← Proverbs (2/31) → |
1. | Ka naupa, ka thuhai hi pom la, |
2. | Varna tieng i na daw la,Hre thiem dingin i lungril pe rawh. |
3. | Thu ril hriet theina chu zong la,Hriet thiem theina hni hlak rawh. |
4. | Tangkaruo anga zonga,Ro phum ruk anga i dap chun, |
5. | LALPA ti nachang hung hre-in,Pathien hrietna man suok i tih. |
6. | Varna petu chu LALPA a na,Hrietna le hmu fuk theina chu,Amaa inthoka suok a nih. |
7. | Mi ngilhai ta dingin hlawtlingna,A lo sek khawmpek hlak a,Indik taka kalchawituhai ta din,Ama chu an phaw a ni bok. |
8. | Mi indikhai kalchawi a vengpek a,Ama ringtuhai lampui a hum hlak. |
9. | Chuongchun, thil fel, indik le inlai,Lampui tha tinreng hung hrieng i tih. |
10. | Varna chu i lungrilah hung lut a ta,Hrietna chun i nun sukinhoi a tih. |
11. | Fimkhur thiemnan enkai a ti che a,Hrietthiemna chun veng a ti che. |
12. | Mi rilohai lampuia inthok le Thu teplo hril hmanghaia inthokin,Varna chun san suok a ti che. |
13. | Anni chun lam ngil petsanin,Lampui inthimah an lut a; |
14. | Thil tha naw thaw an hlimpui a,Suol hem kawia um an lawm bok. |
15. | An lampuihai a kikawi a,Suol tieng awn tlat mi an nih. |
16. | Kam thluma lawithlemtu che,Nuhmei suol lakah veng a ti che; |
17. | Pathien hmaa a thu tiem ngainep a,A vang lai koppui lersantu a nih. |
18. | A in tieng pan chu thina a na,A lampui chun mithi khuo a sun. |
19. | A in pantuhai chu tu khom,An hung kir nawk tah ngai naw a,Hringna lam an paw ta ngai nawh. |
20. | Mi thahai lampui chu hraw la,Mi felhai lampuiah kal chawi rawh. |
21. | Mi ngilhai chun ram hluong an ta,Dem kai lohai chu cheng zing an tih. |
22. | Mi rilohai chu sat thlak ning an ta,Phatsantuhai chu phawi hmang ning an tih. |
← Proverbs (2/31) → |