←  Numbers (27/36)  →
1. Josefa naupa Manase thla Makira naupa Gilead, chu naupa Hefer, Hefer naupa Zelofehad nau nuhmeihai chu Mahla, Noa, Hogla, Milka le Tirza an nih.
2. Intuokna Puon in kot tieng hungin Mosie le thiempu Eleazar le pungkhawmhai hmaa chun an ngir a,
3. "Kan pa hi thlalerah a thi a. LALPA khinga inthuruol, Kora hnung zuitu pawl lai khan a thang ve naw a, ama thil suol thaw leia nau pasal nei loa thi a nih.
4. Nau pasal a nei naw lei elin kan pa hming chu ieng leiin am a thlahai lai a bo el ding a na? Kan pa unauhai lai chanvo mi pe ve rawh" an ta.
5. An thu chu Mosien LALPA hmaah a'n tlun a.
6. LALPA chun Mosie a biek a,
7. "Zelofehad naunuhai hril hi a'n dik a nih. An pa unauhai lai chanvo i siem ngei ding a nih. An pa chanvo chu i pek ding a nih.
8. Chun, Israel thlahai kuomah, 'Nau pasal nei loa mi a thi chun a ro chu a naunuhai in pek ding a nih.
9. Naunu a nei naw chun a ro chu a unauhai in pek ding a nih.
10. Unau a nei naw chun a ro chu a pa unauhai in pek ding a nih.
11. Chun a pain unau a nei naw chun a ro chu a laibung hnai tak peng in ta, ama chun ro chu inkhawm a tih. LALPAN thu Mosie a pek angin, hi thu hi Israelhai ta dingin dan thupek nghet ning a tih' tiin hril rawh" a ta.
12. Chun, LALPAN Mosie kuomah, "Abarim tlanga khin hang fe la, Israel thlahai ka pek ding ram hang thlir rawh.
13. I hang thlir zo pha leh, i unaupa Aron ang bokin i chipuihai lai lawr khawm ni ve tang i tih,
14. Zin thlalera pungkhawmhai an chier lai khan ka thienghlimna phua mi chawimawi dinga thu ka pek cheu chu in pahnia in bawsiet leiin" a ta. (Chu chu Zin thlaler Kades-a Meriba tuia thil tlung kha a nih).
15. Chun, Mosie chun LALPA kuomah,
16. "Mi po po hringna hnar LALPA Pathien chun Israel pungkhawmhai thuoitu ding mi ruot raw se.
17. Ama chun an hma thuoiin an hnung dal hlak sienla, LALPA mipuihai chu vengtu nei lo beram ang an ni nawna dingin" a ta.
18. Chuongchun, LALPA chun Mosie kuomah, "Nuna naupa, thlarau nei mi chu thuoi la, a chungah kut innghat rawh.
19. Thiempu Eleazar le pungkhawmhai hmaah inngirtir la, an mithmua ngei thuoituah la lut rawh.
20. Israel pungkhawm po poin a thu an awi theina dingin i thuneina sem bok rawh.
21. Urim le Thummimm hmanga Pathien rawn chu thiempu Eleazar thaw ding a na, a thu ngaichangin Josua chun Israel pungkhawmhai fe son hun ding le riebuk khuorna ding hmun hril hlak a tih" a ta.
22. Mosie chun LALPA hril angin a thaw a, Josua chu a thuoi a, thiempu Eleazar le pungkhawm po po hmaa chun a'n ngirtir a.
23. Mosie hmanga LALPA hril angin, a chungah a kut a'n nghat a, a aiawtu dingin a ruota.
←  Numbers (27/36)  →