←  Numbers (22/36)  →

---

1.

Chuongchun, Israelhai chu fe peiin Jeriko zawn, Jordan suo tieng ral Moab phairuoma chun umhmun an khuor a.

2.

Chun, Zipor naupa Balakin Amor mihai chunga Israelhai thilthaw po po chu a lo hriet a.

3.

Israelhai chu an tam si leiin Moab mihai chu an thlabar hle a, a ram pumin an mangang takzet a.

4.

Chuongchun, Moab-hai chun Midian upahai kuomah, "Hi honpui hin bawngin hlo an pet zo angin ei sevela mi po po hi an pet zo vong ding a nih" an ta. Chuong hun laia Moab lal chu Zipor naupa Balak a nih.

5.

Ama chun Eufretis Tuipui kama a pi le puhai ram Pethora um, Beor naupa Balaam kuoma chun mi tirin hieng ang hin thu a'n cha a: "Aiguptaa inthoka hung suok mipuiin a ram an hung dap sip a, ka depah an um a.

6.

Ka ngam ruol an ni bok si naw leiin tu hin nang hung la, hnea a rama inthoka ka hnot suok tawl theina dingin, tongsie hung inphur tawl rawh. Nangin mal i sawmhai chu malsawmin an um a, tongsie i'n phurhai chu tongsie phurin an um ti ka hriet si a" tiin.

7.

Moab upahai le Midian upahai chu aien man ding chawiin an suok a, Balaam kuom chu an va tlung a, Balak thucha chu an hril a.

8.

Ama chun an kuomah, "Voizan chu hi taka hin riek phot unla, LALPAN a mi hril dan ang angin in kuomah thu hung inhriettir nawk ka ti cheu" a ta, chuongchun Moab milienhai chu a inah chun an riek a.

9.

Balaam kuoma chun Pathien a hung a, "Hieng mihai hi tu hai am an na?" a ta.

10.

Balaam chun, "Moab lal, Zipor naupa Balakin thu a hung incha a, 'Aiguptaa inthoka hung suok mipuiin a ram an dap sip el a, ka depah an um a.

11.

Ka ngam ruol an ni bok si naw leiin tu hin nang hung la, hnea a rama inthoka ka hnot suok tawl theina dingin, tongsie hung inphur tawl rawh' a ti a nih" a ta.

12.

Sienkhom Pathien chun Balaam kuomah, "Anni chu zui naw rawh. Chuonghai chu tongsie i'n phur ding a ni nawh; mal ka sawmhai an nih" a ta.

13.

Zing kar a hung tho chun Balaamin Moab mi lienhai kuomah, "In ram tieng kir nawk ta ro, nangni le fe chu LALPAN a remti nawh" a ta.

14.

Chuongchun, Maob mi lienhai chu Balak kuom tieng an kir nawk a, "Balaamin a mi zui nuom nawh" tiin an hril a.

15.

Balak chun mi lien tam lem, a hmaa fehai neka ropui lem a tir nawk a.

16.

Anni chu Balaam kuomah an hung a, "Zipor naupa Balakin hieng ang hin thu a mi'n cha: Ka kuoma i hung hi ieng khomin dal naw raw se;

17.

lawmman tam tak peng ka ti che a, i hril ang ang chu thawng ka tih. Hung la, hieng mihai hi ka ta dingin tongsie hung inphur hram rawh khai' tiin" an ta.

18.

Sienkhom Balaam chun an kuomah, "Balakin tangkaruo le rangkachaka sip a lal in mi pe ding khom ni sien, LALPA Pathien thupek bak chu ieng khom ka thaw thei nawh.

19.

A hung hmasahai ang bok khan voi zan ka inah riek unla, LALPAN thil dang iem hril ding a mi nei la nghak ka tih" a ta.

20.

Zana chun Balaam kuomah Pathien a hung a, "Hieng mihai hi nangma koa hung an ni leiin zui tawl la, sienkhom ka hril che chauh thaw rawh" a ta.

21.

Chuongchun zingkar a tho chun a sabengtung a buotsai a, Moab mi lienhai chu a zui ta a.

22.

A fe phing leh Pathien lung a sen a, lo dang dingin LALPA vantirko chu lampuiah a lo ngir a. Balaam chu a sabengtung chungah a chuong a, a siehlaw pahniin an zui a.

23.

Kawlhnam chawia lampuia LALPA vantirko ngir sabengtungin a hmu chun lam sirah a pet a, ram hnuoiah a fe a, Balaam chun lampuia khal kai nawk tumin sabengtung chu a vuok a.

24.

Chun, LALPA vantirko chu grep huon pal le pal inkar inchep taka hin a lo ngir nawk a.

25.

Sabengtung chun LALPA vantirko chu a hmu a, pal chu a va hneng a, Balaam ke chu pal leh a hneng de a, chuongchun a vuok nawk ta a.

26.

LALPA vantirko chu a khel deuah an tawl son a, hmun inchep lai tak, chang tieng voi tieng petna ding a um nawna hmuna chun a lo ngir a.

27.

Sabengtung chun LALPA vantirko chu a hmu a, a bok a, Balaam lungsen chun a hmolin a zei zot zot a.

28.

Chuphing leh, LALPAN sabengtung bau chu a hong a, Balaam kuomah, "Ieng am i chungah ka thaw suol a, voi thum zet i mi vuok el chu?" a ta.

29.

Balaam chun sabengtung kuomah, "Mi invet angin i mi soisak a ni hi! Ka kuta kawlhnam chawi ni lang chu tu hin zuk that nghal ka ti che" a ta.

30.

Sabengtung chun, "Voisun ni chena nuom nuoma i chuongna hlak i sabengtung ka ni naw am a ni? Hieng hi i chungah thaw ka ching hlak am a ni?" a ta, ama chun, "Ching ngai lo e," a ta.

31.

Chu phing leh LALPAN Balaam mit chu a hongpek a, lampuia kawlhnam chawia ngir LALPA vantirko chu a hmu a, chuongchun a kun a, hnuoi sikin a bokkhup a.

32.

LALPA vantirko chun a kuomah, "Ieng dinga voi thum top el i sabengtung i vuok? I fena hi ka nak kal zawng a ni leiin dang ding chein ka hung a nih.

33.

Sabengtung chun a mi hmu a, ka hmaa inthokin voi thum a pet a ni kha. Pet naw sien chu that tang ka ti che a, sabengtung ruok chu hlang ka tih," a ta.

34.

Balaam chun LALPA vantirko kuomah, "Ka lo suol a nih. Mi dang dingin lamah i ngir ti ka hriet naw lei a nih. I lawm naw zawng a ni chun kir nawk el ka tih" a ta.

35.

LALPA vantirko chun Balaam kuomah, "Hieng mihai hi zui la, amiruokchu ka hril che chauh hril suok rawh," a ta. Chuongchun, Balaam chun Balak mi lienhai chu a zui ta a.

36.

Balaam a hung ti Balakin a hriet chun an ramri hmawr, Arnon vadung kama Moab khuoa chun hmuok dingin a'n thok suok a.

37.

Balak chun Balaam kuomah, "Inhmaw takin ka ko che an naw maw? Ieng dinga i hung el naw? Lawmman pe thei lo ding che am ka ni?" a ta.

38.

Balaam chun, "Hi, tu hin ka hung annawm. Ka nuom nuom hril thei am ka ni? LALPAN ka baua a sie chauh ka hril ding a nih" a ta.

39.

Chuongchun, Balaam chu Balak leh Kiriat Huzot-ah an fe a.

40.

Balak chu bawng le beramin a'n thawi a, Balaam le a kuoma umhai chu a then a pek a.

41.

A zinga chun Balakin Balaam chu Bamot Baal-ah a hang fepui a, chutaka inthok chun Israel mihai a then chu a zuk hmu phak a.

---

←  Numbers (22/36)  →