←  Numbers (35/36)  →
1. Jeriko zawn Jordan kam Moab phaia chun LALPAN Mosie kuomah,
2. "Israelhai chu thu pe la, an rama chun Levihai umna ding khuo siempek raw hai se. Khaw kawl vel ram chu ran tlatna dingin pe bok ro.
3. Chuongchun, umna ding khuo nei veng an ta, an bawng le beram le ran ruol danghaiin tlatna hmun ding nei bok an tih.
4. Khaw kawla ran tlatna hmun in pek ding chu kula inthoka inkhia meter zali le sawmngaa hlaah a ni ding a nih.
5. Kul puo tienga inthokin inkhi unla, sak tieng meter zakuo, thlang tieng meter zakuo, sim tieng meter zakuo le hmar tieng meter zakuo ning a ta, a lai takah khuo um a tih. Hi hmun hi a khaw ta dinga ran tlatna hmun ding ning a tih.
6. "Levihai in pek ding laia khuo paruk chu tuol thathai tlan lutna ding, inhumhimna khuoah in siem ding a nih. Chu bak chu khaw sawmli le khaw hni in pek bok ding a nih.
7. Levihai in pek ding khuo po po chu khaw sawmli le pariet ning a ta, a khawhnawm leh in pek bok ding a nih.
8. Israelhai ram hluoa mi Levihai umna ding khuo in pek dan ding chu, in ram nei ang dungzuiin ning a ta, a nei lien deuin pe lien in ta, a nei tlawm deuin pe chin in tih" a ta.
9. Chun, LALPA chun Mosie kuomah,
10. "Israelhai inbiekpui la, hieng hin hril rawh: 'Jordan vadung kana Kanan ram in lut pha leh,
11. pangpala tuol thattuhai tlan lut theina dingin inhumhimna khuo iemani zat siem ro.
12. Pungkhawm hmaa a chungthu relpek dinga a ngir hmaa tuolthattu chu a thi nawna dingin, chuong khuohai chu phubalatuhai laka in tuoltlanna ding ning a tih.
13. Chuong khuo paruk in pekhai chu in ta dinga inhumhimna khuo ning a tih.
14. Jordan sak tieng hin chuong ang inhumhimna khuo chu pathum siem un la, Kanan ram tieng pathum siem bok ro.
15. Hieng khuo parukhai hi Israelhai le hnam danghai le an kuoma chenghai ta dinga inhumhimna khuo ning a ta, chu taka chun tu khom pangpala mi that taphot tuoltlan thei an tih.
16. " 'Tu khomin thirin mi a vuok a, a thi chun tuolthat a na, ama chu sukhlum ngei ding a nih.
17. Tu khomin a kutin lungtum a chawi a, mi a suk a, a thi chun tuolthat a na, ama chu sukhlum ngei ding a nih.
18. Tu khomin a kutin mi that theina thing tum a chawi a, mi a zei a, a thi chun tuolthat a na, ama chu sukhlum ngei ding a nih.
19. Phubalatu chun tuolthattu chu a hmu pha leh sukhlum nghal a tih.
20. Mi tu khomin theidana leia mi a nam rak amanih, thil iengin amanih tum hrima a deng a, a thi chun,
21. an naw leh an innghirnghona leia kuttuma a chum hlum chun, a sukhlumtu chu sukhlum ngei ding a nih, tuolthat a ni leiin. Phubalatu chun a hmu hun hunah sukhlum a tih.
22. " 'Intheidana um loa mi dang a nam thut amanih, tum lei ni loa thila mi a deng amanih a ni ruok chun,
23. an naw leh hmu loa lung inthlakkhum leia mi a lo thi chun, a hmelma a ni naw lei le a poi tawk tum khom a ni bok naw leiin,
24. pungkhawmhaiin a sukhlumtu le thisen phuba latu chungthu chu hieng danhai ang hin an rel ding a nih.
25. Pungkhawmhai chun thisen phuba latu lakah tuolthattu chu hum an ta, a tuoltlanna khuoa chun inumtir nawk an ta, hriek thienghlim nal thiempu laltak ni lai a thi hma khat chu taka chun a um ding a nih.
26. " 'Amiruokchu, tuolthattu chu a tuoltlanna khuo ramri puoah a fe a,
27. thisen phuba latuin a hmu a, a that chun tuolthat ni naw nih.
28. Thiempu lal a thi hma khat chu a tuoltlannaah tuolthattu chu a um zing ding a nih; thiempu a thi hnung ruok chun a umna hmunah a kir nawk ding a nih.
29. " 'Hieng danhai hi khaw lai khom um inla, in thlahai chena ro in inrel dan ding chu a nih.
30. Tu khomin tuol a that chun, hrepuituhai baua inthoka thu suokin ama chu sukhlum ngei ding a nih; amiruokchu, hrepuitu pakhat chauh bausuok thu chu mi sukhlumna dingin a huntawk nawh.
31. Tuolthattu chu thi tlak a ni leiin suma intlan suok ding a ni nawh; sukhlum ngei ngei ding a nih.
32. Inhumhimna khuoa tuoltlan chu chuong hun laia thiempu lal a thi hma chun a umna khaw hluia kir nawk dinga intlan suok phal a ni nawh.
33. " 'In umna ram chu sukporche naw ro. Thisen insuona chun ram a sukporche. Thisen insuo leia sukporche ram chu thisen insuotu thisen chauh naw chun sukthieng thei a ni nawh.
34. In umna ram, ka chengna hmun hi sukporche naw ro, kei hi LALPA, Israelhai laia cheng chu ka ni si a' tiin hril rawh" a ta.
←  Numbers (35/36)  →