←  Numbers (16/36)  →
1. Levi naupa Kohat, Kohat naupa Izar, Izar naupa Kora le Reuben pahnama mi Eliab naupahai pahni- Dathan le Abiram le Pelet naupa Ona hai chu insukngengin,
2. Mosie lakah an hel a. Anni chu Israelhai laia vantlang kaunsila an mi thlang, thuoitu challang zahni sawmngain an lo thlop bok a.
3. Anni pawl po chu Mosie le Aron inkhingpui dingin an hung inthok a, an kuomah, "In insukngeng taluo! Mipuihai khom hi an thienghlim ve vong a nih. LALPA khom an kuomah a um. Chuong chu ni siin, ieng dinga LALPA mipui pungkhawmhai nekin in insie chunghnung lem am a na?" an ta.
4. Chu chu Mosien a hang hriet chun a bokkhup a.
5. Kora le a pawlhai kuoma chun, "Zingah zingkar leh tu am ama mi, tu am a thienghlim ti LALPAN hung sukchieng a tih. Ama mi chu ama hnaia hung dingin ko a ta, a bulah inumtir a tih.
6. Kora, nang le i hnung zuituhai thaw ding chu hi hi a nih: mei lakna berbu hung chawi ro;
7. chu taka chun meiling sie unla, LALPA hmaah rimtui raw ro. LALPAN tu am a thlang chu hre el ei tih. Nangni Levi thlahai hi an nawm insukngeng taluo chu!" a ta.
8. Mosie chun Kora kuoma khom, "Nangni Levi thlahai, ngaithla ro.
9. Israelhai Pathien chun LALPA biekbuka rong bawl a, mipuihai hmaah ngira an rong bawl dingin Israel mipuihai laia inthokin a ser hrang cheu a, a bulah a sie cheu hi in ta dingin huntawk in la ti naw rop a ni maw?
10. Nangni le in chipui Levihai chu ama bul hnaiah a'n umtir cheu leiin tuhin thiempu nina chen khom inchu thlak in tum a ni maw?
11. Nang le i hnungzuituhai po po hi LALPA dodal zawnga inthuruol in nih. Aron hi tu am a na, hienga a chunga in chier hi?" a ta.
12. Mosie chun Eliaba nauhai, Dathan le Abiram chu a'n kotir a Anni chun, "Hung naw ning ungah.
13. Nenetui le khuoizu luongna rama inthoka thlalera mi that vong dinga i mi thuoi khom hi huntawk i la ti naw a ni maw? Tu hin kan chungah insuklal i tum nawk nghal a!
14. Chu chauh chu a ni le, nenetui le khuoizu luongna ramah i mi thuoi naw a, lo le grep huon hai kan rochung ding i mi pek bok nawh. Hieng mihai mit hi i khel dokpek vong tum a ni? Keini chu hung naw top kan tih" an ta.
15. Mosie lung chu a sen hle a, LALPA kuomah, "An thil inhlan lo pom naw rawh. Anni laka inthokin ieng khom ka lak nawh, sabengtung takngiel khom; tu poi khom ka tawk bok nawh" a ta.
16. Mosie chun Kora kuomah, "Nang le i hnung zuituhai chu Aron leh zingah zing tieng LALPA hmaah in hung inlang ding a nih.
17. Mi tinin mei lakna berbu hung chawi seng ro, a rengin zahni sawmnga a ni kha, chu taka chun rimtui phul unla, LALPA hmaah hung chawi ro. Nang le Aron khomin in mei lakna chu in hung chawi ding a nih" a ta.
18. Mi tin chu mani mei lakna seng chawiin, rimtui phulin, Intuokna Puon in kota chun Mosie le Aron leh an va ngir a.
19. Intuokna Puon in kota anni khingtu Kora le a hnung zuituhai po po an hung inkhawm chun LALPA ropuina chu pungkhawm po po hmaah a hung inlang a.
20. LALPA chun Mosie le Aron kuomah,
21. "Pungkhawmhai laia inthok hin insie kieng ro, thawk le khata ka sukhlum vong theina dingin" a ta.
22. Mosie le Aron ruok chu an bokkhup a, "Aw Pathien, nang chu mihriem hringna po po hnar i na, mi pakhat suolna leiin pungkhawm po po chungah i lung a sen el di'm a nih?" an ta.
23. Chu phing leh LALPA chun Mosie kuomah,
24. "Pungkhawmhai hi hril la, Kora le Dathan le Abiram hai umna riebukhai chu inkiengsan vong raw hai se" a ta.
25. Mosie chu a tho a, Dathan le Abiram hai riebuk panin a fe a, Israel upahai chun an zui a.
26. Chun, pungkhawmhai kuoma chun, "Hieng misuolhai puon ina inthok hin suok vong ro. An thil ieng khom tawk naw ro, an suolna chun fen hmang ve hlauh rawi a ti cheu" tiin a hril a.
27. Chuongchun, Kora le Dathan le Abiram hai puon ina inthok chun an suok ta sup sup a. Dathan le Abiram khom chu an hung suok a, an puon in kotkhara chun an nuhmeihai, an nauhai le nautehai leh chun an ngir a.
28. Mosie chun, "Keima lungril puok suoka ka thaw a ni nawzie le hieng thil hi thaw dingin LALPAN a mi tir a nih ti hi thila hin hrieng in tih.
29. Hieng mihai hi mi thi dan pangngaiin an thi a, mi po po thil tuok anga an chunga hung tlung ve a ni chun Pathienin a mi tir naw ning a tih.
30. Amiruokchu, LALPAN thil thar danglam tak thaw a, hnuoiin a bau ka a, anni le an thil nei po po lem zo a, a hringa Seola an lut ruok chun, hieng mihai hin LALPA an lo ngainep a nih ti hrieng in tih" a ta.
31. Chuong thil chu a hril zo charin, an umna hnuoi chu a hung kak a,
32. hnuoi chun a bau a ka a, Kora le a sungkuo le an thil nei po po chu a lem ta vong a.
33. Chuongchun, an thil nei po po le chun a hringin Seolah an lut a; hnuoi chun a bau a'n chip khum a, pungkhawmhai laia inthok chun an boral tah a nih.
34. An khek ri an hrietin, an kawl vela Israelhai chun, "Eini khom hnuoiin mi lem ve palh a tih" tiin an tlan dar chum chum a.
35. Chun, LALPAA inthokin mei a hung suok a, rimtui inhlantu mi zahni le sawmnga chu a kang hlum ta vong a.
36. LALPA chun Mosie kuomah,
37. "Meilinghai kha hla deu hlekah thai dar la, thiempu Aron naupa Eleazar khan kang hlumhai mei laknahai kha rut khawm raw se, thil thienghlim an ni si a.
38. Anni ngei hringna chunga suolhai meilakna a ni kha. Meilaknahai chu sut phek la, maicham chung inkhum thuona dingin ser rawh; LALPA kuoma inhlan ta sa an ni leiin thil thienghlim a hung ni tah. Hi hi Israelhai ta dinga inchikna ning a tih" a ta.
39. Thiempu Eleazar chun kang hluma um hai mei lakna dar berbu chu a lak khawm a, maicham inthuona dingin a phekin a'n suttir a,
40. LALPAN Mosie a hril ang takin a thaw a. Hi hi Aron thlahai chauh naw chu LALPA hmaah rimtui raw dingin an hung ding a ni nawh ti inhriettirna ding a nih, chuong naw chun Kora le a hnung zuituhai ang hung ning an tih.
41. A zinga chun, "LALPA mihai in that" tiin Israel mipuihai chu Mosie le Aron chungah an chier a.
42. Mosie le Aron khinga mipui inhawr khawmhaiin Intuokna Puon in tieng an nghat lai chun sumin Intuokna Puon in chu a hung bawm a, LALPA ropuina a hung inlang a.
43. Mosie le Aron chu Intuokna Puon in kota chun an fe a.
44. LALPA chun Mosie kuomah,
45. "Thawk le khata ka sukhlum vong theina dingin pungkhawmhai laia inthok hin inthier hmang ro" a ta. Anni chu an bokkhup a.
46. Chun, Mosie chun Aron kuomah, "I mei lakna kha chawi la, rimtui sie la, maichama mei la bok la, inrang takin mipui tieng pan la, an ta dingin inremna siempek rawh. LALPA lungsenna a hung suok a, hripui a'n leng tan a nih" a ta.
47. Aron chun Mosie hril angin a thaw a, mipui lai chun a tlan lut a. Hripui chu a'n leng tan tah a, sienkhom Aron chun rimtui rawin an ta dingin inremna a siempek a.
48. A thi le a damhai inkara chun a ngir a, hripui chu a'n kieng ta a.
49. Chuong sa khom chun, Kora leia thihai bakah mi singkhat le sangli le zasari chu hripui chun a that hman a nih.
50. Hripui chu a'n kieng ta leiin Aron chu Mosie kuomah Intuokna Puon in kota chun a kir nawk a.
←  Numbers (16/36)  →