Numbers (6/36)  

1. LALPA chun Mosie kuomah,
2. "Israelhai kuomah hieng ang hin hril rawh: 'Tu khom pasal amanih nuhmei amanih intiemkamna bik nei, LALPA ta dinga inser hrang dinga Nazarc thutiem nei lai chun inrui thei uoiin le zu dang hrim hrim a nghei ding a nih;
3. uoiin amanih thil danga inthoka siem zu thur hrim hrim amani le grep ra tui khom a dawn ding a ni naw a, grep ra tharlam amanih le grep ra inhro tawl amanih khom a fak ding a ni nawh.
4. Nazarin thutiem neia a'n ser hrang lai chun grep huona mi hrim hrim, a mu le a hawng takngiel khom a fak ding a ni nawh.
5. " 'Thu tiema a'n ser hrang sung chun a luah hmul vawna hrim hrim a hmang ding a ni nawh. LALPA ta dinga a'n ser hrang sung hun a kim hma chun insie hrang a ta, a sam a hla ding a nih.
6. LALPA ta dinga a'n ser hran sung po chun mithi ruong a hnai ding a ni nawh.
7. A nu le pa le a unauhai le farnuhai thi khomin a'n sukporche ding a ni nawh, Pathien ta dinga a'n ser hrangna chun a phuor leiin.
8. A'n ser hran sung po chun LALPA ta dinga ser thienghlim a nih.
9. " 'A bula mi an thi pal thut a, a'n ser hrangna a lu a sukporche chun, an thien ni, a nisarinaa chun a lu chu a vaw ding a nih.
10. A ni rietnaa chun Intuokna Puon in kotah vathu amanih parva tuoi amanih tuok khat thiempu kuomah a hung chawi ding a nih.
11. Pakhat chu suol thawina dingin thiempu chun inhlan a ta, pakhat chu mithi ruong leia suol a thawna laka inremna siempek dingin pumraw thilhlanah inhlan a tih. Chu ni ngei chun a lu chu a'n hlan thienghlim ding a nih.
12. Thiem naw inthawina dingin beram chal tuoi, kum khat mi hung chawiin a'n ser hrangna chu LALPA kuomah thaw tha nawk a ta, a hmaa a'n ser hranna kha sukporche a ni tak leiin tiem sa ve ni ta naw nih.
13. " 'A'n ser hrangna ni a kim phaa Nazar mi chunga thaw dan ding chu hieng hi a nih: Intuokna Puon in kotah thuoi ding a nih.
14. LALPA ta dingin beramchal kum khat mi soisel bo chu pumraw thilhlanah, beram la tuoi kum khat mi soisel bo chu suol thawina thilhlanah, beramchal soisel bo pakhat chu inremna inthawina thilhlanah inhlan a ta,
15. chuonghai chu bu le bal le dawn thilhlan- chol thang lo bei dam, beiphit indip tak le hriek chokpola siem kek dam le beiper hriek nal bawm khat le chun- a ruolin a'n hlan ding a nih.
16. " 'Thiempu chun chuonghai chu LALPA hmaah inhlanin, suol thawina thilhlan le pumraw thilhlan chu inhlan a tih.
17. Bawma chol thang lo bei le chun beramchal chu inremna inthawina thilhlana dingin LALPA kuomah thiempu chun inhlan a ta; chun, bu le bal thilhlan le dawn thilhlan khom chu inhlan sa bok a tih.
18. Nazar mi chun Intuokna Puon in kotah a lu invawtir a ta, a'n ser hrangna sam chu lang a ta, inremna inthawina thilhlana dingin meia chun rawng a tih.
19. " 'Nazar miin a'n ser hrangna lu an vawtir zo chun thiempu chun a kutah beram dar, suong hmin sa le bawma chol thang lo bei le beiper chu inchawitir a tih.
20. Chu zoah thiempu chun LALPA hmaa then thilhlana dingin then a ta, chu chu thil thienghlim, thiempu chanpuol ning a tih, then thilhlan a irawm le a mal le chun. Chu zoa chun Nazar mi chun uoiin dawn thei tang a tih.
21. Hi hi inser hrang a nuom dan anga Nazar thutiem thaw dan le LALPA hmaa a thil inhlan dan ding chu a nih, ama nuom thua thil a'n hlanhai chu tiem sa loin. Intiemkamna a nei taphot chu Nazar dan angin a hlen ding a nih' tiin hril tawl rawh" a ta.
22. Chun, LALPA chun Mosie a biek a,
23. "Aron le a naupahai hril la, 'Hieng ang hi Israelhai mal in sawm hlak dan ding chu a nih:
24. LALPAN malsawmin veng cheu raw se;
25. In chungah LALPA hmel hlim sien, Lunginsiet cheu raw se;
26. Nangni tieng LALPA ngha sien,Thlamuongna pe cheu raw se'tiin.
27. Chuong ang chun Israelhai chungah ka hming insam an ta, keiin anni chu malsawm ka tih," a ta.

  Numbers (6/36)