←  Philippians (4/4)    
1. Chuleiin, ka unau dittak le ka ngai em em, ka lawmna le ka lallukhumhai, chuong ang chun Lalpaah ngir nghet ro aw, ka ruol dittakhai!
2. Lalpaa chun lungril hmun khat put dingin Eudi le Suntuki khom ka ngen.
3. A nih, nang, ka ringkol batpui ringum tak,c khang nuhmeihai kha thangpui dingin ka ngen che; anni khan Klemen le Hringna Bua hming chuong danghai leh, Chanchin Tha rongbawlnaah an mi thawpui nasa hle a nih.
4. Lalpaa chun lawm rop ro, ti non ka tih, lawm ro.
5. In dawtheizie mi po poin hre raw hai se. Lalpa chu a hnai zing.
6. Ienga khom lungzing naw unla, iengkimah lawmthu hrila tongtaiin in mamawhai chu Pathien kuomah intlun ro.
7. Chuongchun, Pathien thlamuongna, mihriem hriet seng ruol lo chun in lungril le ngaituonahai chu Krista Isua chun vengpek a ti cheu.
8. A tawp taka chun unauhai, thil indik le inzaum taphot dam, a fel le inthieng taphot dam, ditum le inthangmawi taphot dam, thil tha chungchuong le inpak tlak thil taphot dam chu ngaituo hlak ro.
9. Ka kuoma inthoka thil in inchuk le donghai, in thil hriet le hmuhai kha thaw pei ro. Chuongchun, thlamuongna Lalpa chun umpui a ti cheu.
10. In mi ngaituozie tu lai hnai elah in hung inlangtir nawk thei leiin Lalpaa chun ka lawm takzet a nih. In mi'n voi hle ti ka hriet a, chu chu remchang in la hmu hri el naw leiin a hma khan in la'n entir naw mei mei a nih.
11. Hi thu hi ka tlaksam leia hril ka ni nawh; ieng ang khomin um lang, lungawi taka um dan ka'n chuk ta si a.
12. Rethei taka um dan ka thiem a, hausa taka um dan khom ka thiem bok a; iengkimah khop le tama um dan, hausa le retheia um dan thuruk ka'n chuk tah.
13. Mi sukhrattu Krista zarin iengkim ka thaw thei.
14. Ieng khom ni sienla, ka harsatnahai in mi lo phurpui hi in thaw tha ngot el.
15. Chun, Chanchin Tha ka hril tan laia Makedonia ka suoksan hnung khan nangni Filipi kohran chauh naw chu kohran dang tu khom thilpek le dong thuah mi ngaituopui an um nawh ti in hriet tah kha.
16. Thesalonika khuoa ka um lai khom khan ka tlaksamna phuhruk dingin thilpek in mi hung thon rop hlak kha.
17. Thilpek ka zong naw a, in chan sukvawngna ding ka zong lem a nih.
18. In thilpek po po ka lo hmu kim bakah Epafrodita kuta in thil hung thonhai khom ka lo hmu leiin ka burip ta khop el. Hieng hi rimtui thilhlan, Pathien lawmzawng le pom tlak chu a nih.
19. Ka Pathien chun Krista Isua a hausakna ropui taka inthokin in mamaw tinreng peng a ti cheu.
20. Ei Pathien le ei Pa chu chatuonin ropui raw se. Amen.
21. Mi thienghlim po po Krista Isu hmingin chibai ka buk cheu. Ka kuoma unau umhai hin chibai an buk cheu.
22. Mi thienghlim po poin chibai an buk cheu a, Kaisar ina umhai hin an buk deuh bik cheu. Ei Lalpa Isu Krista lunginsietna chu in thlarau kuomah um raw se.
23. (A um nawh)
←  Philippians (4/4)