←  Numbers (17/36)  →

---

1.

LALPA chun Mosie kuomah,

2.

"Israelhai inbiekpui la, an sungkuoa pahnam tin thuoitua inthokin hmol sawmpahni la khawm la, hmola chun a neitu seng hming ziek rawh.

3.

Levi hmolah Aron hming ziek la, pahnam tin ta dingin hmol pakhat pei a ni ding a nih.

4.

Intuokna Puon ina ka'n tuokpuina hlak che Thuthlung Bawm hmaah hmolhai chu intung rawh.

5.

Ka mi thlang hmol chu hung inder a ta, Israelhaiin an chier khum rop che hi keiin ka sukre ding a nih" a ta.

6.

Mosie chun Israelhai chu a'n biekpui a, an thuoituhai chun hmol sawmpahni an pek a, hmol pakhat chu pahnam lu peia ding a na, Aron hmol khom chu an hmol lai chun an inthangtir a.

7.

Mosie chun hmolhai chu Thuthlung Puon ina chun LALPA hmaah a sie a.

8.

Zingkar chun Mosie chu Thuthlung puon ina chun a va fe a, Levi sungkuo aiawtu Aron hmol chu a lo inder chauh khom ni loin a kumum a, a par a, ruon a lo ra a.

9.

LALPA kuoma inthokin hmolhai chu Israel pungkhawm po po hmaa chun Mosien a hung chawi suok a, an en a, mani hmol seng chu an lak nawk a.

10.

LALPA chun Mosie kuomah, "Thuthlung Bawm hmaah Aron hmol kha va sie nawk rawh. Hieng helhmang nauhai hi ka chunga an chier sukrena ding le an thi pha nawna dinga inhriettirtu dingin sie zing rawh" a ta.

11.

LALPA thupek angin Mosie chun a thaw a.

12.

Israelhai chun Mosie kuomah, "Chuong a ni chun kan thi ngei ding a ni chu! Mi boral kan ni ta a, kan se letder an tah!

13.

LALPA biekbuk hung hnai met hman an thi vong chun, kan thi ram der el awm de!" an ta.

---

←  Numbers (17/36)  →