←  Numbers (5/36)  →
1. Chun, LALPAN Mosie kuomah,
2. "Inkai thei vun hri nei amanih, taksaa inthoka thil put nei hrim hrim amanih, mithi ruong tawk leia insukporche po po chu riebuka inthoka tir suok vong dingin Israelhai chu thu pe rawh.
3. Anni laia ka chengna hmun chu an sukporche nawna dingin, a nuhmei a pasalin dai puo tieng i tir hmang vong ding a nih" a ta.
4. Mosie kuoma LALPAN thu a pek ang tak chun Israelhai chun an thaw a, riebuk puo tieng chun an tir hmang ta vong a.
5. LALPA chun Mosie a biek a,
6. "Israelhai kuomah hieng ang hin hril rawh: LALPA thu bawsein, pasal amanih nuhmei amanih tu khomin mi chungah thil poi a thaw chun thiem naw chang a ta,
7. suol a thaw lei chun thupha chawi a ta, a suol thaw man chu a kimin rul a ta, a suol thawna tuortu chu hmun ngaa thea hmun khat pe belsang a tih.
8. Amiruokchu, suol man inteltu ding chu a thi a, sungkuo inhnaipui a nei si naw chun, suol rulna man chu thiempu chanpuola dingin LALPA kuoma pek ding a nih. Hi hi inremna dinga suol thawinaa beram chal inhlan baka pek ding a nih.
9. Israel thlahaiin chuong ang thilthlawnpek thienghlim thiempu kuoma an hung chawi taphot chu thiempu chan ning a tih.
10. Thiempu tinin thilhlan an dong seng chu an chan ning a tih" a ta.
11. LALPA chun Mosie a biek a,
12. "Israelhai kuomah hieng ang hin hril rawh: nuhmei tu khom a pasal lakah ringum loin a um a,
13. mi dangin an zalpui ti a pasal lakah a thup a, a chetsuol lai chie hmutu an um naw a, a uiret laia man a ni bok naw a,
14. sienkhom a pasal chu thikna lungrilin a sip a, a nuhmei chu a ringhlel a, a nuhmei chu a lo chesuol bok si amanih, an naw leh chesuol naw sienla khom a pasal chun thikthu siet leia a ringhlel tlat si chun,
15. a nuhmei aiawin thik thilhlana ding barli beiphit kilogram khat chawiin a nuhmei chu thiempu kuomah thuoi a tih. Beiphita chun hriek a buok ding a ni naw a, rim inhnik a pol sa ding a ni bok nawh; chu chu nuhmei ringhlel umhai leia thilhlan, hriet zingna thilhlan, thiem nawna man suokna dinga thilhlan a ni si a.
16. "Thiempu chun nuhmei chu hung thuoi a ta, LALPA hmaah inngirtir a ta;
17. pil belin tui thienghlim chawi a ta, tuia chun biekbuk tuonga pilvut chu hamin phul a tih.
18. Thiempuin nuhmei chu LALPA hmaah inngirtir a ta, a samtom insuttirin a sam chu a thlaiin put a ta, a kuta chun fiena beiphit, thik thawina thilhlan chu inchawitir a ta, ama chun tui sie, tongsie inphurtirna tui chu chawi a tih.
19. Thiempu chun nuhmei chu inkhamtirin a kuomah, "Tu khomin an zalpui naw che a, i pasal thu hnuoia i um sungin tirdakum tieng i pet hmang naw chun tongsie phurtu tui siea inthok hin fihlim i tih.
20. Amiruokchu, i pasal thu hnuoia i um laiin i pet hmang a, i pasal ni lo mi dang zalpuia i lo insukporche a ni chun,
21. LALPAN i malpui inkarb inhmontirin i phing inpuomtir sien, i mihai inhnawltirin an tongsie inphurtir rawh se che.
22. Hi tui sie, tongsie phur hi i rilah lutin i phing sukpuom sien, i malpui inkar sukhmon raw se" ting a ta, nuhmei chun "Amen, Amen" a ti ding a nih.
23. "Thiempu chun tongsiehai chu savun lekhaziela chun ziek thlang a ta, tui siea chun intleu fai a ta,
24. nuhmei chu tongsie inphurna tui sie chu indawntir a ta, tongsie intluntu tui chu a phingah lut a ta, nasa takin a phing suknang a tih.
25. Thiempu chun thik thilhlan beiphit chu nuhmei kuta inthok chun lang a ta, LALPA hmaah beiphit thilhlan chu then a ta, maichama chun fepui a tih.
26. Thiempu chun hrietzingna thilhlan beiphit chu vei khat lang a ta, maichama chun rawng a ta, chu zoah nuhmei chu tui sie indawntir a tih.
27. Tui a'n dawntir zo chun, nuhmei chu insukporchea a pasal lakah a lo uire a ni chun, tongsie intluntu tui sie chu a sungah lut a ta, nasa takin a phing hung nang a ta, a phing chu hung invung a ta, a malpui inkar chu hung hmon thla vong a ta, a chipuihai tongsie phurtu hung ning a tih.
28. Amiruokchu, nuhmei chu a porche naw chun thiem nawna laka chun fihlim a ta, nau la nei thei pei a tih.
29. "Hi hi nuhmei tu khom a pet hmang a, a pasal lakah a'n sukporche phaa inthikna chungchanga dan chu a nih.
30. Pasalin thikthusiet lei hrim hrima mi dang laka a nuhmei a ringhlel a ni chun a nuhmei chu Pathien hmaah thuoi sien la, thiempu chun hieng danhai ang hin a chungah thil a lo thaw ding a nih.
31. Chuong anga a thaw chun, pasal chu thiem naw chang theina laka chun fihlim a ta, nuhmei chun a suol maw chu phur a tih" tiin.
←  Numbers (5/36)  →