←  Nehemiah (13/13)    
1. Chu nia mipui po po hrieta Mosie lekhabu an tiem lai chun, Pathien mihai inkhawmnaah Amon mihai le Moab mihai chu an thang ve hrim hrim ding a ni nawh ti thu a chuong a.
2. Aigupta rama inthoka Israel thlahai an hung khan dawn ding le fak ding chawia lo hmuok nekin anni hin tongsie inphurtirtu dingin Balaam an ko a, sienkhom a letlingin Pathienin malsawmnaah a'n changtir lem hlauh a nih.
3. Chuongchun, dan thu an ngaithlak zo charin anni pol soptu hnam dang po po chu inkhawmnaa inthok chun an hnot suok ta vong a.
4. Hieng thil hi a tlung hma hin Pathien tempula thil siekhawmna kudam enkoltu dingin thiempu Eliasib chu an ruot a. Eliasib le Tobia chu sawt tak an lo inpawl ngei ta hlak a.
5. Eliasib chun Tempula Levi hai, hla saktu hai le kotkhar vengtu hai chanvo dinga Mosien a lo ruot, thilpek an hung inhlan beiphit hai, rimtui hai, bur le bel hai, bu sawma pakhat hai, uoiin le hriek thar hai le thiempuhai chanvo dinga then thilhlan an hung inhlanhai po po an sie khawmnaa an hmang hlak pindan lien tak el chu Tobia a lo inhluotir a.
6. Chuong hun lai chun Jerusalemah ka um naw a, Babulon lal Artazerzia inlal kum sawmthum le kum hninaah lal kuomah ka kir nawk a, a hnungah Jerusalema kir nawk phalna ka hni chu a mi phalpek a.
7. Jerusalem tieng ka hang kir nawk chun Eliasib-in Pathien in pindan pakhata Tobia a lo inumtir chu ka hriet ve chauh a nih.
8. Ka lung a sen hle a, Tobia thuomhnaw po po chu a pindana inthok chun ka deng suok a.
9. Chu pindan chu inthien fai dingin thu ka pek a, Pathien Tempula bur le belhai chu beiphit le rimtui thilhlanhai chu sie kir nawk dingin thu ka pek a.
10. Chun, Levihai chanpuola ruot thilpekhai chu an pek that naw leiin rongbawlna tienga mawphurtu zaipawlhai le Levi chia mihai chu mani in le lo tieng seng an kir nawk deu vong tah ti ka hriet bok a.
11. Tempul an ngaisak naw leiin roreltuhai chu ka hal a, Levi chihai le zaipawlhai chu Tempulah ka ko kir a, an sin seng an thaw tan nawk ta a.
12. Juda mihai po po chun an bu hai, an uoiin thar hai le an hriek hai sawma pakhat chu tempulah an hung chawi nawk ta a.
13. Tempul kudam enkoltu dingin thiempu Selemia hai, lekha ziektu Zadok hai le Levi chi Pedaia hai chu ka ruot a. Anni thangpuitu dingin Zakur naupa Hanan, Matania tupa chu ka ruot sa bok a. Hienghai hi mi ringuma inthang an na, an sinthaw ding chu an unauhai kuoma thil inruol taka sem a nih.
14. Aw ka Pathien, hi ka thilthaw thathai lei hin mi hre zing la, ka Pathien in ta dinga indik taka ka thawhai hi mi theinghilpek naw rawh.
15. Sabat voi khat chu Judai rama mihaiin grep sawrna khura grep an chil lai ka hmu a. A thenin buphal an hung chawi a, inphurtir dinga sabengtung chunga an siem lai dam ka hmu bok a. Jerusalema zor dingin uoiin dam, grep dam, theichang dam le an tharsuok chi hrang hrang dam chu an hung phur a. Sabat nia thil an zor lei chun ka zil tawl a.
16. Tura khuoa inthoka zor ding nga le thuomhnaw hung tol pawl khom ka hmu a. Chuonghai chun Judai ram khaw hrang hrang chu hril lo, Jerusalema chen khom Sabat niin an hung zor hlak a nih.
17. Chuongchun, Juda hotuhai chu khakin, "Ieng leia hienga Sabat in sukporche am a na?
18. In pi le puhaiin hieng thil hi an lo thaw hlak leia Pathienin eini chunga le ei khawpui chunga buoina a hung intlungtir hi in la dit tawk naw am a ni? Hienga Sabat in sukporche hin Pathien lungsenna chu Israel mipuihai chungah nasa nawk zuolin in chok tho a nih" tiin ka zil tawl a.
19. Chuongchun, Zirtawp zan tieng Sabat intan an thim chara inthoka Inrinni zan tienga Sabat tawp chenin Jerusalem kul kotpui po po khar vong dingin thu ka pek a. Sabat niin thuomhnaw ieng khom Jerusalemah an hung phur lut nawna dingin kotpui tin chu ka mihai ka'n vengtir a.
20. Voi khat voi hni chu Jerusalem velah thuomhnaw phurtuhai chu an hung inkul a.
21. Sienkhom an thaw indik nawzie inhriettirin, "Ieng dinga kul bulah in hung zan riek am a na? In thaw nawk vai chun in chungah kut kan thlak ding a nih" tiin ka vau tawl a. Chu taka inthok chun Sabat ni hrim hrimin an hung nawk ta ngai nawh.
22. Levihai chu inser thieng a, Sabat thienghlimna vong dinga kul kotpuihai chu veng tlat dingin thu ka pek a.Aw ka Pathien, hi chungthua khom hin mi hre zing la, i hmangaina nasa tak zarin ka chunga hin zangaina inlangtir rawh.
23. Chuong hun lai bok chun Asdod nunghak hai, Amon nunghak hai le Moab nunghak hai chu Juda mi tam takin nuhmeiah an nei ti ka hmu suok a.
24. An nauhai a zatve chun Juda tong thiem loin Asdod tong an naw leh chuong laia hnam danghai tong chu an hmang lem a.
25. Anni chu ka khak tawl a, tongsie ka'n phur a, a then ka vuok a, an baksamah ka tham a, an naunuhai in chuonghai naupahai chu pasala inneitir lo ding le an naupahai khomin chuonghai naunuhai chu inneitir lo dingin Pathien hming salin thu ka'n khamtir tawl a.
26. Chun, an kuomah, "Israel lal Solomon ngei khom kha hieng anga innei pol thil lei hin thil suol a thaw a ni naw am a ni? Ama tluk hrim hnam danghai lai lal an um nawh. Pathienin a hmangai a, Israelhai chungah lalah a sie a ni kha. Sienkhom ama meu khom kha hnam dang nuhmeihaiin suolah an thuoi lut a nih.
27. Chuong ang chun nangni khomin thil rilo rapthlak thaw vein, Pathien chungah ringum loin, ram dang mi nuhmeiah in nei ve ding am a ni?" ka ta.
28. Thiempu lal Eliasib naupa Joiada nauhai laia pakhat chun Bet Horon mi Sanbalat naunu chu nuhmeiah a nei a, chuleiin Jerusalema inthokin ka hnot suok a.
29. Aw ka Pathien, hieng mihai hin thiempu an nina leia an ngirhmun chel chu an sukporche a, thiempuhai le Levi chihai le in thuthlung an bawsiet tawl dan hi hre zing rawh.
30. Chuong ang chun hnam dang mihai le an inpolsopna po po lakah ka'n thien thienghlim tawl a, thiempuhai le Levi chihai chu an sin ding seng le an rongbawl dan ding seng ka ruotpek a.
31. A hun taka maichama hmang ding thing an hung pek ngei dan ding le thiempuhaiin thlai thar hmasa tak an lak khawm hun dinghai khom chu ka ruotpek vong a.Aw ka Pathien, a tha tiengin mi hre zing rawh.
←  Nehemiah (13/13)