←  Numbers (31/36)  →
1. Chun, LALPAN Mosie kuomah,
2. "Midianhai chungah Israelhai phuba la rawh; chu zoa chun i chipuihai laia lawr ni tang i tih" a ta.
3. Chuongchun, Mosie chun mipuihai kuomah, "Midianhai doa an chunga LALPA phuba chu la dingin nangni laia mi inralthuom raw hai se.
4. Israel pahnam tina inthokin sipai sangkhat seng indonaa chun in fe ding a nih" a ta.
5. Chuongchun, pahnam tina inthokin mi sangkhat pei fe dingin mi sing le sanghni an thlang suok a.
6. Pahnam tina mi sangkhat pei thlang suokhai chu thiempu Eleazar naupa Finehas inrawina hnuoiah indo ding chun Mosien a tir a, hmun thienghlima bur le bel le thu peknaa mut ding tawtawrawt an chawi bok a.
7. LALPAN Mosie kuoma thu a pek angin Midianhai chu an bei a, pasal po po an that vong a.
8. An thathai lai chun Midian lal panga-Evi hai, Rekem hai, Zura hai, Hura hai le Reba hai khom an thang. Beor naupa Balaam khom kawlhnamin an sat hlum a.
9. Midian mi nu le nau an manhai chu salah an thuoi a, an bawng hai, beram hai le thuomhnaw hai chu rallak sumah an lak a.
10. Midianhai khuo po po le an riebukhai chu an raw fai vong a.
11. An rallakhai po po chu, mihriem leh ran leh, an hung hawn vong a.
12. Jeriko zawn, Jordan vadung kam, Moab phaia an riebuka um Mosie le Eleazar le Israel pungkhawmhai kuomah an ral manhai le rallak sum po po chu an hung hawn a.
13. Mosie le thiempu Eleazar le khawtlang thuoituhai chun kotsuoah an lo tuok a.
14. Indonaa inthoka hung kir an hotuhai, za chunga hotuhai le sang chunga hotuhai chunga chun Mosie lung chu a sen hle a.
15. "Nuhmei po po damin in hla vong a ni maw?
16. Hienghai hi Balaam thu zawma LALPA laka inthoka Israelhai kei hertu le Peor-a thil tlung leia mipuihai chunga LALPA hremna intlungtirtu kha an nih ti in hriet naw maw?
17. Tuhin pasalte po le pasal pawl tah nuhmei po po chu that vong unla,
18. pasal la pawl lo nuhmeihai ruok chu in ta dingin hla ro.
19. Tu khom mi that taphot le mithi ruong tawk taphot chu riebuk puo tieng, khawhnawmah ni sari sung riek ro. A ni thumna le ni sarinaah nangni le in sal manhai chu inthien tawl ro.
20. In silfenhai le savun amanih kel hmul amani le thinga siem hrim hrim chu in inthien fai ding a nih" a ta.
21. Chun, thiempu Eleazar chun indoa thang sipaihai kuomah, "Hi hi LALPAN Mosie kuoma thu a pek dan chu a nih:
22. Rangkachak hai, tangkaruo hai, dar hai, thir hai, rangva hai le suon hai dam,
23. meia rawa se el thei lo thil taphot chu meiah raw unla, hung thienghlim a tih. Ieng thil khom ni sien, tlengfaina tuia sukthienghlim ding a nih. Meia raw lo chi po chu tuiah in phum ding a nih.
24. Chun, a ni sari niin in puonhai sawp in ta, hung inthieng in ta, chu zoah riebukah hung lut thei tang in tih" a ta.
25. LALPAN Mosie a biek a,
26. "Nang le thiempu Eleazar le Israel pahnam luhaiin rallak sum le mihriem le ran an hawn po po chu tiem vong ro.
27. Rallak sumhai chu indonaa thang sipaihai le khawtlang mipuihai lai sem ro.
28. Indonaa fe sipaihai chana inthok chun mihriem hai, bawng hai, sabengtung hai, beram hai, kelhai chu zanga peia pakhat LALPA kuoma pek dingin sie hran rawh.
29. LALPA ta dinga ser hran po chu then thilhlanah thiempu Eleazar kuomah pe rawh.
30. Chun, a zatve dang, Israel pungkhawmhai chana inthok chun mihriem hai, bawng hai, sabengtung hai, beram hai, kel hai le ran dang ieng khom sawmnga peiah pakhat sie hran la, chu chu LALPA biekbuk enkoltu Levihai kuomah pe rawh" a ta.
31. LALPAN thu Mosie a pek ang chun Mosie le Eleazar chun an thaw a.
32. Sipaihaiin anni puola an thil lak tiem sa lo an hung hawn po chu beram nuoi ruk le singsari le sangnga,
33. bawng singsari le sanghni,
34. sabengtung singruk le sangkhat,
35. le nuhmei naupang, pasal la pawl ngai lo singthum le sanghni an nih.
36. A zatve, indonaa fehai chan chu beram nuoithum le singthum le sangsari le zanga a nih.
37. LALPA ta dinga pek zat chu zaruk le sawmsari le panga nih.
38. Bawng chu singthum le sangruk a na, chu taka inthoka LALPA kuoma pek zat chu sawmsari le pahnih a nih.
39. Sabengtung singthum le zangaa inthoka LALPA kuoma pek zat chu sawmruk pakhat a nih.
40. Nuhmei naupang singkhat le sangruka inthoka LALPA kuoma pek zat chu sawmthum le pahnih a nih.
41. LALPAN Mosie kuoma thu a pek angin, LALPA ta dinga ser hran po chu Mosien thiempu Eleazar kuomah a pek a.
42. Ral doa fehai chan an sem hnunga Israel mipui chan la um zat chu,
43. beram nuoi thum le singthum le sangsari le zanga,
44. bawng singthum le sangruk,
45. sabengtung singthum le zanga,
46. mihriem singkhat le sangruk a nih.
47. Israelhai chana inthok chun mihriem le ran sawmngaah pakhat pei a lak a, LALPA thupek angin, LALPA biekbuk enkoltu Levihai a pek a.
48. Chun, sipai hotuhai, za chunga hotu le sang chunga hotuhai chu Mosie kuomah an fe a,
49. a kuomah, "I siehlawhaiin i hnuoia sipaihai kan tiem a, pakhat khom inhmang an um nawh.
50. Chuleiin, LALPAN kan nun a mi veng himpek manah chan kan dong senga inthokin rangkachak incheina thil kebun hai, banbun hai, suoi namna kutsebi hai, nabe hai le thi hai chu LALPA kuoma keini ta dinga inremna thilhlan dingin kan hung chawi a nih" an ta.
51. Mosie le thiempu Eleazar chun rangkachaka siem incheina thuom po po chu an lo dong a.
52. Sang chunga hotu le za chunga hotuhaiin LALPA kuoma then thilhlana rangkachak an inhlan po chu kilogram zahni vel buk a nih.
53. Sipai naranhai ruok chun mani puola an lak seng chu an nei a.
54. Mosie le thiempu Eleazar chun sang chunga hotu le za chunga hotuhai rangkachak hung chawi an lo donghai chu LALPAN a mi Israel thlahai a hriet zingna dingin Intuokna Puon ina chun an sie a.
←  Numbers (31/36)  →