← Proverbs (18/31) → |
1. | Mal tla mi chun mani hma chauh a siel a,Thurawn tha khom a tai vong hlak. |
2. | Mi invet chun hrietna a ngaina naw a,A ngaidan khukpui chauh a hlimpui hlak. |
3. | Ritlona chu muolphonan a zui hlak a,Muolphona khom inzaknain a zui hlak. |
4. | Mihriem bau suok chu li inthuk ang a na,Varna tuikhur chu tui luong hok hok ang a nih. |
5. | Mi rilo chunga hlei nei a tha naw ang bokin,Poi tawk lo thiem naw inchangtir a tha nawh. |
6. | Mi invet hmur chun inhalna a chok dok a,A bau suok chun vuok a'n tuortir hlak. |
7. | Mi invet chun a bau a sietpui a,A hmur chu a ta dinga chang a nih. |
8. | Inrel hi bu inhnik tak ang a na,A dolin ei dol thlak zot zot hlak. |
9. | Sinthawa inthlada mi chu,Suksetu leh unau bul an nih. |
10. | LALPA hming chu kulbing nghet a na,Mi fel chu a tlan lut a, a him hlak. |
11. | Mi neinunghai kulpui chu an hausakna a na,Lung bang insang tak angin an inngai hlak |
12. | Lungril chapo chu sietna leh an intlon a,Inngaitlawm chu chawimawinan a som hlak. |
13. | Ngaithlak hmaa mi don chu,Thil invetthlak le muolphona a nih. |
14. | Nat khom mi'n tuortir theitu chu lungril a na,Lungril hliem chu tuin am tuor thei tang a ta? |
15. | Lungvar nei chun hrietna a khawl khawm a,Mi var na chun hrietna a zong hlak. |
16. | Thilpek chun a petu hma a sukkawpek a,Milien khom olsam taka paw theina a nih. |
17. | Mi dang hunga an hung khing let hma chun,Thiem thu hril hmasatu chu indikin a'n lang hlak. |
18. | Thum vawrin inkhingna a rem a,Inkhing bur bur khom a kei the hlak. |
19. | Unau suknuor chu kul nghet nekin hne an tak lem a,Inhal chu thir tluona kul kotkhar kalh ang a nih. |
20. | I bau suok dungzuiin khop i ta,I hmur suok ra zirin tlai i tih. |
21. | Lei hin damna le thi theina a pai a,I hmang dan angin a ra sik i tih. |
22. | Nuhmeia nei ding zong hmutu chu thil tha hmu a na,LALPA ditsakna a dong hlak. |
23. | Mi rethei chun rienginko takin thu a hril a,Mi hausa ruok chun chaltlai takin a lo vin hlak. |
24. | Ruol tha dai sawt lo um hai sien khom,Unau neka inhnaipui lem ruol an um hlak. |
← Proverbs (18/31) → |