← Numbers (36/36) |
1. | Josefa thlaa mi, Manase naupa Makir, Makir naupa Gilead thlaa mi sungkuo luhai chu an hung a, Mosie le Israel pahnam luhai hmaa chun thu an hril a: |
2. | "LALPA chun Israelhai ram hluo ding chu thum vawra sem dingin kan pu thu a pek a; chun, LALPA chun kan pu chu kan unaupa Zelofehad hluo ding ram chu a naunuhai pe dingin thu a pek bok a. |
3. | Tuhin, Israel sungkuoa mi pahnam dang pasalah lo nei ta hai sien, an pi le pu rama an rochan chu an pasal va neihai kutah a lut ding a na. Chuong a ni chun, kan pahnam ta dinga pek ram chu a kiem ding tina a nih. |
4. | Israelhai ta dinga Jubili Kum a hung tlung pha leh, pasal an va neina hnamhai ramah kan ram chu kop tang a ta, kan thlatuhai ram chu lak hmang a hung ni ding a nih' tiin. |
5. | Chuongchun, LALPA thu angin Mosie chun Israelhai chu thu a pek a: "Josefa thlahai thu hung hril hi a'n dik a nih. |
6. | Hi hi Zelofehad naunuhai chungthua LALPA thupek chu a nih: an pahnam sunga mi an ni phot chun tu khom pasala an nei a thieng. |
7. | Israel thlahai ram chu pahnam pakhata inthokin pahnam dang kutah son ding a ni naw a, Israel pahnam tinin an pi le pua inthoka an rochung ram chu an kol seng ding a nih. |
8. | Israel thlahai laia rohluotu ding nuhmei taphot chun, Israel thlahaiin an pi le pu ram an hluo seng theina dingin, a pa hnampui laia mi ngei pasalah a nei ding a nih. |
9. | Ram hrim hrim pahnam pakhata inthokin pahnam dangah son ding a ni naw a, Israel pahnam tinin an rochung ram chu an kol ding a nih" tiin. |
10. | LALPAN thu a pek angin Zelofehad naunuhai chun an thaw a. |
11. | Zelofehad naunu Mahla hai, Tirza hai, Hogla hai, Milka hai le Noa hai chun an pa unauhai naupahai chu pasalah an nei seng a. |
12. | An pasalhai chu Josefa naupa Manase naupahai an na, an ram chu an pa hnama chun a um zing tah a nih. |
13. | Hienghai hi LALPAN Mosie hmanga Jeriko zawn, Jordan ral, Moab phaia Israelhai kuoma thupek le dan a pekhai chu an nih. |
← Numbers (36/36) |