Philippians (3/4)  

1. A tawp taka chun unauhai, Lalpaah lawm ro. Thu pangngai bok in kuoma ziek hi ka ta dingin thil nghokum a ni nawh, nangni invengna dingin a tha bok si a.
2. Thil tha naw thawtu uicho ruol, sertan uorhai laka chun inveng fimkhur ro.
3. Pathien Thlarau zara Pathien chawibiektu le Krista Isu suonga puo tieng thila innghat ve nawtu einihai hi sertan indik tak chu ei ni lem.
4. Nuom lang chu kei khomin puo tieng thil chu ka suong ve thei tho annawm. Miin puo tieng thil suong theia an inngai chun kei lem chun inngai nawkzuol ka tih.
5. Ni riet nia sertan, Israel thlaa mi, Benjamin chia mi, Hebrai nu le pa kara inthoka pieng, Dan zawm tieng chu Farisai,
6. thahnemngaina tieng hlak kohranhai suknomnatu ka na; Danin a phut ang felna tienga khom soisel bo ka nih.
7. Nisienlakhom, tu hin chu chuong ang thil, ka ta dinga hlawkna taphot chu Krista leiin kiemnaah ka tiem ta vong a nih.
8. Chu chauh chu a ni lem, iengkim neka hlu lem ka Lalpa Isu Krista hrietna le bukkhi chun iengkim hi hnephnawlah ka ngai a; Krista chu ka nei theina ding le ama leh pum khat kan ni theina dingin, ama leiin iengkim ka chan tah a;
9. Dan zawm lei ni loin Krista ka ring leiin thiem ka chang tah a, chu chu ringna leia Pathien hmaa thiemchangna chu a nih.
10. Ka thil hlut sun chu Krista hriet dam, a thonawkna thilthawtheina chang dam, a tuorna ang tuor ve dam le a thina intawmpui dam hi a nih.
11. Chuongchun, mithi thonawkna nia chun keitho ni ve ngei ka tih.
12. Hieng thilhai hi chang tah le siem famkima um tah inti ka ni nawh; Krista Isu mi man san chu hlen ngei tumin hma tieng ka nor pei a ni lem.
13. Unauhai, thangsuo taah ka'n ngai der nawh. Amiruokchu, thil pakhat ka thaw hlak chu hi hi a nih: Hnung tieng thilhai chu theinghilin hma tieng thilhai chu ka hnot tang tang a,
14. Isu Krista zara lawmman hmu dinga chung tienga Pathien mi kona chu chang ve ngei dingin, tum ram tieng chu ka pan ngat ngat a nih.
15. Eini puitling chin tahai lem chun chuong ang lungril chu put ei tiu. Chun, kong thenkhatah in ngaidan a danglam a ni khomin, chu chu Pathienin chieng takin la'n hriettir a ti cheu.
16. Ieng khom ni sien, tuta ei phak chin po bek hi ei nunah la sukdik phot ei tiu.
17. Unauhai, ka um dan inchuktuhai ni pei ro; um dan ding kan hril cheu anga khawsahai chu enton takah hmang ro.
18. An khawsak danah Krista kraws hmelma tam tak an um ti ka hril rop tah cheu kha, tu khom hin mitthli pumin ka hril non nawk cheu a nih.
19. Chuonghai tawpna ding chu sietna a nih. An pathien chu an phingpui a na, an ropuina chu an inzakna bur a na, khawvel thil ringot an buoipui hlak.
20. Eini ruok chu van khuo-le-tui ei na, vana inthoka ei sandamtu Lalpa Isu Krista hung nawkna ding chu nghakhla takin ei thlir a nih.
21. Iengkim a thu hnuoia sie theitu chun ei taksa tlawm tak hi ama taksa ropui anga um dingin a thilthawtheina chun a sukdanglam ding a nih.

  Philippians (3/4)