←  Numbers (15/36)  →
1. Chun, LALPAN Mosie a
2. "Israelhai inbiekpui la, hieng hin hril rawh: 'In umna ding ram ka pek cheu in tlung pha chun,
3. LALPA kuoma meia thilhlan, pumraw thilhlan amanih, thutiem hlen dinga inthawina amanih, mani nuom thua thilhlan amanih, in kut hunbi pha amania bawngchal amanih, beram le kel chal amanih in inhlan taphot chu LALPA ta dinga rim inhnik a nih.
4. LALPA kuoma thilhlan inhlantu taphotin bu le bal thilhlana hmang, beiphit indip kilogram khat, oliv hriek litar khat le hmet chu an inhlan sa ding a nih.
5. Chun, pumraw thilhlan amanih, inthawina thilhlan amania beramte in inhlan pha leh dawn ding thilhlanah uoiin litar khat in inhlan sa bok ding a nih.
6. Bu le bal thilhlana beramchal in inhlan chun beiphit dip kilogram hni, oliv hriek litar chenve le hmet pol chu inhlan in ta,
7. uoin litar khat leh in inhlan sa bok ding a nih. Hieng thilhlanhai hi LALPA ta dinga rim inhnik a nih.
8. Chun, pumraw thilhlan amanih, thutiem hlenna dinga inthawina amanih le LALPA kuoma inremna thilhlan amani-ah bawngchal in inhlan chun,
9. bu le bal thilhlana dingin beiphit dip kilogram thum le oliv hriek litar hni hmet pol chu inhlan in ta,
10. uoin litar hni in inhlan sa bok ding a nih. Hi inthawina hi LALPA ta dinga rim inhnik a nih.
11. Bawngchal amanih, beramchal amanih, beramchal tuoi amanih kelchal tuoi amanih in inhlan pha chuong ang chun thaw hlak ro.
12. Ran pakhat neka tam in inhlan pha leh ran pakhat in inhlana thil dang in hmang sa zat char kha ran in inhlan sa zat ang peiin thaw sa ve pei ro.
13. "Chu rama pieng po po chun hieng ang pei hin LALPA ta dinga rim inhnik, meia thilhlan chu an thaw ding a nih.
14. Thang la hung thar pei chen khomin, ram dang mi amanih le nangni laia cheng ve tu khomin LALPA ta dinga rim inhnik, meia thilhlan an thaw pha chun nangni thaw ang charin an thaw ve ding a nih.
15. In thlahai chena ding khomin, mipuihai le in kuoma hnam dang umhai ta ding khomin dan thuhmun in nei ding a nih; hnam danghai khom LALPA hmaa chu nangni leh angkhat vong an ni ding a nih.
16. Nangni ta ding le in kuoma um hnam danghai ta dingin dan le thupek hmun khat chauh a um ding a nih' tiin hril rawh" a ta.
17. Chun, LALPA chun Mosie a biek a,
18. "Israelhai inbiekpui la, hieng hin hril rawh: 'Ka thuoina ding cheu ram in hang tlung a,
19. a ram suok bu in fak pha leh, a then chu LALPA kuoma then thilhlanah in inhlan ding a nih.
20. Bei tlang in hmet hmasa tak laia mi tlang khat chu hrizawla bu, then thilhlana in inhlan angin bei tlang chu thenin in inhlan ding a nih.
21. Hi hi thang la hung thar pei dinghai huna chen khom bei in hmet hmasa tak chu LALPA kuomah then thilhlana dingin in inhlan hlak ding a nih.
22. " 'LALPAN Mosie hmanga dan a pekhai chu tum reng lei ni loin an bawsiet thei a.
23. Chun, hun la hung um peiah Mosie hmanga LALPA thupekhai chu Israel mipuiin an lo zawm kim vong naw thei bok a.
24. Chuong thil chu mipuiin an hriet naw leia an bawsiet a ni chun, pumraw thilhlanah bawngchal tuoi, LALPA ta dinga rim inhnik chu inhlan an ta, chu ruol chun a dan ang takin bu le bal thilhlan le dawn ding thilhlan inhlan an ta, suol thawina dingin kelchal inhlan bok an tih.
25. Chun, thiempuin Israel thla pungkhawm po po ta dingin inremna siem a ta, an thaw palh a ni lei le LALPA ta dinga meia thilhlan le an bawsietna aia suol thawina chu inhlan a ni tak leiin, ngaidam ning an tih.
26. Israel thla pungkhawmhai po po le an kuoma um ram dang mihai khom ngaidam ni vong an tih, an renga an thaw palh a ni leiin.
27. " 'Miin hre loa suol a thaw palh a ni chun, suol thawina dingin kel la tuoi kum khata upa a hung inhlan ding a nih.
28. Hre loa LALPA hmaa suol thawtu ta ding chun thiempuin inremna siempek a ta, ngaidam ning a tih.
29. Hre loa suol thawtu chungthua dan chu Israel thla, a rama pieng le ram dang mi, anni laia cheng ta dingin a'n ang vong a nih.
30. Hre zing sia tu khom suol lui chu, a rama pieng le ram dang mi khom ni sien, LALPA hming hrilsetu a ni leiin, chu mi chu a mihai laia inthoka tuithlar ding a nih.
31. Chu mi chun LALPA thu chu a hmusit leiin a thupekhai chu a bawsiet a na, tuithlar ngei ngei ding a nih, a suol maw chu phur a tih' ti rawh" a ta.
32. Thlalera Israelhai an um lai chun mi pakhatin Sabat nia thing a lak khawm lai an hmu a.
33. Thing a lak khawm lai hmutuhai chun Mosie le Aron le pungkhawmhai hmaah an hung thuoi a.
34. Ieng anga thaw di'm a nih ti hriet a la ni hma chun ripah an khum a.
35. Chun, LALPAN Mosie kuomah, "Chu mi chu sukhlum ding a nih. Khawhnawmah mipuiin lungin an deng hlum ding a nih" a ta.
36. LALPAN thu Mosie a pek angin mipui chun khawhnawmah an thuoi a, lungin an deng hlum a.
37. LALPA chun Mosie kuomah
38. "Israelhai chu hieng ang hin hril rawh: 'In thla la hung pei dinghai chen khomin, silfen hmawr kuolin pebuk siem un la, pebuk tin chu pat dumpawla siem ding a nih.
39. Pebuk chu in en zatin, LALPA thupekhai chu hre zing a, zawm a, in lungril chak zawng le mit lak zawng tienga inhmang loa khawsa ding in nizie inhriet suoktir hlak a ti cheu.
40. Chuonga in thaw chun ka thupekhai po po zawm nachang hrieng in ta, in Pathien ta dingin invong thienghlim thei in tih.
41. Kei hi LALPA in Pathien, Aigupta rama inthoka in Pathien ni dinga thuoi suoktu cheu, LALPA in Pathien chu ka nih' tiin" a ta.
←  Numbers (15/36)  →