←  Nehemiah (6/13)  →
1. Kul kotkharpuia kotkharhai kan la'n buk hman nawa chu kul chu a popna lai um der loin kan indin thar nawk tah ti Sanbalat hai, Tobia hai, Arab mi Gesem hai le kan hmelma danghai chun an lo hriet a.
2. Chuongchun, Sanbalat le Gesem chun, "Hung la, Ono phaia khaw pakhatah intuok khawm ei tiu" tiin thu an hung incha a. Nisienkhom, ka chungah thil tha lo thaw tum an lo ni zing si a.
3. Kei chun, "Sin poimaw tak ka thaw lai a na, hung thla hman naw ning. In kuoma ka hung thlak sungin ieng leiin am ka kut a chawl el ding a na?" ti hril dingin an kuomah mi ka tir a.
4. Chuong ang chun voi li thu pangngai ngot an hung thon a, ka don hmasak ang charin ka don pei a.
5. A voi nganaa chun Sanbalat bokin lekhathon char lo hi a siehlaw a hung inchawitir a.
6. Chu lekhaa chun, "Gesem-in a fena taphotah nang le Judahaiin hel in tum leia kul in bawl that thu a hril thang nasatzie a mi hril a. A hril pei dan chun, nang hi an lal ni i tum a ni awm a.
7. Chun, Jerusalemah, 'En tu, Judai ramah lal a um zing annawm' tia puongtu ding zawlnei khom i ruot tah ti thu a hril bok a. Hieng thu hin lal kuom a tlung ngei ding a nih ti hre zingin, hung la, thil umzie hril tlang ei tih" ti thu hi a chuong a.
8. Chuongchun, a kuomah, "I hril ang hin thil a um nawh ti le i phuok fawm el a nizie chu nangma ngei a hretu i nih" tiin a donna ka thon a.
9. Mi hril ti vel a, kan thilthaw mi'n thultir thei an inbeisei leia an thaw a ni si a. Chuongchun, Pathien kuomah ka kut mi sukhratpek pei dingin ka tongtai a.
10. Chu hnung chun Mehetabel naupa Delaia naupa Semaia, suok invak thei ta lo chu a inah ka va kan a. Ama chun, "LALPA Tempul sungah inhmung ei ta, kot inkal khum tlat ei tih. Voizan hin nangma that tumin i hmelmahai an hung ding a nih" a ta.
11. Kei chun, "Keima ang ngirhmuna ngir si tu am a na tlanse ding chu? Keima ngirhmun ang chel si hi himna zongin Tempulah a tlan lut ding maw? Chu chu thaw naw top ka tih" ka ta.
12. Ka hang hriet suok chun ama chu Pathien tir ni loin Tobia le Sanbalat-in an lo ruoi leia ka sietna dinga chuong thu chu a hril a lo ni zing a.
13. Mi sukzam a, a thu mi'n zawmtir a, suol mi'n thawtir a, mi sukhmingsiet tuma an lo ruoi a nih.
14. Aw ka Pathien, Tobia le Sanbalat haiin thil suol an thaw po po hi hre zing la, zawlnei Noadia le ama nu ang boka zawlnei dang mi sukzam tumtuhai po po khom hre zing tawl rawh.
15. Chuongchun, kan tana inthoka ni sawmnga le ni hnina, Elul thla ni sawmhni le pangana chun kul chu bawl zo a ni ta a.
16. Kan kawl le kienga kan hmelmahai le hnam danghaiin an hriet chun an mi ti a, an zam bok a, kan Pathien thangpuina leia kan hlen a nih ti an hriet vong si a.
17. Chu bakah, ni sawmnga le ni hni sung chun Judai rama thoktuhai le Tobia chu lekha an lo inthon tuo rawn hle a.
18. Tobia chu Ara naupa Sekania makpa a ni leiin ama chunga ringum dingin Juda mi tam takin thu an lo tiem ta a, chu baka chun a naupa Jehohananin Berekia naupa Mesulam naunu chu nuhmeiah a nei bok a.
19. Tobia thilthaw thathai chu ka hrietah an hril an hril hlak a, ka hril iengkim chu a kuomah an hril sawng bok a. Chuleiin, Tobia chun mi sukzam tumin inthina lekha a mi hung thon hlak a nih.
←  Nehemiah (6/13)  →