←  Philippians (2/4)  →
1. Krista le in inzomnaa inthokin nangniah phurna dam, a hmangainaa inthokin thlamuongna dam, Thlarau hmun khata inpawlna dam, inlainatna le inlunginsietna dam in nei am?
2. In nei chun lungril hmun khat puta inhmangai tuoin, thlarau le thiltum hmun khat nei unla, ka lawmna sukkim ro.
3. Mani tanghma siel tak le inngaihlu taka ieng khom thaw loin, tu khomin inngaitlawm takin mani nekin mi dang tha lemah ngai raw se.
4. Mani hmakhuo chauh ngai loin mi dang thatna ding khom zong ro.
5. Krista Isu lungril ang put ro.
6. Ama chu niphung hrimah Pathien ni sien khom, Pathien tluka um chu tum tlat dingah a ngai naw a,
7. iengmalo anga insiein, siehlaw angin a'n siem a, mihriema hung piengin mihriem angin a hung um a,
8. a'n ngaitlawm a, thi chena thu zawmin, kraws-ah a hung thi a.
9. Chuleiin, Pathienin ama chu hmun chunghnung takah a chawi sang a, hming po poa hming chunghnung tak a pek a.
10. Chuongchun, Isu chawimawiin mi tin, vana mi hai, hnuoia mi hai, hnuoi hnuoia mihai a hmaah dingthathuon an ta,
11. Pa Pathien ropuina dingin mi tinrengin. 'Isu Krista chu Lal a nih' tiin puong an tih.
12. Chuongchun, ka dittakhai, ka um laia ka thu in awi ang khan tuta ka um naw kar khom hin in awi nawkzuol a tul a nih. Ti le inza tak pumin in sandamna chu thaw suok ro.
13. Ama ditzawng thaw tumna leh thaw theina nei dinga nangnia sinthawtu chu Pathien a ni si a.
14. Chier lo le sel loin iengkim thaw ro,
15. chuongchun tu lai ruolthar mi kawi le lungril piengsuolhai lai hin Pathien nau, dem kai lo, soisel bo le thienghlim le khawvel elvartu hung ni thei in tih.
16. Hringna thu chu inhlanb pei unla, chuongchun Krista Ni-a ka suong dinghai chu ning in ta, ka tlan thlawn nawzie le ka sawl thlawn bok nawzie suklangtu ning in tih.
17. Ringnaa in rongbawlna le in inthawinaa chun ka thisen hiel hi uoiin anga bun thlaka um ding ni sien khom, lawm ka ta, nangni khom lawmpui bok ka ti cheu.
18. Chuong ang bokin nangni khomin lawm unla, mi lawmpui bok ro.
19. In chanchin hre a, ka hlim theina dingin Lalpa Isun a remti chun in kuomah Timothe ka hung tir vak thei ka beisei.
20. Lungril taka keima anga in thatna ding zongtu chu ama chauh hi a nih.
21. Mi dang chu Isu Krista ta ding ngaituo loa mani tanghma zong vong an nih.
22. Timothe ruok chu a tangkaizie in hriet tah a, pafa ang topin Chanchin Tha rong kan bawl tlang hlak kha.
23. Chuleiin, ka chanchin ding ka hriet charin ama hi ka hung tir nghal ka beisei.
24. Lalpan rem a ti chun kei ngei khom ka hung vak ka ring.
25. Chun, ka unaupa, ka sipaipui le rongbawlpui, ka mamaw phuhruktu dinga in hung tir Epafrodita hi in kuoma hung tir kir tulin ka hriet.
26. In rengin a ngai em em cheu a, a nat thu in lo hriet khom kha poi a ti hle a nih.
27. Thihmun suola n� a ni hrim a, nisienlakhom Pathienin a lunginsiet a, ama chauh ni loin kei khom a mi lunginsiet a, lungngaina chunga lungngai nawkzuolna tuok loin a mi siem a.
28. Chuleiin, ama hi inhmu nawk phaa in lawmna ding le ka lungkhamna hi a re theina dingin ama hi ka hung tir inhawk zuol a nih.
29. Lalpa hmingin ama hi hlim takin lo lawm unla, hieng ang mi hi ngaihlu ro.
30. Nangniin kut ngeia in mi hung thangpui phak si naw leiin thi huomin Krista sin a thaw a, a thi pha vang nghe nghe a nih.
←  Philippians (2/4)  →