←  Nehemiah (9/13)  →
1. Chu thla, ni sawmhni le pali ni chun Israel thlahai chu an pung khawm nawk a, bu ngheiin, saiip silin, luah pilvut an inphul a.
2. Israel thlahai po chu hnam danghai lakah an inthier hrang a, an suolnahai le an pi le puhai ritlona lakah thupha an chawi a.
3. Mani umna sengah an ngir a, darkar thum vel inring takin LALPA an Pathien Dan bu chu an tiem a, chu zoa darkar thum sung a hmatiemin thupha an chawi a, LALPA an Pathien chu an chawibiek a.
4. Levi mi thenkhat Jesua, Bani, Kadmiel, Sebania, Buni, Serebia, Bani le Kenani hai chu kailawnah an ngir a, rawl inring takin LALPA an Pathien chu an ko a.
5. Chun, Levi chia mi bok Jesua, Kadmiel, Bani, Hasabneia, Serebia, Hodia, Sebania le Pathahia hai chun mipui kuomah, "Ngir unla, chatuona inthoka chatuon chena LALPA in Pathien chu inpak ro" tiin an khek a.Chuongchun, Israel mipui chu hieng ang hin an tongtai a: "I hming ropui chu inpakin um sien, chawimawina le inpakna po po chungah leng raw se.
6. Nang chauh hi LALPA i nih. Vanhai, van insang takhai le a sunga um arasi po po le leihnuoi le a sunga um po po le tuifinriet le a sunga um po pohai chu nangin i siem a. Iengkim hi hringna i pek a, van leng ruolin an chawibiek hlak che.
7. "Nang chu LALPA Pathien, Abram thlangtu, Kaldai ram Ur-a inthoka thuoi suoktu le a hminga Abraham saktu i nih.
8. A lungril chu i lakah ringumin i hriet a, Kanan hai, Hit hai, Amor hai, Periz hai, Jebu hai le Girgas hai ram chu a thlahai kuoma rochung dingin thu i thlungpui a, i fel leiin i thutiem chu i hlen ngei bok a.
9. "Aigupta rama kan pi le puhai rinum tuor chu i hmu a, Tuipui Sena an kona che rawl chu i ngaithlak a.
10. Aigupta mihaiin hmusit taka an soisak i hmu zing leiin, Faraw le a siehlaw po pohai le a rama um po pohai chungah inchiknahai le thilmakhai i'n langtir a, chuong ang chun tu chen hin hming i siem a.
11. An hmaah tuipui chu i suktan a, hnuoi hulah an fe thleng a, a hung hnottuhai ruok chu lipuia lung thlak ang elin tuipui inthukah i pei hmang tawl a.
12. Sunah sum lawnin i thuoi a, zanah an fena lampui elvartu dingin mei lawnin i thuoi bok a.
13. "Sinai tlangah i hung tum a, vana inthokin an kuomah thu i hril a. Rorelna indik le fel, dan indik le fel le thuruot le thupek tha takhai chu i pek a.
14. I chawlni thienghlim chu anni i'n hriettir a, i siehlaw Mosie hmangin thupek hai, thuruot hai le dan hai chu i pek a.
15. An phingtam pha vana inthokin bu i pek a, an dangchar pha lungpuia inthokin tui i pek bok a. Kut phar meua an kuoma pek i tiem rama chun luta rochung dingin i hril a.
16. "Sienkhom, kan pi le puhai chun chapo takin lulul an insuo a, i thupek an zawm nuom nawh.
17. I thu an ngaithlak nuom naw a, anni laia thilmak i thawpekhai khom an hriet zing nuom ta nawh. Lulul takin an um a, an hel a, bawia an intangna tienga thuoi kir nawktu dingin hotu an ruot ta lem a. Nisienlakhom, nang chu ngaidam dinga inpei zing Pathien, mi lunginsiet thei tak, lainatna hau tak, lungsen mei mei lo le hmangainaa sip i ni a,
18. bawngtuoi lem siem a, 'Hi hi a nih Aigupta rama inthoka thuoi suoktu cheu in Pathien chu' tia tirdakum taka i hming an hril siet lai khom khan anni chu i thlathlam chuong nawh.
19. "I ngilneina nasa tak leiin anni chu thlalera khan i thlathlam chuong naw a, an lampuia suna thuoitu sum lawn chun a maksan naw a, zana an lampui elvartu mei lawn chun a maksan ngai bok nawh.
20. Anni inchuktirtu dingin i Thlarau tha tak chu i tir a, an phingtamin vana inthoka manna pek i thul naw a, an dangchar khomin tui pek i thul chuong bok nawh.
21. Kum sawmli sung zet thlalerah i chawm tawl a, ieng khom an tlasam naw a, an silfenhai a tiek naw a, an kehai a'n vung bok nawh.
22. "Lalramhai le hnam danghai chu an kutah i pek a, ram hla le kilkhawr chenin an ram i zauhpek a. Hesbon lal Sihon ramhai le Basan lal Oga ramhai chu an hluo a.
23. An thlahai chu vana arasi anga tamin i sukpung a, an hluo dinga an pi le puhai kuoma i lo hril tah rama chun i thuoi lut a.
24. An thlahai chun ram chu an hluo a, nangin chu rama um Kanan mihai chu an hmaah i suktlawm a, an nuom nuoma thaw dingin an lalhai le chu rama umhai chu an kutah i pek a.
25. Kul nei khuohai le ram tha tak tak hai chu an lak a, thil tha tinrenga sip inhai an hluo a, tuikhur cho sa hai, grep huon hai, oliv huon hai le thei kung bil tam tak an hung nei a, tlai takin an infak thau a, i thatna nasa tak chungah inhoi an chen a.
26. "Sienkhom thu an awi naw a, i lakah an hel a, i danhai chu an hnung son a. Nangma tienga kir nawk dinga ziltu zawlneihai chu an that a, nangma hrilsietna thil tirdakum tak tak an thaw a.
27. Chuongchun, suknomnatna tuor dingin an hmelmahai kutah i pek suok tawl a. Chuonga sawrdea an um phing leh nangma chu an hung ko che a, vana inthokin i lo ngaithlak a, i ngilneina nasa tak leiin sansuoktuhai i pek a, an hmelmahai kuta inthokin an san suok a.
28. "Amiruokchu, muongleia an um charin i mithmuah thil tha lo an thaw zui nawk nghal a. Chuongchun, an hmelmahai hnuoia kun dingin an kutah i pek a. An hung ko pha che leh vana inthokin i lo ngaithlak a, voi tam tak i ngilneina leiin i san suok tawl hlak a.
29. "Chun, i Danhai zawma hung kir nawk dingin i zil hlak a, sienkhom chapo takin thil an thaw a, i thupekhai an pom naw a, a zawmtuin a hringpui ngei ding i rorelnahai chu kalin thil suol an thaw a, tuklul insuoin tukkhum an innghat che a, an insuklulul a, an ngaithlak nuom nawh.
30. Kum tam tak chu an chungah i dawthei a, i Thlarau chun zawlneihai hmangin i zil ngat ngat a, an poisa chuong si naw leiin an tuolbawmhai kutah i pek tawl a.
31. Sienkhom, i ngilneina nasa tak leiin anni chu i sukchimit phal naw a, i thlathlam song ngai bok nawh.
32. "Chuleiin, kan Pathien, Pathien ropui, iengkimthawthei le rapum, i thuthlung hlena lunginsietna suklang hlaktu chun keini chunga le kan lal hai, mi lien hai, thiempu hai, zawlnei hai, kan pi le pu hai le i mi hai po po chunga Asuria lalhai inlal laia inthoka tu chena rinumna hung tlung zozai hi thil chin thamah mi ngaipek naw hram rawh.
33. Ieng khom ni sienla, kan chunga thil hung tlung po poa hin nang chu i fel a, indik takin thil i thaw a, keini ruok chun thil tha naw takin kan thaw hlak a nih.
34. Kan lal hai, kan mi lien hai, kan thiempu hai, kan pi le pu hai khomin i dan an lo zawm naw a, i thupek le i thu inhriettirhai le anni i zilnahai chu an lo pom bok nawh.
35. An chunga i hang that em em vei leh, an ram, ram lien tak le tha tak i peka chun i rong an bawlpek naw che a, an thil suol thaw an ma chuong bok nawh.
36. Ngai ta, tu ruok hin chu bawi kan lo ni ta a, kan pi le puhai tlan dinga a ram tharsuok thil tha i pek rama hin bawi kan lo ni tah.
37. Kan suol leia kan chunga lala i ruothai chun a ram tharsuokhai chu an hui vong a, kan taksa le kan ranhai chunga chen khom an nuom nuomin thu an nei a, kan bei a dong em em a nih.
38. "Chuong po po kan chunga thil hung tlunghai lei chun i kuomah ziek ngeiin thu khun takin kan thlung a, chu chu kan mi lien hai, Levi chi hai le thiempu haiin suoi namin an mi hrietpui a nih" tiin.
←  Nehemiah (9/13)  →