Proverbs (1/31)  

1. Israel lal Davida naupa Solomon thuvarhai chu:
2. Varna le inchuktirna tha dong theina ding le thu inril hriet thiem theina ding dam,
3. Var taka khawsak dan dam, indik tak le thlei bik nei loa ro rel thiem theina ding dam,
4. Mi mawlhai sukvar a, hrietna le fimkhur taka remruot thiemna thalaihai pe ding dam,
5. Mi varhan ngaithla a, hrietna an sukpungna ding dam, hrietthiemna nei mihaiin thuoitua an hmang theina ding dam,
6. Thuvar hai, tekhinthu hai, mi varhai thu le hla khirh hai an hriet thiem theina ding damin.
7. LALPA ti hi hrietna tobul a nih,Mi invethai ruok chun varna le inchuktirna chu an hmusit hlak.
8. Ka naupa, i pa zirtirnahai che hi ngaithla la,I nu inchuktirna khom nghatsan naw rawh.
9. I lu cheimawitu tonlairang ning a ta,I ring mawitu thi ni bok a tih.
10. Ka naupa, mi suolhai zawr thlukin um naw rawh.
11. "Hung rawh, thisen insuo dingin,Anni chu inchan ei ta,Poi tawk lohai chu lambun ei ta,
12. Thlan ang elin anni rawi chu,A hring pumin dol vong ei tih,Khuorkhuruma tlahai ang elin;
13. Ro hlu tam tak hmung ei ta,Ei thil rokhaiin ei inhai sungsip ei tiu;
14. Keini tieng hin hung thang la,Poisa bawm intawm ei tiu"Tia an zawr che khomin,
15. Ka naupa, anni lai thang ve naw la,An lampui hraw ve naw rawh.
16. Thil suol hnotin ke an pen a,Thisen insuo dingin an kut a tuonrang.
17. Vatehai hmu lai zing a,Len chang kam chu a hlawk nawh.
18. Chuong mihaiin an inchan chu,Anni thisen bok a na,Mani inlambun an nih.
19. Hlawkna indik lo hnottuhai chu,Chuong ang chu an tawpna a nih,A neituhai hringna ngei a lakpek hlak.
20. Kotthler le tuolzawla hai,Varna chun tlang a'n sam a;
21. Kotthler lun lai a khek a,Khawpui kotsuoah thu a hril:
22. "Mi mawlhai, ieng chen top am,In la mawl zing ding a na?angni varna deusawtuhai,Ieng chen am in deusaw ding?
23. Ka zilna cheu ngaithla unla chu,Ka lungril nangni tieng hongin,Ka thu ka hril ding cheu a ni bah!
24. Kuta huiin ka ko cheu a,In mi uksak nuom si nawh.
25. Ka thurawn la nuom lo a,Ka zilna in pom naw leiin,
26. Siet in tuok pha leh innui ka ta,Vangduoinan a tlakbuok pha cheu,Ka nuisaw ve ding cheu a nih;
27. A nih, thlipui anga a nuoi pha cheu,Thawngaleivir anga a lak pha cheu,Lungngai buoinan a chim pha cheu,
28. Mi ko in ta, don naw ning cheu;Mi zong in ta, mi hmu naw ti niu.
29. Hrietna chu in theida a,LALPA in ti nuom naw a,
30. Ka thurawnhai pom nuom lo a,Ka zilnahai in hmusit leiin,
31. In nun ra chu fa tang in ta,In remruot chun insukkhop in tih.
32. Mi mawlhan an mawl invaina,An la thipui ding a na,Invethan an ngai sukngamna,An la sietpui bok ding a nih.
33. Ka thu ngaitu chu him a ta,Sietna hrim hrim ti ve loin,Lungmuong takin khawsang a tih.

      Proverbs (1/31)