← Numbers (10/36) → |
1. | Chun, LALPA chun Mosie a biek a, |
2. | "Mipuihai ko khawmna ding le riebuk inson ding phaa.inhriettirnaa hmang dingin tangkaruoin tawtawrawt pahni insuttir rawh. |
3. | Chu chu an mut kop chun mipui po po i kuomah Intuokna Puon in kot bulah an hung tlan khawm vong ding a nih. |
4. | Pakhat chauh an mut chun, Israel pahnam tina lukhaituhai chauh i hmaah an hung khawm ding a nih. |
5. | Chun, ralkhel ri anga an mut chun suo tienga um hai chu an suok ding a nih. |
6. | Ral khel ri anga an mut voi hninaah sim tienga umhai an suok ding a nih. Ralkhel ri chu inthok suok ding ti hrilna a nih. |
7. | Mipui ko khawmna dinga in mut pha ruok chu ralkhel ri angin mut naw ro. |
8. | "Aron le a thla thiempuhai hi tawtawrawt muttu ding chu an nih. Hi hi nangni le in thlahai chena in kumkhaw thaw dan ding chu a nih. |
9. | In rama in hmelma, neksawrtuhai cheu do dinga in suok ding pha leh ralkhel mutin tawtawrawt in mut ding a nih. Chuong anga in thaw chun LALPA in Pathienin hre zing a ti cheu a, hmelmahai lakah san suok a ti cheu. |
10. | Chun, in hlim ni, a hunbia in kut chang le thla thar lawmna in nei chang dam le pumraw thilhlan le inremna thilhlan in thaw changin in mut hlak bok ding a nih. Chu chu in Pathien hmaa hriet in ni zingna ding a nih. Kei hi LALPA, in Pathien chu ka nih. |
11. | Kum hnina, thla hnina, ni sawmhninaa chun sum chu Thuthlung biekbuk chunga inthokin a'n kang tung a. |
12. | Chuongchun, Israel thlahai chu Sinai thlalera inthokin an inthok suok a, hmun hrang hrang an fe pel hnungin, sum chu Paran thlalerah a ngir a. |
13. | Hi hi Mosie hmanga LALPA thupeka an inthok suok hmasakna tak a nih. |
14. | A hmasa takin Juda thlahai chu an hnam inchikna puonzar chawiin an suok a, anni inrawitu chu Aminadab naupa Nason a nih. |
15. | Isakar thlahai inrawitu chu Zuara naupa Nethanel a nih. |
16. | Zebulun thlahai inrawitu chu Helon naupa Eliab a nih. |
17. | Biekbuk chu an thiek a, a zawntu Gersonhai le Merarihai chun zawnin an inthok suok a. |
18. | Anni zoah Reuben thlahai chu an hnam inchikna puonzar khaiin an inthok suok a, anni inrawitu chu Sedeur naupa Elizur a nih. |
19. | Simeon thlahai inrawitu chu Zurisadai naupa Selumiel a na, |
20. | Gad thlahai inrawitu chu Deuel naupa Elisaf a nih. |
21. | Chu zoah Kohathaiin thil thienghlimhai chu phurin an inthok suok a. An hung tlung tawl hmaa biekbuk chu lo inngir ding a nih. |
22. | Anni hnungah Efraim thlahai chu an hnam inchikna puonzar khaiin an inthok suok a, anni inrawitu chu Amihud naupa Elisama a nih. |
23. | Manase hnam inrawitu chu Pedazur naupa Gamaliel a na, |
24. | Benjamin thlahai inrawitu chu Gideoni naupa Abidan a nih. |
25. | Dan thlahai chun an hnam inchikna puonzar khaiin mi po po hnung dalah an thang a, anni inrawitu chu Amisadai naupa Ahiezer a nih. |
26. | Aser thlahai inrawitu chu Okran naupa Pagiel a na, |
27. | Naftali thlahai inrawitu chu Enan naupa Ahira a nih. |
28. | Hi hi Israel thlahai an fe suok phaa indot peia an insom suok dan chu a nih. |
29. | Mosie tarpu Midian mi Reuel naupa Hobab kuoma chun Mosien, " 'Peng ka ti cheu' tia LALPAN a hrilna ram tieng pan chun kan fe ding a nih. Nangni khom hung ve unla, in chungah tha takin thawng kan tih, LALPA chun thil tha Israelhai chungah a tiem si a" a ta. |
30. | Ama chun, "Hung da el ka tih. Ka ram tieng, ka mihai kuom tieng kir nawk ka tih" a ta. |
31. | Mosie chun, "Mi fesan lul naw rawh. Thlalera riebuk khuorna ding i hriet lem a, keini ta dingin mit i ni ringot a nih. |
32. | Kan kuomah i hung ve chun LALPAN thil tha a mi pek taphot chu ei intlang ding annawm" a ta. |
33. | Chuong ang chun, LALPA tlanga inthok chun an suok a, ni thum an inzin a. LALPA Thuthlung bawm chun an ta dinga chawlna hmun remchang zongin ni thum an hma a thuoi a. |
34. | An riebuka inthoka an suok chun sunah LALPA sum chu an chungah a'n zar a. |
35. | Thuthlung bawm chu a suok ding zatin Mosien, "Aw LALPA, hung tho la,I hmelmahai chu hnot dar la,I ralhai chu i hmaah tlan se raw hai se"a ta. |
36. | A chawl ding zatin,"Aw LALPA hung kir nawk rawh,I mi Israel sang tam tak lai hin"a ti zie bok a nih. |
← Numbers (10/36) → |