Numbers (4/36)  

1. LALPA chun Mosie le Aron a biek a,
2. "Levi nau pasalhai laia mi Kohat thlahai le an sungkuohai chu tiem ro.
3. Intuokna Puon ina rongbawla thang tlak pasal kum sawmthum le sawmnga inkar mi po po chu tiem vong ro.
4. "Kohat thlahai sin tak chu Intuokna Puon in, hmun thienghlimtaka thilhai enkol a nih.
5. Riebuk an inson ding pha Aron le a naupahai chu Intuokna Puon inah lut an ta, hmun thienghlim puonzar chu hlip thlang an ta, chu chun Thuthlung Bawm chu inkhum an ta,
6. chu chunga chun tui bawng vunin inkhum an ta, chu chunga chun puon dumpawlin inkhum nawk an ta, a zawnfung inbuk an tih.
7. "Chun, hlanbei siena dawkan chunga chun puon dumpawl phang an ta, chu chunga chun thlenghai, haihawhai, berbuhai, dawn thilhlan bun suokna no tung ring rek le ieng lai khoma sie zing hlak hlanbei chu sieng an ta.
8. Chu chunga chun puon senlarin inkhum an ta, chu chu tui bawng vunin inkhum nawk an ta, a zawnfung inbuk an tih.
9. "Chun, khawnvar siena le a khawnvarhai, a phita chep ruolna chaichehai, a vap siena thlenghai le khawnvar tuia hmang oliv hriek siena bur po po chu puon dumpawlin inkhum an tih.
10. Chuonghai le a bebawm hmangruo danghai chu tui bawng vunin tuom an ta, a zawnna chunga chun an sie ding a nih.
11. "Rangkachak maicham chu puon dumpawlin inkhum an ta, chu chunga chun tui bawng vunin inkhum nawk an ta, a zawnfung inbuk an tih.
12. "Hmun thienghlima hmang rongbawlna hmangruo po po chu lang an ta, puon dumpawlin fun an ta, tui bawng vunin tuom nawk an ta, a zawnna chunga chun sieng an tih.
13. "Dar maichama vut po po an inthiel fai zoah puon sendukin inkhum an ta,
14. chu zoah maicham rongbawlnaa an hmang bur le bel po po, mei lakna berbu dam, sa thurna thirkut dam, vutluo dam le maihun dam thangsain, maicham chunga chun sieng an ta, a chunga chun tui bawng vunin inkhum an ta, a zawnfung inbuk an tih.
15. "Aron le a naupahaiin hmangruo thienghlimhai le thil thienghlimhai po po an inkhum vong hnungin, an riebuk an inson ding pha, Kohat nauhai chun zawn dingin an hung inthok ding a nih. Thil thienghlim ruok chu an tawk ding a ni nawh, an tawk chun thing an tih. Intuokna Puon ina thil um po po zawn chu Kohat thlahai chanpuol ding a nih.
16. "Thiempu Aron naupa Eleazar thaw ding chu khawnvara sit ding oliv hriek dam, rim inhnik dam, bu le bal thilhlana hmang ding hmangruo dam le hriek nal ding dam ngaituo a nih. Biekbuk le a sunga um po po, a cheina le hmangruohai po po enkol chu a mawphurna ning a tih" tiin.
17. Chun, LALPA chun Mosie le Aron kuomah,
18. "Kohathai hi Levi thlaa inthoka the thlak an ni nawna dingin fimkhur ro.
19. Thil thienghlim tak hung hnaia an thi pha nawna dingin hieng ang hin thawpek ro: Aron le a naupahai chu biekbukah lutin mi tin sin thaw ding le chanpuol ding seng chu ruotpek raw hai se.
20. Amiruokchu, Kohathai chu a sungah lutin thil thienghlimhai an en vel ding a ni nawh, sawt naw te khom an lut chun thing an tih" tiin.
21. LALPAN Mosie a biek a,
22. "Gerson thlahai le sungkuohai khom tiem rawh.
23. Intuokna Puon ina rongbawla thang thei pasal kum sawmthum le sawmnga inkar mihai chu tiem vong rawh.
24. Gerson thlahai sin puol chu thil phur a nih.
25. Biekbuk puonzarhai, intuokna puon inhai, a'n khumna hai, a chung inkhumna tui bawng vunhai, Intuokna Puon in kotkhara puonzar hai,
26. tuol inhuonna kotkhara puonzar hai, biekbuk le maicham bula puonzar hai, a hruihai le hmangruo dang po po chu phur an ta, thaw ding tul taphot chu thawng an tih.
27. Thil phur amanih le thil dang Gerson thlahaiin an thaw hrim hrim chu Aron le a nau pasalhai inrawina hnuoiah thawng an ta, an sin ding neu neu chen ruotpek dingin thu i'n neitir ding a nih.
28. Chuong chu Intuokna puon ina Gerson thlahai thaw ding chu a nih; an thaw ding chu thiempu Aron naupa Ithamarin relpek a tih.
29. "Merari thlahai le sungkuohai khom tiem rawh.
30. Intuokna Puon ina rongbawla thang thei pasal kum sawmthum le sawmnga inkar mihai chu tiem vong rawh.
31. Intuokna Puon ina an sin ding le chanpuol ding chu thil phur, biekbuk ban rem khawm hai, a bangru hai, a ban hai, a ban thut ker kuok hai,
32. a tuol inhuonna vela ban hai, a ban thut ker kuok hai, a kildena hai, a hruihruol hai le a hmangruo dang po po phur chu a nih. An phur ding seng i ruotpek thlap ding a nih.
33. Hi hi Merari thlahaiin thiempu Aron naupa Ithamar inrawina hnuoia Intuokna puon ina rong an bawl dan ding le an sin ding chu a nih.
34. Mosie le Aron le khawtlang hotuhai chun Kohat chi le kuong le sungkuohai chu an tiem a.
35. Intuokna Puon ina sin thaw tlak, pasal kum sawmthum le sawmnga inkar an tiem po po hming chu an ziek thlak a,
36. an ziek luthai po chu sanghni le zasari le sawmnga an nih.
37. Chuonghai chu Kohat thlahai, Intuokna Puon ina sinthaw, LALPAN Mosie thu a pek anga Mosie le Aronin an tiem po zat chu a nih.
38. Gerson thlahai, Intuokna Puon ina sin thaw dinghai khom chu an chi le kuong le sungkuo ang peiin an tiem a.
39. Pasal kum sawmthum le sawmnga inkar po an tiem a,
40. an chi le kuong le sungkuo ang peia an tiem po chu sanghni le zaruk le sawmthum an nih.
41. Chuonghai chu Gerson thlahai, Intuokna Puon ina sinthaw, LALPAN Mosie thu a pek anga Mosie le Aronin an tiem po zat chu an nih.
42. Merari thlahai, Intuokna Puon ina sin thaw dinghai khom chu an chi le kuong le sungkuo ang peiin an tiem a.
43. Pasal kum sawmthum le sawmnga inkar po an tiem a,
44. an chi le kuong le sungkuo ang peia an tiemhai chu sangthum le zahnih an nih.
45. Chuonghai chu Merari thlahai, Intuokna Puon ina sinthaw, LALPAN Mosie thu a pek anga Mosie le Aronin an tiem po zat chu an nih.
46. Chuong ang chun Mosie le Aron le Israelhai hotuhai chun Levi thlahai chu an chi le kuong le sungkuo kuoin an tiem vong a.
47. Intuokna Puon ina sin thaw ding le puon in phurtu dinga hung pasal kum sawmthum le sawmnga inkara upa an tiem po chu,
48. mi sangriet le zanga le sawmriet an nih.
49. Mosie hmanga LALPA thupek angin, mi tin sin thaw ding le phur ding chu ruotpek a na, LALPAN Mosie kuoma thu a pek anga tiem vong an ni bok.

  Numbers (4/36)