←  Numbers (14/36)  →
1. Chu zan chun beidongin mipui chu an tap a.
2. Mosie le Aron chungah chierin, "Aigupta rama khan lo thi ta law law chu ni inla tha lem ding bah! An naw le bek thlalera khan lo thi ta lem inla ni ding!
3. Kawlhnama thi el dingin ieng leia Pathienin hi rama hin a mi thuoi a na? Ei nuhmei le nauhai hi ralin mi lakpek an ta, ei ta dingin Aigupta rama kir nawk a tha lem dai a nih.
4. Thuoitu ding thlang ei ta, Aigupta tieng kir nawk ei tiu" an ta, an inrawn tuo a.
5. Mosie le Aron chu chu taka Israel mipui pungkhawmhai hmaa chun an bokkhup a.
6. Ram thlithlaia fehai laia thang Nuna naupa Josua le Jefune naupa Kaleb chun an silfen an pot thler a,
7. Israel mipui pungkhawmhai kuoma chun, "Kan ram hang fang le thlithlai chu ram tha tawp a nih.
8. Ei chungah LALPA a lawm chun, chu ram, nenetui le khuoizu luongna rama chun mi thuoi tlung a ta, ei ta dingin mi peng a tih.
9. LALPA chunga hin hel naw phot ei tiu. A ram mihai chu ti der naw ro, ei la dol zo vong tawl ding a nih. Humtu an nei nawh, eini kuoma ruok chu LALPA a um. Ti tawl der naw ro" tiin an hril a.
10. Nisienlakhom, pungkhawmhai chun lunga deng an rot a. Chu phing leh Intuokna Puon in chunga chun pungkhawm po po hmaah LALPA ropuina chu a hung inlang a.
11. LALPA chun Mosie kuomah, "Ieng chen top am hi mihai hin an mi hmusit chei ding a na? Anni lai inchikna thil mak khang zozai ka thaw hnung khom khan, ieng chen top am an mi la ring nuom naw zing ding a na?
12. Anni rawi hi hripuiin sukhlum vong ka ta, nang ruok chu anni neka hnam ropui le lien lemin siem ka ti che" a ta.
13. Mosie chun LALPA kuomah, "I thilthawtheina hmanga hi mihai hi Aiguptaa inthoka i thuoi suok an ni leiin chuong ang thu chu Aigupta mihaiin lo hre pal an ta,
14. hi rama mihai kuoma hin hril sawng rawi an tih! Aw LALPA, anni chun hieng mihai lai hin i um ti an hriet tah a, nang chu aw LALPA, hmaisana meuh an hmu ta che a, i sum chu an chungah i zarpek hlak a, sunah sum ngirin, zanah meiin an hma i thuoi hlak si a.
15. Voi khat thil thua i sukhlum vong chun, hnam danghaiin an chanchin hung hrieng an ta,
16. LALPA chun intiemkam meua ram pek a tiema chun a thuoi tlung thei ta naw leiin thlalerah a sukhlum vong el a nih' an ti ding annawm!
17. A hmaa i lo puong ta hlak angin tu hi LALPA hratna suklang hun a nih.
18. Nangma ngeiin, 'LALPA chu lung inuoi tak, hmangainaa sip, mi suolhai le helhai khom ngaidam hlaktu, amiruokchu pahai suolna leia an nauhai le an nauhai nauhai, suon thum suon lina chen khom hrem hlaktu chu a nih' tiin i lo puong ta a.
19. Tuhin LALPA, i hmangaina nasa tak ang ngei le Aigupta ram an suoksana inthoka tu chena i ngaidam rop tah hlak ang khan hieng mipuihai suolna hi ngaidam lul rawh" tiin a ngen a.
20. LALPA chun, "I hni ang chun ka ngaidam.
21. Amiruokchu, kei hi hring zing ka ni ang boka ka ropuina hnuoi pumah a sip zing sung chun,
22. tu khom ka ropuina le inchikna thil mak Aigupta ram le thlalera ka thawhai hmu ta si a, ka thu awi nuom loa voi sawm zet mi fietuhai hrim hrim chun,
23. an pi le puhai kuoma inkham meua pek ka tiem ram chu hmu top naw ni hai; anni laia mi ngaineptu hrim hrim khomin hmu bok naw ni hai.
24. Ka siehlaw Kaleb ruok hin chu ngaituona danglam puta lungril po poa a mi zui leiin, a ram va sira chun thuoi lut ka ta, a thlahaiin rochung an tih.
25. Amalek mihai le Kanan mihai chu ruomah an um leiin, zinga hin hnung tieng kir nawk unla, Tuipui Sen hrula fe thlaler panna lam tieng chun inthok suok ro" a ta.
26. Chun, LALPAN Mosie le Aron a biek a,
27. "Hieng mi rilo pung khawmhai, ka chunga chier hmanghai laka hin ieng chen am zai ka daw ding a na?
28. An kuomah, ka hringna salin ka hril a nih, ka hriet ngeia in hril ang takin in chungah thawng ka tih.
29. Nangni laia intiema thang tah, kum sawmhni le a chung tieng, ka chunga chier po po ruong chu thlalera hin zal a tih.
30. Jefune naupa Kaleb le Nuna naupa Josua ti chauh naw chun, ban phar meua in umna hmun dinga ka tiem ram chu tu khomin lut naw ti niu.
31. Ralin an mi manpek ding chauh' tia in hril in nauhai ruok chu thuoi lut ka ta, in hnawl hnung ram chu la chen an tih.
32. Nangni ruok chu in ruongin thlaler nghak a tih.
33. Thlalera in ruonghai a riral vong hma khat chu, in ringum nawna ra chu tuorin, in nauhai chu kum sawmli sung beram chingin hi thlalera hin invak invak an tih.
34. Ram in va thlithlai ni, ni sawmli sung chu ni khat aiah kum khat peia tiemin kum sawmli sung chu in suol leiin tuor in ta, keima hnawla thang umzie hi iem a na ti hung hrieng in tih.
35. Kei LALPA hin chu chu ka hril a, hieng mi rilo pung khawmhai, kei mi dodal dinga inhawr khawmhai chunga hin chuong thilhai chu thaw ngei ngei ka tih. Hi thlalera hin an tawpna chu tlung a ta; hi hmuna hin thing an tih" a ta.
36. Chuongchun, ram thlithlai dinga Mosie mi tirh hung kir nawk hai,
37. a ram chanchin ripawt tha naw taka the dara mipui pungkhawmhai laia chierna intluntuhai po po chu LALPA hmaah hriin a man hlum vong a.
38. Ram thlithlai dinga fehai laia Nuna naupa Josua le Jefune naupa Kaleb ruok chu an thi ve nawh.
39. Chuong thu chu Israel thlahai po po kuomah Mosien a hril a, lungngaiin an inrum a.
40. A zinga chun inhma takin an tho a, tlang ram tieng pan an tum a, "Kan suol takzet a nih. LALPA tiem rama chun tuhin feng kan tih" an ta.
41. Mosie ruok chun, "Ieng leia LALPA thupek poisa loa fe in tum am a na? Hlawtling naw ti niu.
42. In kuomah LALPA a um naw leiin, in hmelmahai lo that el ding chauh chun fe ting naw ro.
43. Amalekhai le Kanan mihai le khin indo in ta, LALPAN a nghatsan ta si cheu leiin in kuomah um naw nih, an kawlhnama thi mei mei ding chauh in nih" a ta.
44. Nisienlakhom, anni ngairuotna hmangin tlang tieng an pan lui a, LALPA Thuthlung bawm le Mosie ruok chun riebuk chu an suoksan nawh.
45. Chuongchun tlanga um Amalekhai le Kanan mihai chu an hung chim thla a, an lo bei a, an lo sat thal rem rum a, Horma chen an hnot thlur tawl a.
←  Numbers (14/36)  →