Philippians (1/4)  →
1. Paula le Timothe, Krista Isu siehlawhai chun Krista Isua mi thienghlim Filipi khuoa um po po le Kohran thuoituhai le rongbawltuhai chibai kan buk
2. Pathien ei Pa le Lalpa Isu Krista kuoma inthoka lunginsietna le inremna chu in kuomah um raw se.
3. Ka hriet suok po cheu leh ka Pathien kuomah lawmthu ka hril hlak.
4. Ieng huna khom in renga ta dinga ka tongtai changin hlim takin ka tongtai hlak,
5. Chanchin Tha hril rongbawlna ei tana inthoka tu chena mi thawpuitu in ni si a.
6. Nangni laia hi thil tha thaw tantu chun Krista Isu Ni-a a hlen suok chenin thaw pei a tih ti ka ring tlat a nih.
7. Chanchin Tha ta dinga thang ka lakna le suknghet sin ka thawna amanih le kol ka bun changa Lalpa lunginsietna mi'n tlangpuitu in ni leiin ka ngaituonaah in cham zing a, hieng ang lungril in renga chunga ka put khom hi thil awm tak a ni hrim a nih.
8. Krista Isu lungril ang putin ka ngai em em cheu a nih ti Pathienin a hriet.
9. In hmangaina chu hrietnaa dam le thil tinreng fie tak le inril taka hmu theinaa dam inthang liena a hung pung deu deu theina dingin ka tongtai hlak.
10. Chuongchun, thil tha bikhai chu thlang thiemin, Krista Ni-a chun thienghlim le soisel bo hung ni thei in ta,
11. Pathien ropuina ding le inpakna dingin Krista Isu zarah felna ra chun sungsipin um in tih.
12. Unauhai, ka chunga thil hung tlunghai kha Chanchin Tha sukdarna ding a lo ni ta lem hlauh ti in hriet ka nuom.
13. Ka kol bunhai hi Krista lei a nih ti lal in vengtuhaia le mi dang po po khomin an hriet tah.
14. Unau tam lem khomin ka kol bun leiin Lalpa an ring nghet sauh a, ti lo le huoisen takin thu an hril ngam tah.
15. Thenkhat chun thikna le elrelna leiin Krista thu an hril ve hlak a; thenkhat ruok chun ditsakna lungril putin an hril bok a.
16. A nuhnung pawl hin Chanchin Tha ka tan leia hung ka nih ti hrein, hmangaina leiin an hril a;
17. a hmasa pawl ruok hin chu mani tanghma kei zawngin, thaw tak tak loin, kol ka bun lai hin ka chungthu a rik zuol theina dinga buoina chok suok tumin, thu an hril thung a nih.
18. Sienkhom iem a poi a? A lem amanih a tak amania an hril khom ni sien, Krista thu hrila a um hrim hrim hi poimaw ka ti le ka lawm tak chu a nih, lawm pei bok ka tih.
19. In mi tongtaipekna lei le Isu Krista Thlarau thangpuina leiin ka chunga thil tlunghai hi a mi sansuoktuah hung inchang lem a tih ti ka hriet.
20. Ka duhthusam tak le ka beisei tlat chu, ienga khom sukmuolphoa um lo a, ieng huna khom, tuta tum ngei khom hin, ka dam amanih ka thi amanih khomin huoi taka um a, ka taksaa Krista ka chawimawi hi a nih.
21. Ka ta ding chun hring hi Krista a na, thi khom hlawkna a nih.
22. Dam pei lang tangkaina ka la nei ding a ni si leiin, a ieng lem am thlang ding bik ka hriet nawh.
23. Chamlakin ka um a, fe suoka Krista kuoma um chakna ka nei a, chu chu a tha lem hle a;
24. amiruokchu, nangnihai leiin ka la dam zing a tul bok si.
25. Ringnaa in renga in inthanglienna ding le in lawmna sukpunga a umna dingin ka la dam pei hi a tha lemin ka hriet tah.
26. Ka hung nawk pha chu keima leiin Krista Isua in lawmna luong liem a tih.
27. Ieng khom ni sien la, in um dan chu Krista Chanchin Tha leh inmawi phot raw se. Ka hung amanih ka hung naw amanih khoma thlarau hmun khata ngir nghetin, ringna hmun khat put unla, chuongchun, Chanchin Tha thuah in thang tlang ti le
28. a dotuhai cheu chu iengti kong khomin in ti nawh ti lo hre thei ka tih. Chu chu an la tlawm dingzie le san suok in la ni dingzie inchikna chieng tak ning a tih. Chu thawtu chu Pathien a nih.
29. Krista ring el chauh khom ni loa a ta dinga tuor dinga rongbawlna sin inhlan in nih.
30. Chu inbeina, ka tuok in hmu ta hlak le tuta ka la tuok zing in hriet hi, nangni khomin in tuok ve tah a ni hi.
      Philippians (1/4)  →