←  Nehemiah (3/13)  →
1. Chuongchun, thiempu lal Eliasib le a unau thiempuhai chu an inthok a, Beram Kotkharpui chu an siem tan a, an inhlan thienghlim a, a kotkharhai an siem tha a, a kul bang khom Insang Zakhatnaa inthoka Hananel Insang chen an bawl pei a, an inhlan thienghlim a.
2. A dot chara mi chu Jeriko mihaiin an bawl a, chu dota mi chu Imri naupa Zakur rawiin an bawl a.
3. Nga Kotkharpui chu Hasena thlahaiin an siem tha a, a kotkhar bienghai an inbuk a, a kotkhar an inbuk a, a kalna le thir tluon inbatnahai an siem tha vong a.
4. A dota mi chu Hakoz naupa Uria naupa Meremot rawiin an siem tha a, a dota mi chu Mesezabel naupa Berekia naupa Mesulam rawiin an siem tha a, chu dota mi chu Baana naupa Zadok rawiin a siem tha a.
5. Chu khela mi chu Tekoa khaw mihaiin an siem tha a, sienkhom an mi lienhai ruok chun an thangpui nuom ve nawh.
6. Khawhlui Kotkharpui chu Pasea naupa Joiada le Besodeia naupa Mesulam hai rawiin an siem tha a, a kotkhar bieng hai, a kotkhar hai, a kalna le thir tluon inbukna hai chu an siem tha vong a.
7. Anni khela mi chu Gibeon mi Melatia hai, Meronot mi Jadon hai le, Eufretis vadung thlang tieng biel optu hmunpui Gibeon le Mizpa khuoa mihaiin an siem tha a.
8. A dota mi chu rangkachak sertu laia mi Harhaia naupa Uziel rawiin an siem tha a, chu dota mi chu Hanania, rimtui siemtu laia mi rawiin an siem tha a. Chuong ang chun Jerusalem kul chu a Bang Sei chenin an bawl tha a.
9. Chun, anni dota mi chu Jerusalem biel chenve hotu Hura naupa Refaia rawiin an siem tha a.
10. Anni zawna mi chu Harumaf naupa Jedaia rawiin an siem tha a, chu khela mi chu Hasabneia naupa Hatus rawiin an siem tha a.
11. Chu khela mi chu Thuk Insang chenin Harim naupa Malkija le Pahat-Moab naupa Hasub rawiin an siem tha a.
12. Chu khela mi chu Jerusalem biel chenve optu Halohes naupa Salum le a naunuhaiin an siem tha a.
13. Ruom Kotkharpui chu Hanun rawiin Zanoa khuoa chenghaiin an siem tha a. A kotkhar bieng an rem tha vong a, a kotkhar an inbuk a, a kalna le thir tluon inbatnahai an thlak vong a. Chun, Ruom Kotkharpuia inthoka Hnawlhnok Kotkharpui, meter zali sawmlia sei kul bang chu an bawl tha bok a.
14. Hnawlhnok Kotkharpui chu Beth Hakerem biel optu Rekab naupa Malkija rawiin an siem tha a, a kotkharhai a thlak vong a, a kot kalna le thir tluon inbatnahai chu a siem tha vong bok a.
15. Mizpa biel optu Kol-Hoze naupa Salun rawiin Tuikul Kotkharpui chu an siem tha a, a chung khum an siem a, kotkharhai le a kalna le a thir tluon inbatnahai po po chu a tharin an thlak vong a. Chun, Lal Huon bula Siloam Dil inhuonna banghai chu Davida khuoa inthok zuk pan thlakna kailawn chenin a bawl tha vong a.
16. Chu khela mi, Davida thlan epa tuiting le Mihrang Run chenin Beth-Zur biel chenve optu Nehemia naupa Azbuk rawiin an bawl tha bok a.
17. A dota mi chu Levi chia mi Bani naupa Rehum inrawina hnuoiah an siem tha a. Chu khela mi chu Keila biel chenve optu Hasabia chun ama biel hmingin a siem tha a.
18. A dota mi chu a unauhai, Keila biel chenve optu Henadad naupa Binui (Bavai) rawiin an siem tha a.
19. A dota mi chu Mizpaa roreltu Jesua naupa Ezer chun kul kawinaa inthoka ralthuom siena hmun hang pan tungna zawn lai chen chu a bawl tha a.
20. A dota mi chu Zabai naupa Baruk chun thahnemngai takin kul kawinaa inthoka thiempu lal Eliasib in kotkhar chenin a bawl tha a.
21. A dot chu Hakoz naupa, Uria naupa Meremot-in thiempu Eliasib kotkhara inthoka a tawp chen chu a bawl tha bok a.
22. Chu khela mi chu a se vela thiempuhaiin an bawl tha a.
23. Anni dota mi chu Benjamin le Hasub rawihaiin an bawl tha a, anni dota mi chu Anania naupa Maseia naupa Azaria rawiin ama in bul po chu an bawl tha a.
24. A dota mi chu Henadad naupa Binui chun Azaria ina inthoka a kul kil chen a bawl tha a,
25. Uzai naupa Palal chun kul kawi tanna epa lal in chuonchunga inthoka Insang Lor zawn chen chu a bawl tha a. A dota mi chu Paros naupa Pedaia chun a bawl tha a.
26. Ofel muola um tempula thoktuhai chun sak tienga Tuikul Kotkharpui zawn chen le insang lor chenin an bawl tha a.
27. A dota mi chu Tekoa inthoka hunghaiin Insang Lor danga inthoka Ofel muola kul bang chen an bawl tha bok a.
28. Sakor Kotkharpui chung tieng chu thiempuhaiin mani in zawn seng an bawl tha a.
29. Anni dota chun Imer naupa Zadok rawiin ama in zawn po chu an bawl tha a. A dot chu Sak Kotkharpui vengtu Sekania naupa Semaia rawiin an bawl tha a.
30. A dot chu Selemia naupa Hanania le Zalaf naupahai laia parukna Hanun rawiin an bawl tha a. A dot chu Berekia naupa Mesulam rawiin ama in zawn po an bawl tha a.
31. A dot chu rangkachak sertu laia mi Malkija rawiin Enfiena Kotkharpui zawna tempula sinthawtuhai le sumdawnghai umna chen le a kil pan tungna chen an bawl tha a.
32. A kil pan tungna le Beram Kotkharpui inkar po chu rangkachak sertu le sumdawnghaiin an bawl tha bok a.
←  Nehemiah (3/13)  →