←  Nehemiah (5/13)  →
1. Chuong lai chun pasal ruol le an nuhmeihai chu ka kuomah an hung a, an unau Judahai chungah nasa takin an chier a.
2. A thenin, "Keini sungkuo hi kan tam a, kan fak khop inchawkna ding sum tam lem kan mamaw a nih" an ta.
3. A then ruok chun, "Tam laia bu inchawkna dingin kan in le lo le grep huonhai kan banda zo vong tah" an hung ti a.
4. A then nawk chun, "Lal kuoma sie chawi ding sum kan puk aiah kan lo le grep huon hai dakhamah kan sie ta a.
5. Juda mi kan ni ve a, kan nauhai khom Juda dang nauhai ang bok an ni ve naw am a ni? Sienkhom, kan nauhai chu Juda mi bok bawia kan sie a lo ngai ta hiel a. Kan naunuhai a then lem chu bawiah an lut der tah. Kan lo le grep huonhai hlak mi dangin an mi neipek zo ta bok si, chet ngaina a um ta naw a nih" an hung ti a.
6. An chierna thu ka hriet chun ka lung a sen hle a.
7. An ngirhmun chu ka ngaituo neu neu hnungin an mi lunhai le roreltuhai kuomah, "In unauhai a pung uma sum in inpuktir hin anni chu in sawrde a nih" tiin ka khak a. Chu chungchang ngaituo ding chun vantlang inkhawm ka ko a.
8. An kuomah " Hnam danghai kuoma inzor tah ei unau Judahai chu ei thei ang angina ei intlan hram hram hlak a. Tu hin nangnin in unauhai chu ei intlan nawk ngai dingin bawiah in siem nawk tum a ni hih" ka ta. An to chip a, tu khomin an mi don nawh.
9. Chuongchun, ka hril zom pei a, "In thilthaw hi thil indik a ni nawh. Ei hmelma hnam danghai mi endong ding vengna lei bekin ei Pathien hi ei ti naw ding am a ni?
10. Keima ngei le ka unauhai le ka hnuoia sinthawtuhai hin a pung umin sum le bu dam ei unauhai kuomah ei inpuktir hlak a, hi hi bansan ei tiu khai.
11. Voisun ngei hin an in le lohai, an grep huonhai le oliv huonhai chu pe kir nawk unla, sum le bu le uoiin le oliv hriek in lo inpuktira inthoka a pung po kha pe kir nawk hram ro" ka ti bok a.
12. Anni chun, "Pe kir nawk vong kan ta, an lakah ieng khom phut nawng kan ta, i ti ang tak chun thawng kan tih" an ta. Chu phing leh thiempuhai chu ka ko a, mi lunhai le roreltuhai chu thu an intiem tah anga thaw dingin intiemkamna ka'n neitir a.
13. Chun, ka zakuo fuol hmawr chu ka thin a, "In thu tiem anga in thaw naw a ni chun in in le loa inthokin Pathienin thin thla ve raw se cheu" ka ta. Pungkhawm po po chun, "Amen" an ta, LALPA an inpak a. Mipuihai chun an thutiem angin an thaw a.
14. Chu bakah Lal Artazerzia inlal kum sawhninaa inthoka kum sawmthum le kum hnina chen, a rengin kum sawm le kum hni sung chu Judai ram optu ka ni a, chu sung chun keima le ka hnuoia thoktuhaiin kan chan ding lal busung voi khat khom kan lak ve nawh.
15. Keini hmaa ram optuhai chun mipuihai chung an sukrik thei hle a, an ni tin fak ding bu le dawn ding uoiin an intumtir bakah tangkaruo shekel sawmli an lakpek hlak a; an hnuoia thoktuhai chen mipui chungah an insuklal thei hle hlak. Sienkhom kei ruok chun Pathien ka ti leiin chuong ang chun ka thaw ve ngai nawh.
16. Chuong chu thaw nek hmanin, kul bawlah ka'n hmang char char lem a, ram hlekte khom ka'n chawk naw a, ka hnuoia thoktuhai po po khom kul bawla inhmang tlat dingin ka ngiet a.
17. Chu baka chun, kan kawl le kienga ram dang mikhuol ka donghai bakah Judahai le roreltuhai laia mi ka dawkana thlaithleng kil hlak za le sawmnga an um zing a.
18. Ni khata dinga kan khorsaw chu bawng pakhat le beram tha chi ngot paruk le ar tam tak a na, ni sawm dan zatah uoiin chi hrang hrang kan mamaw teuh bok a. Amiruokchu, mipui an harsa em leiin ram optu ka nina puola fak le dawn ka dong dinghai chu ka phut ve ngai hrim hrim nawh.
19. Aw ka Pathien, hieng mihai ta dinga ka thaw po po hi ka thatna dingin mi hrepek zing rawh.
←  Nehemiah (5/13)  →