←  Proverbs (23/31)  →
1. Roreltu leh thlaithleng i kil changin,I hmaa um kha en fimkhur la,
2. Tam taluoa i beng tuom tuom chun, I hnuk le chemte i chuktuo ang ning a tih.
3. Indawhana ruoi el a ni thei ti hre zingin,A'n hnikna ngot chu hnot naw rawh.
4. Hausak tum leiin insuk-kulcho naw la,Insum dan chintawk hre dingin var rawh.
5. Hausakna chu i hmu vuoi a, a bo nawk dai a,Mupui thla put ve ang elin van tiengA vuong hmang nawk thut hlak a nih.
6. Mi tiksie inah bu fa ngai naw la,Thil inhnik a neihai chu inhnar naw rawh;
7. A seng zat ding ngot sut mi a na,e "Fain dawn teuh rawh" ti sien khom,A lungrilin a ngai poimaw naw che.
8. I fak tah tlawmte khom inluok suokin,Inpak thlawn pal hlauh rawi i tih.
9. Mi invet chu ieng khom hril naw rawh,I thu varhai chu iengah ngai naw nih.
10. Pipu ramri lungphun son naw la,Fahrahai ram nek ngai bok naw rawh,
11. Anni Humtu chu a hrat a,Anni chu tan a ta, khing a ti che.
12. A zirtirnaah i lungril innghat la, Hrietna thu tieng i na daw rawh.
13. Naupang thununah intim naw rawh,Hmola i vuok leiin thi naw nih.
14. Hmol hmangin hrem la,Seola inthokin a thlarau san suok i tih.
15. Ka naupa, i lungril a var chun,Ka lungril lawm takzet a tih.
16. I bauin thu indik a hril chun,Ka thlarau lawm takzet a tih.
17. I lungrilin mi suolhai inhnar naw la,LALPA tina tieng thahnem ngai pei lem rawh.
18. Chuongchun, hma tieng beisei ding nei i ta,I beiseina chu thlawn ngai hrim hrim naw nih.
19. Ka naupa, ngaithla la, var rawh,Lampui indikah i lungril sie tlat rawh.
20. Uoiin he mi chu inkoppui naw la,Sa he mihai lai inzel bok naw rawh;
21. Inrui hmang le hnukrawlhai chu rethei an ta,Inrui muchukhai chun zakaw tiek hak an tih.
22. A hringtu che i pa thu zawm hlak la,I nu a hung tar pha hmusit naw rawh.
23. Thu dik inchaw la, zor ta naw rawh;Varna, inkeithuoina le hrietthiemna hai inchaw rawh.
24. Nau fel neitu chu nasa takin a hlim a,Nau var neitu chu a nau chungah a lawm hlak.
25. I chungah i nu le pa lawm hai sien,A hringtu che chu hlim raw se.
26. Ka naupa, i lungril mi pe la,Ka lampui chauh bi ngar ngar rawh.
27. Nawchizor chu tlakkhur inthuk tak ang a na,Nuhmei suol chu tuikul inchep tak ang a nih;
28. Suomhmang angin mi an inchan a,Pasal ruol lai bawsietna an sukpung.
29. Tu am chungpik, tu am lungngai,Tu am buoina nei, tu am thubuoi nei,Tu am tul loa hliem tuor hlak,Tu am mit meng sen rum hlak chu?
30. Sawt tak tak uoiin inthung chila,Uoiin chokpol dawn hlakhai chu an nih.
31. Noa uoiin sen phul sar sar el,An lem khiet khiet lai dam chu,A en khom en ngai naw rawh.
32. A tawpah rul angin mi a chuk a,Rulngan tur angin mi a fang hlak.
33. I mitin thil mak tak tak hmung i ta,Thil inzom lo tak tak ngaituong i ta,
34. Tuipui insok chunga zal ang leLong ngul lera inthen inthen,Long inrui ang el ning i tih.
35. "An mi loka chu a na nawh,An mi vuoka chu ka hriet si nawh!Ieng tik am kei hi tho harin,Dawn ding ka hmu thei ding chu aw?" ting i tih.
←  Proverbs (23/31)  →