←  Numbers (3/36)  →
1. Sinai tlanga LALPAN Mosie a biek laia Aron le Mosie sungkuo chanchin chu hieng ang hi a nih:
2. Aron naupahai hming chu an upat dan indotin Nadab, Abihu, Eleazar le Ithamar an nih.
3. Chuonghai chu thiempu sin thaw dinga hriek nala ser hran an nih.
4. Amiruokchu, Nadab le Abihu hai chun Sinai tlangah mei thieng lo hmangin LALPA hmaah rimtui an inhlan leiin, chi thla nei hman loin LALPA hmaah sukhlumin an um a, Eleazar le Ithamar chauin an pa Aron dam laiin thiempu sin an thaw a nih.
5. Chun, LALPA chun Mosie kuomah,
6. "Levi thlahai chu thiempu Aron kuomah thuoi la, a rong an bawl theina dingin a kuomah inumtir rawh.
7. Anni chun biekbukah rong bawlin, Intuokna Puon ina chun thiempu le mipuihai rong chu bawl raw hai se.
8. Intuokna Puon ina hmangruo po po enkol an ta, Israel mihai an hung pha anni puola biekbuka rongbawl sin chu thawng an tih.
9. Levi chihai chu Israelhai laia Aron le a naupahai sor ding lieu lieua ka pek suok an nih.
10. Aron le a naupahai chauh thiempu sin thaw dingin ruot rawh; mi dang tukhom hmun thienghlim hung hnai chu sukhlum ning an tih" tiin.
11. Chun, LALPAN Mosie a biek a,
12. "Levihai hi Israel thlahai laia nuhmei sul keu hmasa takhai aia keima ngeiin ka ta dinga ka lak an nih. Levihai chu ka chanpuol an nih.
13. Nau lutir po po ka chan an nih. Aigupta rama nau lutir po po ka sukhlum ni khan Israelhai laia nau lutir po po chu, a mihriem le a ranin, ka puol dingin ka hla a, anni chu ka ta ding an nih. Kei hi LALPA chu ka nih" tiin.
14. Chun, LALPAN Sinai thlalerah Mosie a biek a,
15. "Levi thlahai chu an sungkuo kuo le an chi-hnam hnamin tiem rawh. Pasal taphot chu thla khata inthoka a chung tieng po tiem vong rawh" a ta.
16. Chuongchun, LALPAN thu a pek angin Mosie chun a tiem tawl a.
17. Levi naupahai hming chu Gerson, Kohat le Merari a nih.
18. Gerson thlahai hming chu Libni le Simei a nih.
19. Kohat thlahai hming chu Amram, Izar, Hebron le Uziel a nih.
20. Merari thlahai hming chu Mahli le Mushi a nih. Chuonghai chu an sungkuo inchik dan ang peia Levi thlahai chu an nih.
21. Gerson chu Libnihai le Simeihai thlatu a na, hienghai hi a thlahai chu an nih.
22. Thla khata inthoka a chung tieng pasal an tiem po zat chu sangsari le zanga a nih.
23. Gerson thlahai chun biekbuk thlang tieng puon in an kei ding a nih.
24. Gerson thlahai inrawitu chu Lael naupa Eliasaf a nih.
25. Gerson nauhaiin Intuokna Puon ina an enkol ding chu biekbuk le puon in ning a ta, a chung dam, intuokna puon in kota puonzar dam,
26. biekbuk tuol zawla puonzar dam, biekbuk huoltu tuol zawl hang lutna dinga puonzar dam, maicham vela mi puonzar dam, chu taka hmang ding hruihruol po po le chun enkol an tih.
27. Kohat thlahai chu Amramit hnamhai, Izharit hnamhai, Hebron hnamhai le Uziel hnamhai an nih.
28. Thla khata upa china inthoka a chung tieng pasal po po chu sangriet le zaruka an nih. Kohat thlahai chu hmun thienghlim enkoltu ding an nih.
29. Anni chun biekbuk sim tieng pangah puon in kei an tih.
30. Kohat thlahai inrawitu chu Uziel naupa Elizafan a nih.
31. Anni enkol ding chu Thuthlung Bawm hai, dawkan hai, khawnvar siena hai, maicham hai, hmun thienghlima rongbawlna bur le bel po po hai, puonzar hai le rongbawlnaa hmang chi thil hrim hrim hai chu an nih.
32. Levihai hotu lu tak chu thiempu Aron naupa Eleazar a nih. Ama chu hmun thienghlim enkoltuhai po po inrawitu dinga ruot a nih.
33. Merari thlahai le Merari hnam thla sawngtuhai chu Mahli hnam le Mushi hnam hai an nih.
34. Thla khata upa china inthoka a chung tieng pasal po po chu sangruk le zahni an nih.
35. Merari thlahai inrawitu chu Abihail naupa Zuriel a nih. Biekbuk hmar tieng pangah puon in kei an tih.
36. Merari thlahai enkol dinga ruot chu biekbuk ban rem khawm dam, a bangruhai dam, a banhai dam, a ban thut ker kuokhai dam, chuong thilhai le inzom hmangruo po pohai dam,
37. a tuol kot inhuonna banhai dam, ban thut ker kuokhai dam, a kil dena le a hrui hai dam a nih.
38. Biekbuk sak tieng intuokna puon in hmai, ni suokna tieng panga chun Mosie le Aron le an nauhaiin puon in kei an tih. Israelhai aiawa hmun thienghlim enkol chu an mawphurna a nih. Mi dang tukhomin biekbuk a va hnai chun sukhlum ning a tih" tiin.
39. LALPA thupeka Mosie le Aronin Levi thlahai, an pahnam ang peia an tiemhai chu, thla khata upa chin le a chung tieng pasal po po chu singhni le sanghni an nih.
40. Chun, LALPAN Mosie kuomah, "Israelhai laia nau pasal pieng hmasa tak po po, thla khata upa china inthoka a chung tieng po tiem vong la, an hming inchik rawh.
41. Israel thla nau lutir po po aiah Levihai chu ka chanpuol an nih; Israelhai ran lutir po po aiah Levihai ran chu ka chanpuol bok an nih. Kei hi LALPA chu ka nih" a ta.
42. Mosie chun LALPA thupek angin Israelhai laia pasal nau lutir po po chu a tiem a.
43. An hming indot ang peia thla khata upa china inthoka a chung tieng pasal nau lutir po po chu singhni le sanghni le zahni le sawmsari le pathum an nih.
44. Chun, LALPAN Mosie kuomah,
45. "Israelhai laia pasal nau lutir po po aiah Levihai chu la la, an ran lutir aiah Levihai ran la bok rawh; Levihai chu ka ta ding an ni si a. Kei hi LALPA chu ka nih.
46. Chun, Levihai nekin Israelhai nau lutirhai chu zahni le sawmsari le pathuma an tam lem leiin, a chuong po chu suma intlan ding a na,
47. mi pakhat peiah hmun thienghlima an shekel hmang ang shekel nga pei i lak ding a nih; shekel khat chu gera sawmhni a nih.
48. Chuonghai intlanna sum chu la la, Aron le a nauhai kuomah pe rawh" a ta.
49. Chuongchun, Mosie chun Levihaiin an intlan bak a chuong la um po intlanna sum chu a lak khawm a;
50. Israel thla nau lutir poa inthok chun hmun thienghlima shekel an hmang ang shekel sangkhat le zathum le sawmruk le panga a lak khawm a.
51. LALPAN thu a pek angin Mosie chun tlanna sum chu Aron le a naupahai a pek a.
←  Numbers (3/36)  →