← Proverbs (11/31) → |
1. | Bukna indik lo hi LALPA theida zawng a na,Buk lung indik hmang hi a lawmzawng a nih. |
2. | Chapona chu muolphonan a zui a,Inngaitlawmna chu varnan a zui hlak. |
3. | Mi indikhai chu an ringumna'n a thuoi a,Mi depdehai chu an verveknan a awk hlak. |
4. | Lungsenna nia dingin,Hausak ieng khomin thu a phur nawh,Sienkhom indikna ruok chun,Thinaa inthokin a san suok hlak. |
5. | Mi indikhai chu an indiknain,An lampui a suktluong hlak a,Sienkhom mi rilohai ruok chu,An ritlonain a buk thluk hlak. |
6. | Mi ngilhai chu an indikna'n a san him a,Mi depdehai chu chakna suolah an inawk hlak. |
7. | Mi rilo chu a thi ruolin,A beiseina khom a boral nghal a,Thaw thei dinga a hisaphai khom,Iengma lo an hung inchang hlak. |
8. | Mi fel chu buoina laka humin a um a,Mi rilo chungah buoina chu a tla hlak. |
9. | Pathien ngaisak lo mi chun a bauin,A tuolbawmhai a suksiet hlak a;Mi fel ruok chun hrietna hmangin,Sietna chu a pumpel hlak. |
10. | Mi felhai an hmuingil pha,A khaw nawtin an hlim hlak a;Mi rilohai an thi pha leh,Lawmna ri a so vel hlak. |
11. | Mi indik malsawmna dong chun,A khaw pumpui a chawimawi a,Mi rilo bau suok ruok chun,A khaw nawtin a deng siet hlak. |
12. | Tuolbawmhai deusawtu chun,Varna a tlasam a nih,Hrietthiemna neitu ruok chun,A bau a veng tha lem hlak. |
13. | Bau tamin thuruk a ip thei naw a,Mi ringum ruok chun a vong tlat hlak. |
14. | Inthuoina tha um nawnaah,Ram le hnam a tlu se hlak a,Remruot thiem an tamnaa chu,Hnena an chang ngei ngei hlak. |
15. | Mi dakhama insietu chun tuor a ta,Inthier fihlimtu ruok chu him a tih. |
16. | Nuhmei felin inza a phur a,Nu lepchie chu inzapui a um.Mi zomthaw chu a hung pasie a,Mi hrat chu a hung hausa hlak.a |
17. | Mi ngilneiin a ngilneina a sor a,Mi tawrotin ama buoina a siem hlak. |
18. | Mi rilo chun hlaw indik lo a lak a,Felna tutu chun lukhawng a dong hlak. |
19. | Felna chel tlattu chu hring a ta,Suolna hnot tlattu chu thing a tih. |
20. | LALPAN lungril kawi a theida a,Soisel boa khawsahai ruok chu a lawm. |
21. | Mi rilo chun hrem pumpel naw top a ta,Mi fel ruok chu san suokin um a tih. |
22. | Fimkhur nachang hre lo nu hmel tha chu,Vok hnara rangkachak kuol inbuntir ang a nih. |
23. | Mi fel ditzawng chu thil thain a tawp a,Mi rilo beisei chu lungsennain a tawp. |
24. | Phal taka pek chu a tam lem hmuna a na,Mamaw bak kompui chu tlakranna a nih. |
25. | Mi tiktlai chu hmuingil a ta,Tuia chawmtu chu tuia chawm ve ning a tih. |
26. | Hlawkna hnot leia bu inrotu chu,Mihaiin tongsie inphur an ta,A pe suok nuomtu ruok chu,Malsawmna vurin um a tih. |
27. | Thil tha zongtu chun ditsakna a dong a,Thil suol zongtu chun thil suol a tong hlak. |
28. | Hausaknaa innghattu chu tlung a ta,Mi fel chu hna hring angin inthang no a tih. |
29. | Sungkuo chokbuoitu chun thli chauh sik a ta,Mi invet chu mi var siehlawah thang a tih. |
30. | Felna ra chu hringna a na,Nunrawng chu thina a nih.b |
31. | Mi felin hnuoiah lawmman a dong chun,Pathien hre lo le mi rilo lem chun,Hremna a va hang tuor chieng awm de! |
← Proverbs (11/31) → |