←  Numbers (9/36)  →
1. Aigupta ram an suoksana inthoka kum hnina thla hmasa taka chun Sinai thlalerah LALPAN Mosie a biek a,
2. "Israel thlahai chu a hunbi takah Fekan Kut inhmangtir rawh.
3. A hunbi takah, hi thla ni sawm le ni lina zan tieng hin nei in ta, chu taka thaw dan dinga bituk po po ang chun in thaw ding a nih" tiin a hril a.
4. Chuong anga Fekan Kut hmang ding chun Mosien Israel thlahai chu a hril a,
5. a ti angin Sinai thlalera chun thla hmasa tak ni sawm le ni lina thimbut chun an hmang a, LALPAN Mosie kuoma thu a pek ang takin Israel thlahai chun an thaw a.
6. Anni lai chun mi thenkhat, chu nia mithi ruong an nei leia inthieng lo le hmang thei lo an um a. Anni chu Mosie le Aron kuomah an hung a,
7. "Mithi ruong leia inthieng lo kan ni a, amiruokchu Israel thlahaiin a hunbi taka LALPA kuoma thilhlan an inhlan huna kan inhlan ve ding ieng leiin am in mi khappek ding a na?" an ta.
8. Mosie chun, "Nangni chungthua LALPA thupek ka hmu hmakhat chu lo nghak ro" a ta.
9. Chun, LALPA chun Mosie kuomah,
10. "Israelhai kuomah hieng hin hril rawh: Nangni le in thlahai lai tu khom mithi leia inthieng lo amanih, khuol inzin amanih an um hlauh chun Fekan Kut hi an hmang ve hrim hrim ding a nih.
11. Thla hnina, ni sawm le ni li thimbutah hmang an ta, beram sa chu chol thang lo bei le hna hring kha leh an fak ding a nih.
12. A zinga dingin ieng khom an sie ding a ni naw a, a ru an suktliek ding a ni bok nawh. Fekan Kut an hmang pha leh a hmang dan ding ang takin an thaw ding a nih.
13. Tu khom mithi ruong leia inthieng lo le khuol inzin lei ni si loa Fekan Kuta thang ve lo a um chun, LALPA kuoma a hunbi taka thil inhlan ding chu a'n hlan ve naw leiin ama chun a maw chu phur a ta, a chipuihai laia inthoka tuithlar ning a tih.
14. "Nangni laia khawsa ram dang miin LALPA Fekan Kut hi hmang ve a nuom chun a hmang dan ding ang takin hmang ve raw se. A rama pieng le ram dang mihai ta ding khomin dan thuhmun in nei ding a nih" tiin.
15. Biekbuk, Thuthlung Puon in an inngir ni chun, sumin a hung tuom mup a, biekbuk chunga chun mei chok angin zantienga inthokin zingkar chen a um a.
16. Chuong ang chun a um a, sum chun a tuom zing a, zana chun mei chok angin a'n lang a.
17. Sumin puon in chu a'n kiengsan pha leh Israel thlahai chu an inthok suok a, sum chu a ngirna hmun taphotah umhmun an khuor a.
18. LALPA thupek ang peiin Israelhai chu an inthok suok a, a thupek ang peiin umhmun an khuor a, biekbuk chunga sum a um sung po chu riebuk an son ngai nawh.
19. Biekbuk chunga sawt tak sum a um chang khomin, Israelhai chun LALPA thupek chu zawmin an fe son ngai nawh.
20. A chang chun sum chu biekbuk chungah ni sawt nawte a um a, LALPA thuin hmun an khuor a, chu zoah a thupek angin an inson nawk pei a.
21. A chang chun sum chu zantienga inthoka a tuk zingkar chen chauh a um a, zingkar a'n kieng pha an inthok suok nawk a. Sun ni sien, zan ni sien, sum chu an kieng pha leh an inthok suok el a nih.
22. Sum chu biekbuk chungah ni hni dam, thla khat dam le kum khat dam a um chun an cham zing a, a'n kieng pha an inthok suok chauh hlak.
23. LALPAN Mosie hmanga thu a pek ang taka LALPA thu chu zawmin, LALPA thupek angin hmun an khuor a, LALPA thupek angin an inthok suok hlak a nih.
←  Numbers (9/36)  →