Nehemiah (1/13)  

1. Hienghai hi Hakalia naupa Nehemia thuziek a nih:Lal Artazerzia inlala inthoka kum sawmhnina Kislev thlaaa chun lal khawpui Susa kula chun ka um a.
2. Judai rama inthoka hung kir ka unauhai laia mi pakhat Hanani le mi thenkhatin an mi hung sir a. Jerusalem chanchin le Babulona saltang, Juda unau kir nawk hai chanchin dam ka'n don a.
3. Anni chun, "Saltangnaa inthoka dam khawsuok, Judai rama kir nawkhai ngirhmun chu a se khop el. Buoina le inzakna namen lo an tuok a. Jerusalem kul chu a chim se vong ta a, a kotkharhai khom a kang siet vong tah" an ta.
4. Chuong ang thu ka hriet char chun ka thung a, ka tap a. Ni iemani zat bu ngheiin ka sun a, van Pathien hmaah ka tongtai a.
5. "Aw LALPA, van Pathien, Pathien ropui le rapum, nangma hmangaia i thupek zawmtuhai chunga i hmangaina thuthlung vong zing hlaktu,
6. ka tongtaina hi mi lo ngaithlapek lul rawh. I mi Israelhai ta dinga sun le zana i kuoma i siehlaw ka hung tongtai hi mi zuk thlir la, mi hung en hram rawh khai. I lakah nasa takin kan lo suol ta a, a nih, keima sungkuo ngei khomin thil suol kan thaw ta a, thupha ka hung chawi a nih.
7. I lakah rilo takin kan lo khawsa a, i siehlaw Mosie hmanga i hril i thupek hai, thusuok hai le dan hai chu kan lo nghatsan ta si a.
8. "I siehlaw Mosie kuoma, 'Ka lakah in ringum naw chun hnam tin lai the dar ka ti cheu a,
9. sienkhom in hung inlamlet a, ka thupekhai in zawm chun, kawl kil tawp chena hnot dara umhai khom ka hming chengna dinga ka thlang hmuna chun thuoi khawm nawk vong ka ti cheu' tia i lo hril kha lunginsiet takin hre zing rawh.
10. Hienghai hi i mi le sa, thilthawtheina ropui tak le kut hrat taka i'n tlan suokhai kha an ni si a.
11. Aw LALPA, lunginsiet takin i siehlaw ka hung tongtaina le i hming inzaa hlimpuitu, i siehlawhai tongtaina hi lo ngaithla hram rawh. Voisun la la hin ditsakna ngen dinga hi lal hmaa i siehlaw ka ngir ding hi mi'n hlawtlingtir hram rawh" tiin ka hni a. Chuong lai chun kei chu lal dawn ding zu no petub ka nih.

      Nehemiah (1/13)