←  Nahum (3/3)    
1. Thisen insuo hmang khawpui,Khel le inroknaa sip,Chatlak loa sa se nei zing chu,A chung a va hang pik de aw!
2. Vuokna hmol an ri zot zot,Tawlailir ke a thum chur chur,Sakor ruol an tlan puot puot,Tawlailir an sukchawl thut!
3. Sakor chungchuong mihaiin Hma norin an tlan chur chur,Kawlhnam an vai de zok zok,An fei hmor a tle zor zor,Hliem an tlu dar rem rum a,Ruong tiem seng lo zalhai chu,An deng bum hner hnur el a,Ruongah an inpal nok nok.
4. Chuong po po chu dawithiemnu,Mi zawr thiem le hurkawngnuin,A nawchizor le dawithiem leiaHnamhai bawia a siem lei a nih.
5. Iengkim LALPA chun a hril:"Nang hi ka do che a nih.I puonbil chu i hmai chenin,Hlim tungpek ka ti che a,Hnamhai hmaah i saruokna,Lalramhai hmaah i muolphona,Ka phor lang vong ding a nih.
6. Chir thuin theng ka ti che a,Hmusit taka suknomnain,Ennuomah siem ka ti che.
7. A hmu che taphothai chun,'Ninevi a ram tah ie!Tuin am sun tang an ta?Nangma suntu ding khaw lam,Mi ka hmu zo ding a na?'Tiin tlansan an ti che"
8. Nile vadungin a huol,Thebesb nekin iem i tha lem?Vadung chu a kulpui a na,Tui chu a kul bang a nih.
9. Tluk ruol loa a hratna chu,Ethiopia le Aigupta an na,Put le Libia in an thangpui bok a.
10. Sienkhom manin a um a,Salah an intangtir a,Kotthler peng thuom tina chun,Hnuoi vuoknan naute hmangin,Indar nuoiin an peihawn a.Thumvawrin a milienhai an insem a,A mi ropuihai khaidietin an khit a.
11. Nang khom hung inrui i ta,Hmelma laka inbikna ding leInhumhimna ding zong i tih.
12. I kulpuihai po po chu,Theichang hmin hmasa sawi tilh,A fatu baua tla ang ning a tih.
13. I sipaihai hi hei en ta,Nuhmei ruol ang vong an ni hi!I hmelmahai lut theina dingin,I ram kot an hong huoi a,A kot kalna thir tluonhai chu,Meiin a kang siet ta si.
14. An inhuol ding che a nih,I dawn ding tui chawi khawl la,I kul banghai suknghet rawh.Pilpok siemin buotsai la,Lung charna ding rawt nawi la,Bang tholna ding teklei siem rawh.
15. Chuonga i siem lai ngei chun,Meiin lem hmang a ti che a,Kawlhnamin sukhlum an ti che,Thing nge angin that an ti che.Khau angin insukpung la,Khau hon angin insukpung rawh.
16. Vana arasi neka tamin,Sumdawnghan an bawr che a, Nisienlakhom khau hon angin,A ram an fak kol zo a,Chu zoah an vuong hmang a.
17. In hotuhai chu khau ang an na,In vengtuhai chu khau hon ang;A dei pha bangah an kop a,A lum pha an vuong hmang a,An fena chin hrie an um nawh.
18. Aw Asuria lal, i vengtuhai an in,I mi thahai an zal hadam a,I mipuihai tlangah an tla dar a,Thuoi khawmtu tu khom an um nawh.
19. I hliemna hi thipui khop a na,Ieng khomin sukdam naw nih.I tluk siet thu hre taphotin,Lawmin an kut an ben a;I rawngzie hril ruol lo kha,Tuor lo tu am an um a?
←  Nahum (3/3)