| ← Numbers (25/36) → |
| 1. | Sitim ruoma Israelhai an um laiin chu taka um Moab nuhmeihai chu an pawl a. |
| 2. | Chuong nuhmeihai chun an pathien kuoma inthawinaa dam an fiel a, inthawina sa chu fain an pathien hmaa chun an kun ve a. |
| 3. | Peor-a an Baal chu Israelhai khomin an biek ve tah leiin an chungah LALPA lungsen chu a so hle a. |
| 4. | LALPA chun Mosie kuomah, "Hieng hotuhai po po hi thuoi tawl la, LALPA lungsenna tibaium tak el chu Israelhai chunga inthoka a'n kieng theina dingin sun varah LALPA hmaah sukhlum vong rawh" a ta. |
| 5. | Mosie chun Israel roreltuhai kuomah, "Peor-a Baal biea thang in mihai seng chu in sukhlum ding a nih" a ta. |
| 6. | Chuonga Intuokna Puon in bula Mosie le Israel pungkhawmhai po po an tap lai chun an mit hmua ngei Israel mi pakhat hin a insungah Midian nuhmei a hung thuoi lut a. |
| 7. | Aron naupa Eleazar naupa Finehas chun a hmuin inkhawmnaa inthokin a suok a, fei a lak a, |
| 8. | Israel pa chu a puon inah a zui lut a, Midian nu le chun an pahniin feiin a sun tlang a, Israelhai chunga hremna chu a re ta a. |
| 9. | Chu hremna hripui chun mi singhni le sangli a that hman a nih. |
| 10. | LALPA chun Mosie kuomah, |
| 11. | "Thiempu Aron naupa Eleazar naupa Finehas chun Israelhai laka ka thikthu a siet anga a thikthu a suksiet leiin Israelhai chunga ka lungsen chu a re ta a, ka thikthu lungsen leiin Israelhai chu sukbohmang ta naw ning. |
| 12. | Chuleiin, ngai ta, keima le inremna thuthlung chu ama leh thlung ka tih ti hril rawh. |
| 13. | Pathien inzaumna hum dinga thikthu sukse a, Israel thlahai ta dinga inremna a siem leiin, ka thuthlung hi ama le a thlahai kumkhaw thiempu nina thuthlung ning a tih', ti rawh" tiin. |
| 14. | Israel mi, Midian nuhmei le an that hming chu Simeon sungkuoa mi Salu naupa Zimri a nih. |
| 15. | Midian nuhmei an that hming chu Zura naunu Kozbi a na, Zura chu Midian pahnam pakhat laia lal a nih. |
| 16. | LALPA chun Mosie kuomah, |
| 17. | "Midianhai chu hmelma angin en la, sukbohmang rawh. |
| 18. | Peor-a khan dawhaa thawin an hlem cheu a, an farnu, Midian mi lien naunu Kozbi, hripui a hung tlunga thata um khom kha, Peor-a thil tlung nghong suok a nih" a ta. |
| ← Numbers (25/36) → |