←  Numbers (18/36)  →
1. LALPA chun Aron kuomah,"Nang le i naupahai le Levi chihai hin hmun thienghlima bawsietna maw chu phur in ta, thiempuhai bawsietna maw ruok chu nang le i naupahai chauin phur an tih.
2. Nang le i naupahaiin Thuthlung Puon in hmaa rong in bawl phaa in bula khawsaa thangpuitu ding cheu in pi le pu hnama mi Levi chia mihai chu hung thuoi rawh.
3. I hnuoiah thok an ta, Puon ina mawphurna sin po po thawng an ta, sienkhom hmun thienghlima hmangruo le maicham ruok chu an tawk ding a ni nawh, anni le nang in thi nawna dingin.
4. Nang leh inthlopin, Puon in enkol tieng sin po poah maw phur an ta, an sin chu anni ngeiin ching fel an ta, mi dang mi naranin an hung thangpui ding cheu a ni nawh.
5. "Israelhai chungah ka lungsen thut nawk ta nawna dingin nangin hmun thienghlim le maicham enkol sinah maw i phur ding a nih.
6. Keima ngeiin i Levi chanpuihai hi Israelhai laia inthoka la suokin Intuokna Puon ina rong bawl dingin ka'n ser thienghlim a, i ta dinga ka thilthlawnpek an nih.
7. Chun, maicham le puonzar sung tienga thiempu rongbawlna chu nang le i naupahai chauin in thaw ding a nih. Thiempu nina sin hi a thlawna ka pek che a nih. Mi dang tu khom hmun thienghlim hung hnaitu chu sukhlum ning an tih" a ta.
8. Chun, LALPAN Aron a biek a, "Ngai ta, ka kuoma thilhlan an hung chawi po po enkoltuah kei ngeiin ka ruot che a; Israelhaiin thil inthieng an hung inhlan po po chu nang le i naupahai kumkhuo chanpuola dingin ka pek cheu.
9. Maichama meia raw ve lo thilhlan thienghlim tak, bu le bal thilhlan hai, suol thawina thilhlan hai le thiem naw inthawina thilhlan hai chu nang le i naupahai chanpuol a nih.
10. Thil thienghlim tak a na, fa ro; pasal poin an fak ding a nih. Thil thienghlimah in ngai ding a nih.
11. "Hi khom hi in chanpuol a nih: then thilhlana Israelhaiin thilpek an hung inhlanhai laia sie hranga um po po chu nang le i naupahai le naunuhai chanpuol ni rop dingin ka pek cheu a, in sungkuoa inthieng nawna kai lo poin fa thei in tih.
12. "LALPA kuoma Israelhaiin an tharsuok ra hmasa tak an hung inhlana inthoka oliv hriek tha tak, uoiin thar inhnik tak le bu le bal tha tak hai po po chu ka pek cheu.
13. A ram tharsuok hmasa tak LALPA kuoma an hung chawi po po chu in chan ding a nih. In sungkuoa inthieng nawna kai lo poin fa thei in tih.
14. "Israel rama thil hrim hrim LALPA kuoma an hung inhlan chu i chan a nih.
15. LALPA ta dinga an pek, sul keu hmasa tak taphot chu, mihriem ni sien, ran ni sien, i chan a nih. Amiruokchu, nau pasal pieng hmasa tak le ran thienghlim lo te pieng hmasa tak phot chu i'n tlan ngei ding a nih.
16. Thla khat a tling pha intlanna man tuk zat, hmun thienghlima hmang tangkaruo shekel ngain i'n tlan ding a nih. Shekel khat chu gera sawmhni a nih.
17. Amiruokchu bawngchal le beramchal le kelchal pieng hmasa tak chu ran thienghlim an ni leiin i'n tlan ding a ni nawh; an thisen chun maicham the la, an thau chu meia thilhlanah raw rawh, chu chu LALPA ta dinga rim inhnik a ni si a.
18. An sahai chu i chan ding a nih, then thilhlana inhlan, a irawm le a chang tieng malhai chu i chanpuol a ni ang bok khan.
19. Israelhaiin thil thienghlim LALPA kuoma an inhlanhai po po laia sie hrang po chu nang le i naupahai le i naunuhai chanpuol rop dingin ka pek che. LALPA hmaa nang le i thlahai ta dinga kumkhuoa machi thluthlungg a nih," a ta.
20. LALPA chun Aron kuomah, "An rama hin rochan nei naw ti nih; anni lai chan nei bok naw ti nih. Israelhai laia i chanvo le rochan chu keima hi ka nih.
21. "Intuokna Puon in an enkol sawl manah Israelhai sawmapakhat po po chu Levihai chan dingin ka pek a nih.
22. Tuta inthok chu Israel thlahaiin Intuokna Puon in hi an hung hnai ding a ni ta nawh, chuong naw chun an suol maw phurin thi hlau rawi an tih.
23. Intuokna Puon ina rongbawl sin chu Levihaiin thaw tang an ta, bawsietna maw iengkim chu phur tang an tih. Hi hi in thlahai chen khoma ka kumkhaw thupek chu a nih. Israelhaia inthokin rochan nei naw ni hai.
24. Chu aia an rochana ka ruotpek chu LALPA kuoma Israelhai sawmapakhat inhlan po po chu a nih. Chu lei chun a nih, 'Israelhai lai rochan nei naw ni hai' ka lo ti hrim kha" a ta.
25. LALPA chun Mosie a biek a,
26. "Levihai inbiekpui la, an kuomah hieng hin hril rawh: 'In rochan dinga Israelhai sawmapakhat ka pek cheu chu an laka inthoka in dong pha chun, chu sawmapakhata inthoka sawmapakhat chu LALPA ta dingin in inhlan ding a nih.
27. In thil inhlan chu hrizawla bu thar hmasa tak le uoiin sawrna khura uoiin suok thar hmasa tak anga ngai ning a tih.
28. Chuong anga Israelhai laka sawmapakhat in dong po poa mi chu LALPA ta dingin in inhlan ve pei ding a nih. Chu thilhlana LALPA chanpuol po chu Aron in pek ding a nih.
29. In thil dong laia a tha tak le thienghlim tak pei chu LALPA chan dingin inhlan ro'.
30. " 'Chun, Levihai kuomah hieng hin hril bok rawh: In thil nei laia a tha tak in inhlan chu hrizawl le uoiin sawrna khura inthoka hung suok anga ngai ning a tih' tiin.
31. A dang po chu Intuokna Puon in enkol sin in thaw hlaw a na, in sunghai leh in nuomna naah fa thei in tih.
32. A tha tak LALPA kuomah in inhlan tah chun hieng thila hin thiem naw chang ngai naw ti niu a, Israelhai thilhlan thienghlim chu sukporche ngai nawng in ta, thi naw bok in tih" tiin.
←  Numbers (18/36)  →