←  Nehemiah (8/13)  →
1. Thla sarina, favang laihawlaf mani khuo senga Israelhai an inbengbel hnung chun, mi po po chu zai khata luongin Tuikul Kotkharpui bula tuolzawla chun an pungkhawm a. LALPAN Israelhai zawm dinga thu a pek, Mosie Dan bu chu hung laa tiem dingin lekha ziektu Ezra chu an ngen a.
2. Chuongchun, thla sarina ni khat ni chun thiempu Ezra chun nu tling pa tling pungkhawmhai le a hre thiem thei chin awm po hmaa chun Dan bu chu a hung chawi a.
3. Tuikul Kotkharpui khela tuolzawl tieng chu nghain, zing tienga inthoka sun chang chenin mi po po hriet theia inringin Dan thu chu a tiem a, mipui chun ngun takin an ngaithlak thup a.
4. Chu huna dinga tham an dawa chun lekha ziektu Ezra chu a ngir a. A chang tieng chun Matithia hai, Sema hai, Anaia hai, Uria hai, Hilkia hai le Maaseia hai an ngir a. A voi tieng chun Pedaia hai, Misael hai, Malkija hai, Hasum hai, Hasbadana hai, Zekaria hai le Mesulam hai an ngir bok a.
5. Ezra chun mi po po hmuah lekhabu ziel chu a hang sut a. Mipui neka insanga ngir a ni leiin an hmu thei vong a, a sut lai chun mipui chu an ngir vong a.
6. Ezra chun LALPA, Pathien ropui tak chu a'n pak a, mipui po po chun ban pharin, "Amen, Amen" tiin an lo don a, hnuoi sika kunin LALPA an chawibiek a.
7. Levi mi Jesua hai, Bani hai, Serebia hai, Jamin hai, Akub hai, Sabethai hai, Hodia hai, Maaseia hai, Kelita hai, Azaria hai, Jozabad hai, Hanan hai le Pelaia hai chun mipui ngirhai chu dan thu an hrilfie a.
8. Pathien Dan bu chu an tiem a, tlar tin umzie chu an hriet thiem vong theina dingin an tiem non a, chieng takin an hrilfie pei a.
9. Dan thu an hang hriet chun mipui chu an tap mur mur leiin ram optu Nehemia hai, thiempu le lekha ziektu Ezra hai le mipui inchuktirtu Levi hai chun mipui kuomah, "Voisun hi LALPA in Pathien ta dinga ni thienghlim a na, thla suksieta tap hun a ni nawh" an ta.
10. Nehemia chun, "Fe unla, ruoi inhnik hnik fain, dawn ding a thlum thlum dawn unla, ieng khom buotsai ve nawhai khom sem ve ro. Voisun hi LALPA ta dinga ni thienghlim a nih. Lungngaiin um naw ro, LALPA lawmna chu in hratna a ni si a" a ta.
11. Levihai khomin mipui kuomah, "To unla, tap ta naw ro. Voisun hi ni thienghlim a nih. Lungngai naw ro" tiin an lo zap dei a.
12. Chuongchun, mihai chu in tieng an inlawi a, hlim taka fain an dawn a, mi danghai khom an nei ang ang chu an pek a, an kuoma Dan thu an tiem kha ngaithlaa an lo hriet leiin an lawm a nih.
13. Chun, chu thla ni hninaag chun sungkuo tina lukhaituhai le thiempuhai le Levihai chu dan thu inchuk dingin lekha ziektu Ezra kuomah an fe khawm a.
14. Dan thu an inchuk a, thla sarinaa kut an hmang lai chun Israel thlahai chu sawlbukah an um ding a nih ti LALPAN Mosie hmanga thu a pek chu an hmu suok a.
15. "Tlangah hang fe unla, danin a phut anga kut hmang sunga umna ding sawlbuk bawlna ding oliv kau dam, ruon kau dam, inhmui kau dam, tum kau dam le thingbuk kau dam hang la ro" tia khuo po po le Jerusalema tlang insamtir dinga thu a pek dam chu an tiem suok a.
16. Chuongchun, mipuihai chu an inthok suok a, an va lak a, mi po poin an in chunga dam, an tuol kota dam, Pathien Tempul kota dam, Tuikul Kotkharpui tuolzawla dam, Efraim Kotkharpui tuolzawl lien tak laia dam sawlbuk an bawl fek fuk a.
17. Saltang hung kir po po chu kar khat sung sawlbuka chun an riek a, lawmnain an sip a. Nuna naupa Josua thia inthoka Israel thlahaiin Bawkte Kut chuong anga an hmang nawk hmasakna tak a nih.
18. Ni tinin ni sari an kut sung po chun Pathien Dan bua mi chu Ezra-in a tiem a. A ni rietna ni, kut tumtiek ni chun Mosie thupek angin, inkhawmpui ursun takin an nei a.
←  Nehemiah (8/13)  →