittu nau chun a pa a sukhlim a,Nawchizor inkoppuitu chun a suktlaran hlak. |
4. | Roreltu indik lal chun ram a suknghet a,Thamna ngainatu ruok chun a suksiet hlak. |
5. | Tuolbawm inpak der ching mi chun,A'n awkna ding len chang a kam a nih. |
6. | Mi tha lo chu a suolnan a awk a,Mi fel ruok chun hlim takin hla a sak. |
7. | Mi fel chun retheihai chan a hriet thiempui a,Mi rilo ruok chun a hriet thiempui ve nawh. |
8. | Hmusittuhai chun khuo an chokbuoi a,Mi felhai ruok chun an thawi dam hlak. |
9. | Mi varin mi invet a khing chun,Mi invet eltam hrang ri chun,Tawp zai reng a rel ngai nawh. |
10. | Thisen insuo mihan mi indik an theida a,Mi ngilhai sukhlum dan an zong hlak. |
11. | Mi invet lungsen chu a'n hrawt hrep a,Mi var ruok chu a'n khap dei hlak. |
12. | Roreltuin thukhel a dondai chun,A thoktu po po mi rilo an inchang hlak. |
13. | Pasie le a neksawrtu inthuhmunna chu,LALPAN hmu theina mit a pek ve ve hi a nih. |
14. | Pasiehai chunga indik taka roreltu chu,A lalna suknghet ni zing a tih. |
15. | Thununna hmol chun varna a'n tlun a,Thunun lo nau chun a nu a sukmuolpho hlak. |
16. | Mi rilo an inlal pha bawsietna khom a pung a,Mi felhai ruok chun an tluksiet hun la hmung an tih. |
17. | I nau i thunun tha chun hadam i ta,I lungril suklawmtu ning a tih. |
18. | Hmulawkna a um nawna hmuna chun,Mipui an inthlada hlak a,Dan zawmtuhai ruok chu an hamtha hlak. |
19. | Siehlaw chu hril chaua thunun thei a ni nawh,Hre thiem khom ni sien, uksak naw nih. |
20. | Nuompawnga tong puot puot mi nekin,Mi invetin beisei ding a la nei lem. |
21. | A chin laia inthoka siehlaw duot suol chun,A tawpah ro chen hung inchu pei a tih. |
22. | Thinsie chun innghirnghona a chok suok a,Lunginrom chun suol a thaw rem rum hlak. |
23. | Mi chapo chu a chaponain a hnuk hnuoi a,Lungrila inngaitlawm chun chawimawi a hlaw hlak. |
24. | Rukru inkoppuitu hmelma chu ama a nih,Thudik hril dinga intiemkam siin a hril ngam nawh. |
25. | Mihriem tina chun chang angin mi a awk a,LALPA-a innghattu ruok chu a him hlak. |
26. | Mi tam takin lal ditsakna an zong a,Indik taka roreltu chu LALPA a ni lem si. |
27. | Mi felin mi ringum lo a ten a,Mi riloin mi indik a ten bok. |
← Proverbs (29/31) → |