←  Numbers (24/36)  →

---

1.

Israelhai malsawmpek chu LALPA lawmzawng a nih ti Balaamin a hriet chun kha hma ang khan aien dingin a fe hrang nuom ta naw a, thlaler tieng a ngha a,

2.

a pahnam a pahnama riebuk khuor Israelhai chu a hmu a. Pathien thlarau chu a chungah a hung tlung a,

3.

hi thu hi a hril ta a:"Beor naupa Balaam thu,Mita chieng taka hmu theitu thu,

4.

Pathien thu hretu thu,Iengkimthawthei inlarna hmutu,A hmaa bokkhup a,A mit hung inhong tah thu chu:

5.

"Aw Jakob, i puon inhai a mawiin,Aw Israel, i chengna hmunhai a mawi!

6.

"Ruom angin an inzar duoi a,Va kama huon ang a na,LALPA phun aloi thing ang,Va kama sidar thing ang a nih.

7.

Van ruotui dong thang a ta,Ram hnawngah thlai chi thlak an tih."An lal chu Agagl nekin ropui a ta,An lalram chu hmingthang a tih.

8.

"Aigupta rama inthokin,Pathienin a hung thuoi suok a,Ramsiel anga tha hrat an nih.Dotu hnam danghai dol hmangin,An ruhai vaw hawp an ta,An thalin kap tlang an tih.

9.

Keichal anga bok inzielin,Keipui angin bok zal an ta,Tu'n am kei tho ngam an ta?Nangni malsawmtu cheu chu,Malsawmin um hai sien la,Tongsie inphurtu cheu chu,Tongsie phurin um raw se"tiin.

10.

Chu zet chun Balaam chunga chun Balak lungsenna chu a chok a. A kut chu nuoiin, "Ka hmelmahai tongsie inphur dingin ka'n cha suok che a, voi thum rau mal i sawm ta a.

11.

Tu hin suok nghal la, i in tieng fe dai rawh. Lawmman tam tak pek che ka tum vei leh LALPAN i lawmman hmu ding a dal si che a" a ta.

12.

Balaam chun Balak kuomah, "I mi hung tirhai kha ka lo hril a ni naw am a ni?

13.

Balakin tangkaruo le rangkachaka sip a lal in khom mi pe ding ni sien, LALPAN thu a mi pek bak chu keima chun ieng khom, a sie a tha, ka thaw thei nawh, LALPA mi hril chauh ka puong thei a nih' ti ka lo hril tawl kha.

14.

Tu hin ka mihai kuom tieng ka kir nawk ding a ni ta a, sienkhom la hung vak rawh, hieng mihai hin tuta hnunga i mihai chunga an thaw dan ding la hang hril ka ti che" a ta.

15.

Chuongchun, Balaam chun hieng thu hi a hril a:"Beor naupa Balaam thu,Mita chieng taka hmu theitu thu,

16.

Pathien thuhai hretu thu,Iengkimthawthei inlarna hmutu,A hmaa bokkhup a,A mit hung inhong tah thu chu:

17.

"La hung ding mi chu ka hmu a,La hnai si lo mi chu ka hmuh.Jakob a'nthok arasi hung suok a ta,Israel a'nthokin lal hmol suok a tih. Moab lu bur chu vaw hawp a ta,Setha nauhai lu ru po po khom.

18.

Edom chu tukdol a ta,A hmelma Seir chu hneng a tih.Israel ruok chu hrat pei a tih.

19.

Jakob a'nthok roreltu hung a ta,Khuoa thi mahlahai nuoi bo a tih"tiin.

20.

Chu zoah Balaam chun Amalek a hmu a, a thu chu a puong a:"Amalek chu hnam hmasa tak a na,Sienkhom a tawpah hung sieng a tih"tiin.

21.

Chu zoah Ken mihai a hmu a, a thu chu a puong a:"I chengna hmun a him,Lungpuiah bu i sep;

22.

Sienkhom Kenhai chu suksiet ning in ta,Asuria-haiin salah thuoi an ti cheu"tiin.

23.

Chu zoah hi thu hi a hril nawk a:"Chuong chu Pathienin a thaw pha,Tu am dam zo tang an ta?

24.

Kittim a'nthok long hung an ta,Asur le Eber tukdol an ta,Anni khom tlu se vong an tih"tiin.

25.

Chun, Balaam chu a tho a, a in tieng a kir nawk a, Balak khom chun a fena ding tieng a pan ve ta a.

---

←  Numbers (24/36)  →