←  Proverbs (26/31)  →
1. Nipui laia vur tlak le busik huna raw sur chu,Thil inhme lo a ni ang bokin,Mi invet le chawimawina hi thil inhme lo a nih.
2. Chongzong vuong kuol le peleu inleng angin,A san boa tongsie inphur chu a'n leng kuol hlak.
3. Vuokna hruol chu sakor ta ding a na,Thirbar chu sabengtung ta ding a na,Hmoltum chu mi invet ruongzanga ding a nih.
4. Zawna invet tak tak i don pei chun,A zawna indontu anga invet ni veng i tih
5. Invet chu a'n vet dan ang chauhin don rawh,Chuong naw chun varah inngai hlauh rawi a tih.
6. Mi invet zuolkoa tirtu chu,Mani ke tan bong a,Nunrawngna tui dawntu ang a nih.
7. Thuvar hi mi invet baua ding chun, Ke zeng then ang mei mei a nih.
8. Chawimawina mi invet inkhumtir chu,Saihlia saihlum khit de ang a nih.
9. Thuvar hi mi invet baua ding chun,Zurui kuta hling lut ang a nih.
10. Mi invet le mi lenglak sor hlaktu chu,A hmu hmu kap hliem hlak thal kaptu ang a nih.
11. A luoka bok kir nawk hlak ui angin,Invet chun thil invet a thaw non rop hlak.
12. Var si loa vara inngai nekin,Mi invet chun beisei ding a la nei lem.
13. Thabo chun, "Lampuiah keipui a um,Kotthlerah keipui a'n vak" a ti hlak.
14. Kotkhar chu kopzaa inthlung a ni angin,Mi thabo khom a khum leh an inmat hlak.
15. Mi thabo chun buthleng a pur a,Bu beng dingin kut a hlang pei si nawh.
16. Fimkhur taka thu hril hlak mi pasari nekin,Mi invet chun var lem daiah a'n ngai.
17. Lam laka mi buoinaa inroltu chu,Ui tuol leng lai naa lo mantu ang a nih.
18. Mi invet, thingthu hringa mi nor a,Thi theina thala mi kaptu chu,
19. Mani tuolbawmhai hlem a,"Ka fiemthu a nih" titu ang char a nih.
20. Thingthu bo chun mei a rem ang hin,Inlawt tuo a um nawnaah inhal a re hlak.
21. Meihol a tam leh mei a'n ling tha a,Thing a tam leh mei a chok tha ang bokin,Inhal hmang tamnaah buoina a pung hlak.
22. Inlawt indem hi bu inhnik tak ang a na,Mihriemin ei dol lut zung zung el hlak.
23. Hmur thiem, lungril suol put si chu,Dar tuia pil bel zut tlet ang a nih.
24. Mi vervekin theidana a pai ruk chu,Tongkam thain a thup thiem hlak.
25. Thu hril thiem hle sien khom awi naw rawh,A lungrilah tirdakum pasari a pai si a.
26. A theidana chu hlemna thuin thup sien khom,A ritlona chu tlang hrieta phor lang ni tho a tih.
27. Tlakkhur chotu chu ama khur choa chun tlang a ta,Lung inhlumtu chu a chungah hung inhlum let a tih.
28. Lei khelhlip chun a'n hliemhai chu a theida a,Inpak derna hmur chun sietna a'n tlun hlak.
←  Proverbs (26/31)  →