←  Numbers (11/36)  →
1. Mipui chu an harsatna chungthuah LALPA hrietin an chier a, chu chu LALPAN a hriet chun a lung a'n ling a, LALPA lungsenna mei chu anni lai a hung chok a, an riebuk hnawm vel chu a kang ta dur dur a.
2. Mipui chun Mosie an ko khek a, LALPA kuomah a tongtai a, mei chu a hung rem ta a.
3. Anni lai LALPA lungsenna mei chu a chok leiin chu hmun hminga chun Tabera an inbuk a.
4. Anni laia hnam dang thang ve peihai chun sa an chak leiin, Israelhai khom chun, "Tuin am sa fak ding a mi pek ding a na?
5. Nuom nuoma Aigupta rama ngasa ei hme hlak lai hun kha ei hriet zing a, fanghma dam, vaifanghma dam, purun bal dam, purun dam le purun var dam ei hme hlak lai hun kha.
6. Tu ruok hin chu bu chakna hlak a re der a, manna chauh naw hlak chu hmu khur ei nei ta si nawh!" tiin an inhrawt ve a.
7. Manna chu maruoi mu anga var sar el, thing hnai anga entlang thei a nih.
8. Mihai chun an va rut khawm a, a rawt nawinaah an rawt nawi naw leh sumah an suk nawi a, belah an suong a, bei damin an siem a, a'n hnik dan chu oliv hrieka bei zeu ang a nih.
9. An riebuk hmuna zana daidaw a tlak pha manna chu a tla sa ve hlak a nih.
10. A sung sungin an puon in kotah an chier sup sup ri chu Mosien a lo hriet a. An chungah nasa takin LALPA a lungsen ti a hrietin Mosie chu a lungzing hle a.
11. LALPA kuomah, "Hi buoina hi ieng leia i siehlaw chungah i hung intlun am a na? I lawm naw zawng ieng am ka thaw a, hienga mipuihai phurrik po po ka chungah i'n nghat el hi?
12. Hieng mipuihai hi ka hring tawl am an ni? An pi le puhai kuoma inkham meua pek i tiem rama chun nuin nautesen a pom anga pom tlung tawl dingin ieng dinga i mi ti am a na?
13. Hieng mipuihai fak ding hi khaw laia inthokin am sa chu hmu tang ka ta? 'Sa mi pe rawh' tia an mi'n hrawt khum ri hlak hi a re top si nawh.
14. Keima ringot chun hieng mihai hi ka phur zo naw a nih, ka chung a rik taluo.
15. Hieng hi i mi thaw dan ding a ni chun tu hin mi sukhlum nghal el rawh; i mit ka tlung a ni ruok chun, ka sietna ding mi'n hmasuontir lul naw rawh" a ta.
16. LALPA chun Mosie kuomah, "Israel mipuihai hotu le enkoltu nia i ngai upa sawmsari ko khawm la, Intuokna Puon inah ka hmaa nang le ngir tlang dingin hung thuoi tawl rawh.
17. Hung tum ka ta, inbiekpui ka ti che a, nangmaa um Thlarau kha lain an chungah Thlarau chu sie veng ka ta, mipui phurrik chu nangma chaua phur ta loin anni chun phurpui tang an ti che.
18. "Mipuihai chu hieng ang hin hril rawh: 'Zingah sa in fak ding a na, chu huna ding chun inser thienghlim ro. 'Sa fak ding tuin am mi pe tang a ta? Aigupta rama khan ei hnienghnar vei leh!' tia in inhrawt ri kha LALPAN a hriet tah. Sa chu LALPAN peng a ti cheu a, fa mol in tih.
19. Ni khat ni hni sung chauh amanih, ni nga amanih, ni sawm amanih le ni sawmhni amanih sung chauh fa loin,
20. thla khat pumhlum top, ngei rak khop le luok suok rak khopin fang in tih, nangni laia um LALPA chu hnawl a, 'Ieng leia Aigupta kha ei suoksan am a na?' tia a hmaah in inhrawt leiin' ti rawh" a ta.
21. Mosie chun a kuomah, "Hi taka ka mi thuoihai hi mani kea fe thei ngot khom nuoi ruk an na, 'Thla khat pumhlum fak ding sa peng ka ti cheu' i ta,
22. bawng ruol le beram ruol khom hi that vong inla, an fak khop a ni ding am a ni? Tuipuia nga khom man ta vong inla, an khopkham a tling ding maw?" a ta.
23. LALPA chun Mosie kuomah, "LALPA ban a tawi taluo a ni? Ka hril anga i chunga a tlung le tlung naw la hmung i tih" a ta.
24. Chuongchun Mosie chu a suok a, LALPA thu chu mipuihai a hril a. Upa sawmsarihai chu a ko khawm a, Puon In chu a'n ngir huoltir a.
25. LALPA chu sumah a hung tum a, Mosie chu a biek a, amaa Thlarau a sie chu lain upa sawmsarihai chunga chun chu Thlarau chu a sie a, an chunga Thlarau a hung um charin zawlnei angin thu an hril duol duol a, sienkhom chuong ang chun a hnungin an thaw nawk ta ngai nawh.f
26. Upahai laia tiem sa, Eldad le Medad hai ruok chu Puon Inah fe ve loin an riebukah an um a, chuong sa khom chun thlarau chu an chungah a um ve a, riebuka chun thu an hril ve mol mol a.
27. Chuongchun, tlangval pakhat chu a tlan a, Mosie kuomah, "Eldad le Medad-in riebukah thu an hril mol mol el" tiin a va hril a.
28. Nun naupa Josua, a tleirawl laia inthoka Mosie kaiza vengtua thang tah chun, "Pu Mosie, khap tawl rawh" a ta.
29. Mosie chun, "Keima leiin thikthu i lo suksiet vieu a ni maw? LALPA chun a thlarau mi po po pe sien, zawlnei ni vong hai sien ka ti nak lai a!" a ta.
30. Chuongchun, Mosie le Israel upahai chu riebuk tieng an kir nawk a.
31. Chun, LALPA chun thli a'n hrangtir a, tuipuia inthokin vamim ruol chu a hung fen khawm a, meter khat vel chauha insanga vuongin an riebuk le a sir vel, ni khat lam dapin an hung tum a.
32. Chu ni le a zan le a zinga chen chun mipui chu fe suokin vamim chu an man khawm a, a man tlawm tak khomin kilogram sang chuong a rut a, riebuk vela chun an inhro thluk a.
33. Sa chu an fak lai zing, an la fak zo hma chun LALPA lung a hung inling a, mipuihai chu hripui na takin a hrem a.
34. Sa inrawp leia thihai chu chu taka chun an phum leiin a hmun hmingah Kibrot Hatava an inbuk a.
35. Kibrot Hatavaa inthok chun Hazerot an pan a, chu taka chun an cham a.
←  Numbers (11/36)  →