←  Nehemiah (2/13)  →
1. Lal Artazerzia inlala inthoka kum sawmhnina Nisan thla, thal intan hlim lai chun lal dawn ding uoiin an hung lak chu lal ka va pek a. Kha hma khan lungngai hmel ka put ngai naw a.
2. Lal chun ka kuomah, "Damnawna nei si loin i hmel a va hang ngui ngei de! Thil dang rak ni naw nih, lungzingna i nei a ni hih" a ta, ka ti ta hle el a.
3. Amiruokchu lal kuomah, "Lal chu kumkhuoin dam zing raw se. Ka thlatuhai ruong zalna khawpui a tlu ram zo a, a kotkharhai khom a kang ut vong ta si chun ieng leiin am hmel hlim ka put thei ding a na?" ka ta.
4. Lal chun, "Iem a na i dit chu?" a ta, chuongchun van Pathien kuomah ka tongtai a.
5. Chun, lal kuomah, "Lal remti zawng a ni a, i siehlaw hin lal mit a tlung a ni chun, Judai rama ka thlatuhai ruong zalnaa ka fe mi phalpek la, khuo chu hang indin thar nawk ka tih" ka ta.
6. Lalnu bula inthung lal chun, "Ieng chen am i thang ngai a ta? Ieng tik am hung kir nawk thei i ta?" a ta. Lal chun lawm takin ka fe a mi phalpek a, ka suok hun ding khom chu ka sukfel a.
7. Chu baka chun lal kuomah, "Lal remti zawng a ni chun, Judai ram ka tlung chena him taka mi veng dinga hrilna lekha Eufretis vadung thlang tieng biela roreltuhai kuomah mi ziekpek sien.
8. Chun, tempul vela kul kotkharhai siemna ding le kulbing bang rela hmang ding bakah keima in bawlna dingin thing ka mamaw ding a ni leiin lal thing bil enkoltu Asaf kuomah thing mi pe dinga hrilna lekha mi ziekpek bok sien ka nuom khop el" ka ta. LALPA ditsakna kut chu ka chungah a um leiin lal chun ka hni po po chu a mi phalpek vong a.
9. Chuongchun, Eufretis vadung thlang tieng biel optuhai kuoma chun ka fe a, lal lekhahai chu ka pek tawl a. Lal chun a mi fepui dingin sipai hotuhai le sakor chungchuong mi sipaihai a tir bok a.
10. Horon mi Sanbalat le Amon mi Tobia haiin Israel thlahai thangpui dinga ka hung tlung thu an hriet chun an lung a sen hle a.
11. Jerusalem ka hang tlung chun ni thum sung ka chawl hri phot a.
12. Chu zoah mi tlawmte chauh thuoiin zanah ka suok dok a. Jerusalem ta dinga ka thaw ding Pathienin ka lungrila a mi'n hriettir thu chu tu khom ka hril naw a, ka chuongna sabengtung chauh naw chu ran sa dang thuoi ka nei bok nawh.
13. Ruom Kotpui tieng kotkhara chun ka suok a, sihal tuikulc chu fe pelin, Hnawlhnok Kotpui tieng kan fe a, Jerusalem kul chim tahai le a kotkhar kang tahai chu kan en vel a.
14. Chu taka inthoka hung kirin, Tuikul Kotpui le Lal Dil umna kotkhar chu kan hung pel a, sienkhom kul chimin lam a dang leiin ka chuongna sabengtung chun a fe tlang thei ta naw a.
15. Chuongchun, zana chun Kidron vadung ka hraw tung ta lem a, kul chu ka en vong a, Ruom Kotpui tieng bok chun kan hung kir nawk a.
16. Khawpui optuhai chun khaw lai am ka fe a, ieng am ka thawa ti an hriet naw a, ka thil thaw tum chu Judahai, thiempu hai, thuoitu hai, thoktu hai le roreltu hai, hmalatu ding takhai khom chu tu khom ka la hril nawh.
17. Chun, an kuomah, "Ei chan sietzie hi in hmu seng a. Jerusalem chu a tlu ram ta a, a kotkharhai khom a kang hmang vong tah ti in hriet. Thaw ro, ei hmai a mawk zing nawna dingin Jerusalem hi indin thar ei tiu khai" ka ta.
18. Pathien ditsakna kut ka chunga a um dan le lal le kan inbiekna thuhai dam chu ka hril tawl a. Anni chun, "Thaw ro, indin thar nawk ei tiu" an ti ve nghal a, sin tha thaw ding chun an pu tan ta a.
19. Horon mi Sanbalat hai, Amon mi thoktu Tobia hai le Arab mi Gesem haiin chu thu chu an hrietin an mi nuisaw a, nuizatburah mi hmangin, "Iem a na nangni rawiin in thaw ta hi? Lal lakah hel tum a ni?" tiin an mi biek sisaw a.
20. Kei chun, "Van Pathien chun mi'n hlawtlingtir a tih. Keini hi a siehlawhai kan ni a, kul bang hi kan indin thar nawk ding a nih. Nangni rawi hin Jerusalemah chanvo ieng khom in nei ve naw a, thuneina amanih le neitu bul nina amanih ieng khom in nei hrim hrim bok nawh" tiin ka don tawl a.
←  Nehemiah (2/13)  →