← Numbers (21/36) → |
1. | Kanan mi Arad lal, Negev-a um chun Israelhai chu Atarim panin an hung ti a hrietin a lo bei a, a then a lo man a. |
2. | Israelhai chun LALPA kuomah "Hienghai hi kan kutah i mi pek phot chun, an khawpuihai hi sukram vong kan tih" tiin thu an intiem a. |
3. | Israelhai hnina chu LALPAN a ngaithlak a, Kanan mihai chu an kutah a pek a, anni le an khuohai chu an sukram vong a, chu hmun hminga chun Hormai an inbuk a. |
4. | Hor tlanga inthok chun Edom ram helin Tuipui Sen tieng an kir nawk a, a lam chu a'n kuol leiin mipuiin an nghok ta hle a. |
5. | Mipui chu Pathien le Mosie lakah an chier a, "Thlalera thi dingin ieng dinga Aigupta rama inthokin i mi thuoi suok am a na? Bei hlak um lo! Tui khom um bok lo! Hi bu luoksuokum vet khom hi kan hnam zo tah!" an ta. |
6. | Chu phing leh, LALPAN rul, mi chukna chihai chu mipuihai lai chun a tir a, Israelhai chu an chuk hlum teu a. |
7. | Mipuihai chu Mosie kuomah an hung a, "LALPA le nangma kal zawnga kan lo tong kha thil suol kan thaw a nih. Rul mi la hmangpek dingin LALPA hni rawh" an ta, Mosie chun mipui ta dingin a hnipek a. |
8. | LALPA chun Mosie kuomah, "Rul lim siem la, ban lerah khai rawh, rul chuk tu khomin a en chun dam a tih" a ta. |
9. | Chuongchun, Mosien dar rul a siem a, ban lerah a khai a, rul chuk tu khom dar rul en taphot chu an dam pei a. |
10. | Israel thlahai chu an fe pei a, Obot-ah umhmun an khuor a. |
11. | Obot-a inthok chun an suok nawk a, ni suokna tieng, Moab thlaler bul, Iye Abarim-a chun umhmun an khuor nawk a. |
12. | Chu taka inthoka fe peiin Zered Ruom-ah umhmun an khuor a. |
13. | Chu taka inthok chun an suok nawk a, Arnon vadung kamah umhmun an khuor a, chu chu Amor ram chena inzar, thlaler hmora um a nih. Arnon vadung hi Moab ramria um, Moab le Amorhai inkara ramri vadung a nih. |
14. | Chu lei chun a nih LALPA Indona Bu-a chun,"Sufaah Waheb ruom inthuk a um,Arnon vadung ruom le chun, |
15. | A ruom pangper insawn thla chun,Moab ramria Ar khuo a sun"tiin a'n ziek. |
16. | Chu taka inthok chun Beer panin an fe pei a. Hi hmun hi a nih LALPAN Mosie kuoma, "Mipuihai ko khawm la, tui ka pek ding a nih" a tina hmun chu. |
17. | Chuongchun, Israelhai chun hi hla hi an sak a:"Aw tuikhur, hung inchik suok la,Zaiin awi kan ti che; |
18. | Lalhai cho suok tuikhur chu,Mipui thuoituhai ngeiin,Lal hmol le funghrola an cho"tiin. Thlalera inthok chun Matana an pan a, |
19. | Matanaa inthokin Nahaliel, Nahaliela inthokin Bamot, |
20. | Bamot-a inthokin thlaler inlangna Pisga tlang hnuoia um Moab phaizawl chu an tlung a. |
21. | Israelhai chun Amor lal Sihon kuomah, |
22. | "I ram mi'n hraw tlangtir raw khai. Lo amanih grep huon amanih hraw nawng kan ta, i tuikhura tui dawn bok nawng kan tih. I ram kan fe thleng hma khat chun lal lamlienah fe pei kan tih" tiin mi an tir a. |
23. | Sienkhom Sihon chun Israelhai hraw thleng chu a phalpek nawh. A sipai po po a khawm a, Israelhai bei ding chun thlalerah a tir a, Jahaz an tlung chun Israelhai leh an inbei a. |
24. | Israelhai chun kawlhnam leh an lo bei a, a ram chu Arnon vadunga inthoka Jabok vadung chen, kula inhuon Amon mihai le an ramri bul chen chun an lak vong a. |
25. | Israelhai chun Amor mihai khuo po po, Hesbon le a se vela khuo po po khom chu an lak vong bok a, an hluo a. |
26. | Hesbon chu Amor lal Sihon khawpui a nih. Ama chu kha hmaa Moab lal do a, Arnon vadung chena a ram po po lapektu a nih. |
27. | Hieng ang hin hlain an lo phuok a,"Hesbonah hung unla,Sihon lal khawpui chu,Indin thar nawk ei tiu. |
28. | Hesbon a'nthok mei a suok,Sihon khawpuia mei chu,Moab-a Ar khuo a lem zo,Arnon hmun sanga lenghai. |
29. | Aw Moab, i chung a pik, Khemo nauhaij, in se let der!In pathien chun vakvai dingin,In nau pasalhai a siem a,In nau nuhmeihai khom chu,Amor lal Sihon kuomahSala man din a pek suok. |
30. | Sienkhom keinin kan tukdol,Hesbon kan suksiet der a,Dibon chen kan sukram a,Nofa chen kan sukchimit,Medebe chen khom thang sain"tiin. |
31. | Chuong ang chun Amor-hai rama chun Israelhai chu an um a. |
32. | Chun, Mosie chun Jazer khuo enthla dingin mi a tir a, chu khuo chu an lak a, chu taka um Amorhai chu an hnot suok a. |
33. | Chu zoah an kir a, Basan tieng an pan tung a, Basan lal Oga chu a sipai po po leh Edrei hmunah anni chu lo bei dingin a hung inthok suok a. |
34. | LALPA chun Mosie kuomah, "Ti der naw rawh. Ama le a sipaihai le a ram chu i kutah ka pek tah. Hesbona Amor lal Sihon chunga i thaw angin a chunga khom thaw ve rawh" a ta. |
35. | Chuongchun, ama le a nauhai le a sipaihai chu tu khom hla nei der loin an that fai vong a, a ram chu an hluopek tah a. |
← Numbers (21/36) → |